ಟಿ10ನಲ್ಲಿ 25 ಎಸೆತದಲ್ಲೇ ಶತಕ ಸಿಡಿಸಿದ ಇಂಗ್ಲಿಷ್ ಬ್ಯಾಟ್ಸ್‌ಮನ್

ಹೊಸದಿಲ್ಲಿ: ಕ್ರಿಕೆಟ್ ಜನಕ ಇಂಗ್ಲೆಂಡ್‌ನ ಮಗದೊಂದು ಅವಿಷ್ಕಾರವಾಗಿರುವ ಕ್ರಾಂತಿಕಾರಿ ಟಿ10 ಕ್ರಿಕೆಟ್‌ ಲೀಗ್‌ಗೆ ಎಲ್ಲೆಡೆ ಭರ್ಜರಿ ಜನಪ್ರಿಯತೆ ಸಿಗುತ್ತಿದೆ. ಇದೀಗ ಟಿ-10ನಲ್ಲೂ ಶತಕ ಸಿಡಿಸುವುದು ಸಾಧ್ಯ ಎಂಬುದನ್ನು ಇಂಗ್ಲಿಷ್ ಬ್ಯಾಟ್ಸ್‌ಮನ್ ಸಾಬೀತು ಮಾಡಿದ್ದಾರೆ.

ದುಬೈನಲ್ಲಿ ಲಂಕಶೈರ್ ವಿರುದ್ಧ ನಡೆದ ಪಂದ್ಯದಲ್ಲಿ ಸರ್ರೆ ತಂಡವನ್ನು ಪ್ರತಿನಿಧಿಸುತ್ತಿರುವ ವಿಲ್ ಜಾಕ್ಸ್ ಕೇವಲ 25 ಎಸೆತಗಳಲ್ಲೇ ಶತಕ ಸಿಡಿಸಿದ್ದಾರೆ.

ಮೊದಲ ಎಸೆತದಿಂದಲೇ ಎದುರಾಳಿ ಬೌಲರ್‌ಗಳನ್ನು ದಂಡಿಸಿದ ಜಾಕ್ಸ್, ಓವರ್‌ವೊಂದರಲ್ಲಿ ಸತತ ಆರು ಸಿಕ್ಸರ್‌ಗಳನ್ನು ಸಿಡಿಸುವ ಮೂಲಕ ಪರಾಕ್ರಮ ಮೆರೆದರು.

ಅಂತಿಮವಾಗಿ 30 ಎಸೆತಗಳಲ್ಲಿ 105 ರನ್ ಗಳಿಸಿ ವಿಕೆಟ್ ಒಪ್ಪಿಸಿದರು. ಈ ಮೂಲಕ ಸರ್ರೆ ತಂಡವು 10 ಓವರ್‌ಗಳಲ್ಲಿ ಕೇವಲ ಮೂರು ವಿಕೆಟ್ ನಷ್ಟಕ್ಕೆ 176 ರನ್ ಪೇರಿಸಿತು.

ಬಳಿಕ ರನ್ ಬೆನ್ನಟ್ಟಿದ ಲಂಕಶೈರ್ 9.3 ಓವರ್‌ಗಳಲ್ಲಿ 81 ರನ್‌ಗಳಿಗೆ ಸರ್ವಪತನವನ್ನು ಕಂಡಿತು. ಈ ಮೂಲಕ 95 ರನ್‌ಗಳ ಹೀನಾಯ ಸೋಲಿಗೊಳಗಾಯಿತು.