ಪಾಪ್, ವೋಕ್ಸ್ ಕಮ್‌ಬ್ಯಾಕ್; ಇಂಗ್ಲೆಂಡ್ ತಂಡ ಪ್ರಕಟ

ಓವಲ್: ಪ್ರವಾಸಿ ಭಾರತ ವಿರುದ್ಧ ನಡೆಯಲಿರುವ ಕೊನೆಯ ಹಾಗೂ ಐದನೇ ಟೆಸ್ಟ್ ಪಂದ್ಯಕ್ಕಾಗಿನ ಆತಿಥೇಯ ಇಂಗ್ಲೆಂಡ್ ತಂಡವನ್ನು ಪ್ರಕಟಿಸಲಾಗಿದೆ.

ಇಂಗ್ಲೆಂಡ್ ಹಾಗೂ ವೇಲ್ಸ್ ಕ್ರಿಕೆಟ್ ಮಂಡಳಿ ಪ್ರಕಟಿಸಿರುವ 13 ಮಂದಿ ಸದಸ್ಯರ ತಂಡಕ್ಕೆ ಒಲಿವರ್ ಪಾಪ್ ಹಾಗೂ ಕ್ರಿಸ್ ವೋಕ್ಸ್ ಕಮ್‌ಬ್ಯಾಕ್ ಮಾಡಿಕೊಂಡಿದ್ದಾರೆ.

ಭಾರತ ವಿರುದ್ಧದ ನಾಲ್ಕನೇ ಟೆಸ್ಟ್ ಪಂದ್ಯದಿಂದ ಇವರಿಬ್ಬರನ್ನು ಕೈಬಿಡಲಾಗಿತ್ತು. ಹಾಗಿದ್ದರೂ ಈ ಪಂದ್ಯವನ್ನು 60 ರನ್ ಅಂತರದಿಂದ ವಶಪಡಿಸಿಕೊಂಡಿರುವ ಇಂಗ್ಲೆಂಡ್, ಐದು ಪಂದ್ಯಗಳ ಟೆಸ್ಟ್ ಸರಣಿಯನ್ನು ಇನ್ನು ಒಂದು ಪಂದ್ಯ ಬಾಕಿ ಉಳಿದಿರುವಂತೆಯೇ 3-1ರ ಅಂತರದಿಂದ ವಶಪಡಿಸಿಕೊಂಡಿತ್ತು. ನಿಮ್ಮ ಮಾಹಿತಿಗಾಗಿ ಪ್ರಸಕ್ತ ಸರಣಿಯಲ್ಲೇ ವೋಕ್ಸ್ ಟೆಸ್ಟ್ ಕ್ರಿಕೆಟ್‌ನ ಚೊಚ್ಚಲ ಶತಕ ಬಾರಿಸಿದ್ದರು.

ಅತ್ತ ಇಂಗ್ಲೆಂಡ್ ಪರ ಟೆಸ್ಟ್ ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ರನ್ ಗಳಿಸಿರುವ ಆಲಿಸ್ಟಾರ್ ಕುಕ್ ಪಾಲಿಗಿದು ಕೊನೆಯ ಪಂದ್ಯವಾಗಿರಲಿದೆ. ಭಾರತದ ವಿರುದ್ಧದ 5ನೇ ಟೆಸ್ಟ್ ಪಂದ್ಯದ ಬಳಿಕ ನಿವೃತ್ತಿ ಘೋಷಿಸುವುದಾಗಿ ಕುಕ್ ಪ್ರಕಟಿಸಿದ್ದರು.

ಕುಕ್ ತಮ್ಮ 160 ಟೆಸ್ಟ್ ಪಂದ್ಯಗಳ ವೃತ್ತಿ ಜೀವನದಲ್ಲಿ 12,254 ರನ್ ಕಲೆ ಹಾಕಿದ್ದಾರೆ. ಇದರಲ್ಲಿ 32 ಶತಕಗಳು ಸೇರಿವೆ.

ಭಾರತ ಹಾಗೂ ಇಂಗ್ಲೆಂಡ್ ನಡುವಣ ಕೊನೆಯ ಟೆಸ್ಟ್ ಪಂದ್ಯ ಸೆಪ್ಟೆಂಬರ್ 07ರಂದು ಕೆನ್ನಿಂಗ್ಟನ್ ಓವಲ್‌ನಲ್ಲಿ ಆರಂಭವಾಗಲಿದೆ. ಇದು ಭಾರತದ ಪಾಲಿಗೆ ಪ್ರತಿಷ್ಠೆಯ ಪಂದ್ಯವಾಗಿರಲಿದೆ.

ಇಂಗ್ಲೆಂಡ್ ತಂಡ ಇಂತಿಂದೆ:

ಜೋ ರೂಟ್ (ನಾಯಕ), ಮೊಯಿನ್ ಆಲಿ, ಜೇಮ್ಸ್ ಆಂಡರ್ಸನ್, ಜಾನಿ ಬೈರ್‌ಸ್ಟೋವ್, ಸ್ಟುವರ್ಟ್ ಬ್ರಾಡ್, ಜೋಸ್ ಬಟ್ಲರ್, ಆಲಿಸ್ಟಾರ್ ಕುಕ್, ಸ್ಯಾಮ್ ಕರ್ರನ್, ಕೇಟನ್ ಜೆನಿಂಗ್ಸ್, ಒಲಿವರ್ ಪಾಪ್, ಆದಿಲ್ ರಾಶೀದ್, ಬೆನ್ ಸ್ಟೋಕ್ಸ್ ಮತ್ತು ಕ್ರಿಸ್ ವೋಕ್ಸ್.