ಭಾರತ ಕ್ರಿಕೆಟ್‌ ತಂಡದ ಕೋಚ್‌ ದ್ರಾವಿಡ್‌?

ಮುಂಬಯಿ: ಭಾರತ ಕ್ರಿಕೆಟ್‌ ತಂಡದ ಮಾಜಿ ನಾಯಕ ರಾಹುಲ್‌ ದ್ರಾವಿಡ್‌ ಅವರು ಶೀಘ್ರದಲ್ಲೇ ಟೀಮ್‌ ಇಂಡಿಯಾದ ಮುಖ್ಯ ಕೋಚ್‌ ಹುದ್ದೆ ಅಲಂಕರಿಸುವ ಸಾಧ್ಯತೆ ಇದೆ. ಈ ಕುರಿತು ವಿಕ ಸೋದರ ಪತ್ರಿಕೆ ಟೈಮ್ಸ್‌ ಆಫ್‌ ಇಂಡಿಯಾ ಭಾನುವಾರ ವರದಿ ಪ್ರಕಟಿಸಿದೆ.

ಸಚಿನ್‌ ತೆಂಡೂಲ್ಕರ್‌, ಸೌರವ್‌ ಗಂಗೂಲಿ ಮತ್ತು ಮತ್ತು ವಿವಿಎಸ್‌ ಲಕ್ಷ್ಮಣ್‌ ಅವರನ್ನೊಳಗೊಂಡ ಬಿಸಿಸಿಐನ ಸಲಹಾ ಸಮಿತಿ, ದ್ರಾವಿಡ್‌ ಅವರಿಗೆ ಭಾರತ ತಂಡದ ಮುಖ್ಯ ಕೋಚ್‌ ಹುದ್ದೆ ವಹಿಸಿಕೊಳ್ಳುವ ಆಸಕ್ತಿ ಇರುವ ಕುರಿತು ಕೇಳಿದೆ.

ಮೂಲಗಳ ಪ್ರಕಾರ, ಈ ಪ್ರಸ್ತಾವನೆ ಕುರಿತು ಯೋಚಿಸಲು ದ್ರಾವಿಡ್‌ ಕಾಲಾವಕಾಶ ಕೇಳಿದ್ದಾರೆ ಎಂದು ಹೇಳಲಾಗಿದೆ. ರಾಹುಲ್‌ ದ್ರಾವಿಡ್‌ ಸದ್ಯ ಐಪಿಎಲ್‌ನ ಡೆಲ್ಲಿ ಡೇರ್‌ ಡೆವಿಲ್ಸ್‌ ತಂಡದ ಮಾರ್ಗದರ್ಶಕರಾಗಿದ್ದಾರೆ. ಇದಲ್ಲದೆ 19 ವರ್ಷದೊಳಗಿನವರ ಭಾರತ ತಂಡದ ಮುಖ್ಯ ಕೋಚ್‌ ಸಹ ಆಗಿದ್ದಾರೆ. ಇವರ ಗರಡಿಯಲ್ಲಿ ಪಳಗಿದ ಭಾರತ ತಂಡ ಇದೇ ವರ್ಷ ಬಾಂಗ್ಲಾದೇಶದಲ್ಲಿ ನಡೆದ ವಿಶ್ವಕಪ್‌ ಟೂರ್ನಿಯಲ್ಲಿ ಫೈನಲ್‌ ಪ್ರವೇಶಿಸಿದ್ದ ಸಾಧನೆ ಮಾಡಿದೆ.

ವರದಿ ಪ್ರಕಾರ, ಬಿಸಿಸಿಐ ಸಲಹಾ ಸಮಿತಿ ಗುರುವಾರ ದ್ರಾವಿಡ್‌ ಅವರನ್ನು ಭೇಟಿಯಾಗಿ ಟೀಮ್‌ ಇಂಡಿಯಾದ ಮುಂದಿನ ಕೋಚ್‌ ವಿಷಯ ಕುರಿತು ಚರ್ಚಿಸಿದೆ. ಅಲ್ಲದೆ ಟೀಮ್‌ ಇಂಡಿಯಾದ ನಿರ್ದೇಶಕರಾಗಿದ್ದ ಮಾಜಿ ಕ್ರಿಕೆಟಿಗ ರವಿಶಾಸ್ತ್ರಿ ಅವರ ಪಾತ್ರದ ಮುಕ್ತಾಯದ ಬಗ್ಗೆ ಇನ್ನೂ ಸ್ಪಷ್ಟನೆ ನೀಡಿಲ್ಲ. ವಿಶ್ವಕಪ್‌ ಅಂತ್ಯಕ್ಕೆ ಭಾರತ ತಂಡದೊಂದಿಗಿನ ರವಿಶಾಸ್ತ್ರಿ ಅವರ ಒಪ್ಪಂದ ಅಂತ್ಯವಾಗಿದೆ. ಇದರ ಹೊರತಾಗಿಯೂ ಮುಖ್ಯ ಕೋಚ್‌ ಸ್ಥಾನವನ್ನು ರವಿಶಾಸ್ತ್ರಿ ಅವರಿಗೆ ವಹಿಸಲು ಬಿಸಿಸಿಐ ನಿರಾಸಕ್ತಿ ತೋರಿದೆ ಎಂದು ಹೇಳಲಾಗಿದೆ.

ಬಿಸಿಸಿಐ ಇತ್ತೀಚೆಗಷ್ಟೇ ಆಸ್ಪ್ರೇಲಿಯಾ ಬ್ಯಾಟ್ಸ್‌ಮನ್‌ ಮೈಕಲ್‌ ಹಸ್ಸಿ ಅವರಿಗೆ ಕೋಚ್‌ ಹುದ್ದೆಗೆ ಆಹ್ವಾನಿಸಿತ್ತು.ಆದರೆ ಕೆಲಸದ ಕಾರ್ಯನಿಮಿತ್ತ ಅವರು ನಿರಾಕರಿಸಿದ್ದಾರೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ. ಈ ಮಧ್ಯೆ, ಬಿಸಿಸಿಐ ಟೀಮ್‌ ಇಂಡಿಯಾದ ಸಹಾಯಕ ಕೋಚ್‌ ಸಂಜಯ್‌ ಬಂಗಾರ್‌, ಬೌಲಿಂಗ್‌ ಕೋಚ್‌ ಭರತ್‌ ಅರುಣ್‌ ಮತ್ತು ಫೀಲ್ಡಿಂಗ್‌ ಕೋಚ್‌ ಆರ್‌. ಶ್ರೀಧರ್‌ ಅವರ ಒಪ್ಪಂದವನ್ನು ಮುಂದುವರಿಸುವ ಬಗ್ಗೆ ಯೋಚಿಸಿದೆ ಎನ್ನಲಾಗಿದೆ.