ಐಸಿಸಿ ಮ್ಯಾಚ್‌ ರೆಫರಿಯಾಗಿ ಲಕ್ಷ್ಮಿ ನೇಮಕ

ದುಬೈ: ಭಾರತದ ಜಿ.ಎಸ್‌.ಲಕ್ಷ್ಮಿ ಐಸಿಸಿ ಮ್ಯಾಚ್‌ ರೆಫರಿಗಳ ಅಂತಾರಾಷ್ಟ್ರೀಯ ಸಮಿತಿಗೆ ನೇಮಕಗೊಂಡಿದ್ದಾರೆ. ಇದರೊಂದಿಗೆ ಐಸಿಸಿಯ ಮೊದಲ ಮಹಿಳಾ ಮ್ಯಾಚ್‌ ರೆಫರಿ ಎಂಬ ಹೆಗ್ಗಳಿಕೆಗೆ ಅವರು ಭಾಜನರಾಗಿದ್ದಾರೆ. ಅವರು ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ತಕ್ಷಣದಿಂದಲೇ ಮ್ಯಾಚ್‌ ರೆಫರಿಯಾಗಿ ಕಾರ್ಯ ನಿರ್ವಹಿಸಬಹುದು.

ಆಸ್ಪ್ರೇಲಿಯಾ ಮೂಲದ ಕ್ಲೈರ್‌ ಪೊಲೊಸ್ಯಾಕ್‌ ಇತ್ತೀಚೆಗಷ್ಟೇ ಪುರುಷರ ಏಕದಿನ ಪಂದ್ಯದಲ್ಲಿ ಮೊದಲ ಮಹಿಳಾ ಅಂಪೈರ್‌ ಆಗಿ ಕಾರ್ಯ ನಿರ್ವಹಿಸಿದ್ದನ್ನು ಈ ಸಂದರ್ಭದಲ್ಲಿ ಸ್ಮರಿಸಬಹುದಾಗಿದೆ.

2008-09ರಲ್ಲಿ ದೇಶಿ ಮಹಿಳಾ ಕ್ರಿಕೆಟ್‌ನಲ್ಲಿ ಪ್ರಥಮ ಬಾರಿಗೆ ರೆಫರಿಯಾಗಿ ನೇಮಕಗೊಂಡಿದ್ದ 51 ವರ್ಷದ ಲಕ್ಷ್ಮಿ, ನಂತರ ಮೂರು ಮಹಿಳಾ ಏಕದಿನ ಪಂದ್ಯಗಳು ಮತ್ತು ಮೂರು ಮಹಿಳಾ ಅಂತಾರಾಷ್ಟ್ರೀಯ ಟಿ20 ಪಂದ್ಯಗಳಲ್ಲಿ ರೆಫರಿಯಾಗಿ ಕಾರ್ಯನಿರ್ವಹಿಸಿದ್ದಾರೆ.

''ಅಂತಾರಾಷ್ಟ್ರೀಯ ರೆಫರಿಗಳ ಸಮಿತಿಗೆ ಆಯ್ಕೆಯಾಗಿರುವುದು ನನಗೆ ದೊರೆತ ಅತಿದೊಡ್ಡ ಗೌರವವಾಗಿದೆ. ಭಾರತದಲ್ಲಿ ಆಟಗಾರ್ತಿಯಾಗಿ, ರೆಫರಿಯಾಗಿ ಬಹಳಷ್ಟು ಸೇವೆ ಸಲ್ಲಿಸಿದ್ದೇನೆ. ಅಂತಾರಾಷ್ಟ್ರೀಯ ಸರ್ಕಿಟ್‌ನಲ್ಲಿ ಆಟಗಾರ್ತಿಯಾಗಿ ಮತ್ತು ಮ್ಯಾಚ್‌ ಅಧಿಕಾರಿಯಾಗಿ ಸಿಕ್ಕ ಅವಕಾಶವನ್ನು ಉತ್ತಮವಾಗಿ ಬಳಸಿಕೊಳ್ಳುವ ವಿಶ್ವಾಸವಿದೆ,'' ಎಂದು ಹೇಳಿದ್ದಾರೆ.