ರಾಜಕೀಯ ಪರೀಕ್ಷೆಯಲ್ಲಿ ಗಂಭೀರ್‌ ಪಾಸ್‌

ಹೊಸದಿಲ್ಲಿ : ಇತ್ತೀಚೆಗೆ ರಾಜಕಾರಣಿಯಾಗಿ ಪರಿವರ್ತನೆಗೊಂಡ ಕ್ರಿಕೆಟಿಗ ಗೌತಮ್‌ ಗಂಭೀರ್‌ ಮೊದಲ ಪ್ರಯತ್ನದಲ್ಲೇ ಸಂಸತ್‌ ಸದಸ್ಯರಾಗಿ ಚುನಾಯಿತರಾಗಿದ್ದಾರೆ. ಪೂರ್ವ ದಿಲ್ಲಿ ಲೋಕಸಭಾ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿಯಾಗಿ ಇದೇ ಮೊದಲ ಬಾರಿ 'ರಾಜಕೀಯ ಪರೀಕ್ಷೆ' ಬರೆದಿದ್ದ ಗಂಭೀರ್‌ ಡಿಸ್ಟಿಂಕ್ಷನ್‌ನಲ್ಲಿ ಉತ್ತೀರ್ಣರಾದರು. ತಮ್ಮ ಸಮೀಪದ ಪ್ರತಿಸ್ಪರ್ಧಿ ಕಾಂಗ್ರೆಸ್‌ನ ಅರವಿಂದ್‌ ಸಿಂಗ್‌ ವಿರುದ್ಧ ಗಂಭೀರ್‌ 2.38 ಲಕ್ಷ ಮತಗಳ ಅಂತರದಿಂದ ಗೆದ್ದರು. ಆಮ್‌ ಆದ್ಮಿ ಪಕ್ಷ ದ ಆತಿಶಿ 3ನೇ ಸ್ಥಾನ ಗಳಿಸಿದರು.

ಏತನ್ಮಧ್ಯೆ, ಜೈಪುರ ಗ್ರಾಮಾಂತರ ಲೋಕಸಭಾ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿಯಾಗಿ ಕಣಕ್ಕಿಳಿದಿದ್ದ ರಾಜ್ಯವರ್ಧನ್‌ ಸಿಂಗ್‌ ರಾಥೋಡ್‌ ಪ್ರತಿಸ್ಪರ್ಧಿ ಕಾಂಗ್ರೆಸ್‌ನ ಕೃಷ್ಣಾ ಪೂನಿಯಾ (ಅಥ್ಲೀಟ್‌) ವಿರುದ್ಧ ಭಾರೀ ಅಂತರದಲ್ಲಿ ಗೆಲುವು ದಾಖಲಿಸಿದ್ದಾರೆ. ರಾಜ್ಯವರ್ಧನ್‌ ಸಿಂಗ್‌ ಕಳೆದ ಬಾರಿ ನರೇಂದ್ರ ಮೋದಿ ಸರಕಾರದಲ್ಲಿ ಕ್ರೀಡಾ ಸಚಿವರಾಗಿದ್ದರು.

ಇನ್ನೊಂದೆಡೆ, ದಕ್ಷಿಣ ದಿಲ್ಲಿ ಲೋಕಸಭಾ ಕ್ಷೇತ್ರದ ಕಾಂಗ್ರೆಸ್‌ ಅಭ್ಯರ್ಥಿ, ಬಾಕ್ಸರ್‌ ವಿಜೇಂದರ್‌ ಸಿಂಗ್‌ ಸೋತಿದ್ದಾರೆ. ಇದರೊಂದಿಗೆ, ನಾಲ್ವರು ಕ್ರೀಡಾಪಟುಗಳ ಪೈಕಿ ಇಬ್ಬರು ಗೆಲುವಿನ ಸಿಹಿ ಸವಿದರೆ ಇನ್ನಿಬ್ಬರು ಸೋಲಿನ ಕಹಿಯುಂಡಿದ್ದಾರೆ.