ಪತ್ನಿಗೆ ದ್ವಿಶತಕದ ಉಡುಗೊರೆ ನೀಡಿದ ರೋಹಿತ್

ಮೊಹಾಲಿ: ಶ್ರೀಲಂಕಾ ವಿರುದ್ಧ ನಡೆದ ದ್ವಿತೀಯ ಏಕದಿನ ಪಂದ್ಯದಲ್ಲಿ ಟೀಮ್ ಇಂಡಿಯಾ ನಾಯಕ ರೋಹಿತ್ ಶರ್ಮಾ ಅಮೋಘ ದ್ವಿಶತಕ ಸಾಧನೆ ಮಾಡಿದ್ದರು. ಇದರ ಬೆಂಬಲದೊಂದಿಗೆ ಲಂಕಾ ವಿರುದ್ಧ ಭಾರತ 141 ರನ್ ಅಂತರದ ಭರ್ಜರಿ ಗೆಲುವು ದಾಖಲಿಸಿತ್ತು.

ರೋಹಿತ್ ದ್ವಿಶತಕ ಬಾರಿಸಿದಾಗ ಗ್ಯಾಲರಿಯಲ್ಲಿದ್ದ ಪತ್ನಿ ರಿತಿಕಾ ಸಜ್‌ದೇವ್ ಅತ್ಯಂತ ಭಾವುಕರಾಗಿ ಕಂಡುಬಂದಿದ್ದರು. ಈ ಸಂದರ್ಭದಲ್ಲಿ ಪತ್ನಿಯ ಜತೆ ರೋಹಿತ್ ಫ್ಲೈಯಿಂಗ್ ಕಿಸ್ ಹಂಚಿಕೊಂಡಿದ್ದರು.

ವಿವಾಹದ ಎರಡನೇ ವಾರ್ಷಿಕೋತ್ಸವ ದಿನದಂದೇ ದ್ವಿಶತಕ ಬಾರಿಸಿರುವುದು ರೋಹಿತ್ ಸಂಭ್ರಮವನ್ನು ಇಮ್ಮಡಿಗೊಳಿಸಿತ್ತು. ಇದೀಗ ವಿಶ್ವ ದಾಖಲೆಯ ಮೂರನೇ ದ್ವಿಶತಕ ಬಾರಿಸಿದ ರೋಹಿತ್ ಪಂದ್ಯಶ್ರೇಷ್ಠ ಸ್ವೀಕರಿಸುತ್ತಾ ಈ ಸಾಧನೆ ತಮ್ಮ ಧರ್ಮಪತ್ನಿಗೆ ನೀಡುವ ಉಡುಗೊರೆ ಎಂದಿದ್ದಾರೆ.

ಈ ವಿಶೇಷ ದಿನದಂದು ಪತ್ನಿ ನನ್ನ ಹತ್ತಿರವಿರುವುದಕ್ಕೆ ನಾನು ಹೆಚ್ಚು ಸಂತಸಗೊಂಡಿದ್ದೇನೆ. ನನ್ನ ಈ ಉಡುಗೊರೆ ಆಕೆಗೆ ಇಷ್ಟವಾಗಿರಬಹುದು ಎಂದು ನಾನು ಭಾವಿಸುತ್ತೇನೆ. ಆಕೆ ನನ್ನ ಶಕ್ತಿಯಾಗಿದ್ದು, ಯಾವತ್ತೂ ನನ್ನ ಬೆನ್ನಿಗೆ ನಿಂತಿದ್ದಾಳೆ. ಕ್ರೀಡೆಯಲ್ಲಿ ಸಾಕಷ್ಟು ಒತ್ತಡವಿರುವುದರಿಂದ ನಿಮ್ಮ ಆಪ್ತರು ಜತೆಗಿರುವುದು ಯಾವತ್ತೂ ವಿಶೇಷವಾಗಿರುತ್ತದೆ ಎಂದರು.

153 ಎಸೆತಗಳನ್ನು ಎದುರಿಸಿದ ರೋಹಿತ್ 13 ಬೌಂಡರಿ ಹಾಗೂ 12 ಸಿಕ್ಸರ್‌ಗಳ ನೆರವಿನಿಂದ ಅಜೇಯ 208 ರನ್ ಗಳಿಸಿದ್ದರು.

ಇದು ರೋಹಿತ್ ನಾಯಕತ್ವದಡಿಯಲ್ಲಿ ಟೀಮ್ ಇಂಡಿಯಾ ದಾಖಲಿಸಿದ ಮೊದಲ ಗೆಲುವು ಕೂಡಾ ಹೌದು.