ಫಖಾರ್ ಮಿಂಚು; ಆಸೀಸ್ ವಿರುದ್ಧ ಪಾಕ್‌ಗೆ ಜಯ

ಹರಾರೆ: ಎಡಗೈ ಆರಂಭಿಕ ಬ್ಯಾಟ್ಸ್‌ಮನ್ ಫಖಾರ್ ಜಮಾನ್ ಬಾರಿಸಿದ ಜೀವನಶ್ರೇಷ್ಠ ಅರ್ಧಶತಕದ (73) ನೆರವಿನಿಂದ ಆಸ್ಟ್ರೇಲಿಯಾ ವಿರುದ್ಧ ನಡೆದ ನಡೆದ ತ್ರಿಕೋನ ಅಂತರಾಷ್ಟ್ರೀಯ ಟ್ವೆಂಟಿ-20 ಸರಣಿಯ ಕೊನೆಯ ಲೀಗ್ ಪಂದ್ಯದಲ್ಲಿ ಪಾಕಿಸ್ತಾನ 45 ರನ್‌ಗಳ ಅಧಿಕಾರಯುತ ಗೆಲುವು ದಾಖಲಿಸಿದೆ.

ಆತಿಥೇಯ ಜಿಂಬಾಬ್ವೆ ಆಗಲೇ ಟೂರ್ನಿಯಿಂದ ಹೊರನಡೆದಿರುವುದರಿಂದ ಇತ್ತಂಡಗಳಿಗೂ ಇದು ಫೈನಲ್ ಮುಂದಿನ ಕಸರತ್ತು ಎಂದೇ ಪರಿಗಣಿಸಲ್ಪಟ್ಟಿತ್ತು. ಇದರಂತೆ ಮೊದಲ ಮುಖಾಮುಖಿಯಲ್ಲಿ ಎದುರಾದ ಸೋಲಿಗೆ ಪಾಕ್ ಸೇಡು ತೀರಿಸಿಕೊಂಡಿದೆ.

ಮೊದಲು ಬ್ಯಾಟಿಂಗ್ ನಡೆಸಿದ ಪಾಕಿಸ್ತಾನ ಏಳು ವಿಕೆಟ್ ನಷ್ಟಕ್ಕೆ 194 ರನ್‌ಗಳ ಬೃಹತ್ ಮೊತ್ತ ಪೇರಿಸಿತ್ತು. ಕೇವಲ 42 ಎಸೆತಗಳನ್ನು ಎದುರಿಸಿದ ಫಖಾರ್ ಒಂಬತ್ತು ಬೌಂಡರಿ ಹಾಗೂ ಮೂರು ಸಿಕ್ಸರ್‌ಗಳ ನೆರವಿನಿಂದ 73 ರನ್ ಗಳಿಸಿದರು.
ಹುಸೈನ್ ತಲಾತ್ (30), ಶೋಯಿಬ್ ಮಲಿಕ್ (27) ಹಾಗೂ ಆಸಿಫ್ ಅಲಿ ಸಹ (37*) ಉಪಯುಕ್ತ ಇನ್ನಿಂಗ್ಸ್‌ಗಳನ್ನು ಕಟ್ಟಿದ್ದರು. ಆಸೀಸ್ ಪರ ಆಂಡ್ರ್ಯೂ ಟೈ ಮೂರು ವಿಕೆಟುಗಳನ್ನು ಕಬಳಿಸಿದ್ದರು.

ಬಳಿಕ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿದ ಆಸೀಸ್ ನಿಗದಿತ 20 ಓವರ್‌ಗಳಲ್ಲಿ ಏಳು ವಿಕೆಟ್ ನಷ್ಟಕ್ಕೆ 149 ರನ್ ಗಳಿಸಲಷ್ಟೇ ಶಕ್ತವಾಯಿತು. ನಾಯಕ ಆ್ಯರೋನ್ ಫಿಂಚ್ (16) ನಿರಾಸೆ ಮೂಡಿಸಿದರು.

ತಂಡದ ಪರ ವಿಕೆಟ್ ಕೀಪರ್ ಬ್ಯಾಟ್ಸ್‌ಮನ್ ಅಲೆಕ್ಸ್ ಕ್ಯಾರೆ ಅಜೇಯ 37 ರನ್ ಗಳಿಸಿದ್ದರು. ಇನ್ನುಳಿದಂತೆ ಆರಂಭಿಕ ಡಾರ್ಸಿ ಶಾರ್ಟ್ (28) ಹೊರತುಪಡಿಸಿ ಇತರೆ ಯಾವ ಬ್ಯಾಟ್ಸ್‌ಮನ್ ಮಿಂಚಲಿಲ್ಲ. ಪಾಕ್ ಪರ ಮೂರು ವಿಕೆಟುಗಳನ್ನು ಪಡೆದ ಶಾಹೀನ್ ಆಫ್ರಿದಿ ಮಿಂಚಿದರು.

ಈ ಗೆಲುವಿನೊಂದಿಗೆ ಆಡಿರುವ ನಾಲ್ಕು ಪಂದ್ಯಗಳಲ್ಲಿ ಮೂರು ಗೆಲುವು ಹಾಗೂ ಸೋಲಿನೊಂದಿಗೆ ಒಟ್ಟು 12 ಅಂಕಗಳನ್ನು ಸಂಪಾದಿಸಿರುವ ಪಾಕಿಸ್ತಾನ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದೆ. ಅತ್ತ ಮೂರು ಪಂದ್ಯಗಳಲ್ಲಿ ಎಂಟು ಅಂಕಗಳನ್ನು ಕಲೆ ಹಾಕಿರುವ ಆಸ್ಟ್ರೇಲಿಯಾ ತನ್ನ ಕೊನೆಯ ಲೀಗ್ ಪಂದ್ಯದಲ್ಲಿ ಜಿಂಬಾಬ್ವೆ ಸವಾಲನ್ನು ಎದುರಿಸಲಿದೆ. ಇನ್ನೊಂದೆಡೆ ಎಲ್ಲ ಮೂರು ಪಂದ್ಯಗಳಲ್ಲಿ ಸೋಲು ಅನುಭವಿಸಿರುವ ಜಿಂಬಾಬ್ವೆ ಖಾತೆ ತೆರೆಯುವಲ್ಲಿ ವಿಫಲವಾಗಿದೆ. ಫೈನಲ್ ಪಂದ್ಯ ಜುಲೈ 08 ಭಾನುವಾರದಂದು ನಡೆಯಲಿದೆ.