ಏಷ್ಯಾ ಕಪ್‌ಗೂ ತಟ್ಟಿದ ಫಿಕ್ಸಿಂಗ್ ಕರಿನೆರಳು

ದುಬೈ: ಆಘಾತಕಾರಿ ಬೆಳವಣಿಗೆಯೊಂದರಲ್ಲಿ ಪ್ರಸ್ತುತ ಯುಎಇನಲ್ಲಿ ಸಾಗುತ್ತಿರುವ ಏಷ್ಯಾ ಕಪ್‌ಗೂ ಮ್ಯಾಚ್ ಫಿಕ್ಸಿಂಗ್ ಕರಿನೆರಳು ತಟ್ಟಿದೆ.

ಸ್ಪಾಟ್ ಫಿಕ್ಸಿಂಗ್ ಸಂಬಂಧ ಬುಕ್ಕಿಗಳು ತಮ್ಮನ್ನು ಸಂಪರ್ಕಿಸಿರುವುದಾಗಿ ಅಫಘಾನಿಸ್ತಾನ ವಿಕೆಟ್ ಕೀಪರ್ ಬ್ಯಾಟ್ಸ್‌ಮನ್ ಮೊಹಮ್ಮದ್ ಶೆಹ್ಜಾದ್, ಐಸಿಸಿಗೆ ದೂರು ನೀಡಿದ್ದಾರೆ. ಮುಂಬರುವ ಅಫ್ಘಾನ್ ಪ್ರೀಮಿಯರ್ ಟ್ವೆಂಟಿ-20 ಲೀಗ್‌ನಲ್ಲಿ ಕಳಪೆ ಪ್ರದರ್ಶನ ನೀಡುವ ಸಂಬಂಧ ಶೆಹ್ಜಾದ್ ಅವರನ್ನು ಬುಕ್ಕಿಗಳು ಸಂಪರ್ಕಿಸಿದ್ದರು.

ಇದಾದ ಬೆನ್ನಲ್ಲೇ ಸ್ಪಷ್ಟನೆಯೊಂದಿಗೆ ಮುಂದೆ ಬಂದಿರುವ ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ) ಆಡಳಿತ ಮಂಡಳಿಯು, ಕಳೆದೊಂದು ವರ್ಷದಲ್ಲಿ ಸ್ಪಾಟ್ ಫಿಕ್ಸಿಂಗ್ ಸಂಬಂಧ ಐವರು ನಾಯಕರುಗಳನ್ನು ಬುಕ್ಕಿಗಳು ಸಂಪರ್ಕಿಸಿರುವುದಾಗಿ ಹೇಳಿದೆ.

ಈ ಬಗ್ಗೆ ಹೇಳಿಕೆ ನೀಡಿರುವ ಐಸಿಸಿ ಭ್ರಷ್ಟಾಚಾರ ವಿರೋಧಿ ಘಟಕ ಪ್ರಧಾನ ವ್ಯವಸ್ಥಾಪಕರಾದ ಅಲೆಕ್ಸ್ ಮಾರ್ಷಲ್, "ಐಸಿಸಿ ಖಾಯಂ ಸದಸ್ಯತ್ವ ಹೊಂದಿರುವ ನಾಲ್ಕು ರಾಷ್ಟ್ರಗಳ ನಾಯಕರು ಸೇರಿದಂತೆ ಒಟ್ಟು ಐವರು ಅಂತಾರಾಷ್ಟ್ರೀಯ ಕ್ಯಾಪ್ಟನ್‌ಗಳನ್ನು ಬುಕ್ಕಿಗಳು ಸಂಪರ್ಕಿಸಿದ್ದಾರೆ. ಆದರೆ ಅವರೆಲ್ಲರ ಹೆಸರುಗಳನ್ನು ಬಯಲು ಮಾಡಲು ಸಾಧ್ಯವಿಲ್ಲ" ಎಂದು ಹೇಳಿದ್ದಾರೆ.

ಇಲ್ಲಿ ಅಚ್ಚರಿಯ ಸಂಗತಿಯೆಂದರೆ ಬಹುತೇಕ ಎಲ್ಲ ಬುಕ್ಕಿಗಳು ಭಾರತೀಯರು. ಅದರರ್ಥ ಭಾರತ ಕೇಂದ್ರಿಕರಿಸಿ ಕಾರ್ಯಾಚರಿಸುತ್ತಾರೆ ಎಂದಲ್ಲ. ಟ್ವೆಂಟಿ-20 ಕ್ರಿಕೆಟ್ ಸುಲಭವಾಗಿರುವುದರಿಂದ ಕಿರು ಅವಧಿಯಲ್ಲಿ ಸ್ಪಾಟ್ ಫಿಕ್ಸಿಂಗ್ ಮಾಡಲು ಇಷ್ಟಪಡುತ್ತಾರೆ ಎಂದು ಸೇರಿಸಿದರು .

ಶನಿವಾರದಂದು ಅಪ್ಘಾನ್ ಆಟಗಾರನನ್ನು ಬುಕ್ಕಿಗಳು ಸಂಪರ್ಕಿಸಿದ್ದರು. ಈ ಸಂಬಂಧ ಅಧಿಕೃತ ದೂರನ್ನು ದಾಖಲಿಸಲಾಗಿದೆ.