ಮಹಿಳಾ ಕೋಚ್ ರೇಸ್‌ನಲ್ಲಿ ಗ್ಯಾರಿ ಕರ್ಸ್ಟನ್

ಹೊಸದಿಲ್ಲಿ: 2011ರಲ್ಲಿ ಏಕದಿನ ವಿಶ್ವಕಪ್ ವಿಜೇತ ಭಾರತ ತಂಡದ ರೂವಾರಿ ದಕ್ಷಿಣ ಆಫ್ರಿಕಾದ ಮಾಜಿ ಕೋಚ್ ಗ್ಯಾರಿ ಕರ್ಸ್ಟನ್, ಇದೀಗ ಭಾರತೀಯ ಮಹಿಳಾ ಕ್ರಿಕೆಟ್ ತಂಡದ ಮುಖ್ಯ ತರಬೇತುದಾರನ ಹುದ್ದೆಯ ರೇಸ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ ಎಂಬುದು ತಿಳಿದು ಬಂದಿದೆ.

ವೆಸ್ಟ್‌ಇಂಡೀಸ್ ನಡೆದ ಮಹಿಳಾ ಟ್ವೆಂಟಿ-20 ವಿಶ್ವಕಪ್‌ನಲ್ಲಿ ಸೆಮಿಫೈನಲ್‌ನಲ್ಲಿ ಭಾರತ ಮುಗ್ಗರಿಸಿತ್ತು. ಇಂಗ್ಲೆಂಡ್ ವಿರುದ್ಧ ನಡೆದ ಸೆಮಿಫೈನಲ್ ಪಂದ್ಯದಿಂದ ಹಿರಿಯ ಅನುಭವಿ ಆಟಗಾರ್ತಿ ಮಿಥಾಲಿ ರಾಜ್‌ರನ್ನು ಕೈಬಿಟ್ಟಿರುವುದು ವಿವಾದಕ್ಕೆ ಕಾರಣವಾಗಿತ್ತು.

ಇದಾದ ಬೆನ್ನಲ್ಲೇ ಕೋಚ್ ರಮೇಶ್ ಪೊವರ್ ವಿರುದ್ಧ ಮಿಥಾಲಿ ಸಿಡಿದೆದ್ದಿದ್ದರು. ಇನ್ನೊಂದೆಡೆ ಪೊವರ್‌ನ ನಾಯಕಿ ಹರ್ಮನ್ ಪ್ರೀತ್ ಕೌರ್ ಬೆಂಬಲ ಸೂಚಿಸಿತ್ತು.

ತಾತ್ಕಾಲಿಕ ಕೋಚ್ ಪೊವರ್ ಅವಧಿ ಮುಗಿದ ಬೆನ್ನಲ್ಲೇ ಬಿಸಿಸಿಐ ಹೊಸ ಕೋಚ್ ಹುಡುಕಾಟದಲ್ಲಿದೆ. ಬಲ್ಲ ಮೂಲಗಳ ಪ್ರಕಾರ ಗ್ಯಾರಿ ಕರ್ಸ್ಟನ್ ಸಹ ಅರ್ಜಿ ಸಲ್ಲಿಸಿದ್ದಾರೆ.

ಬಿಸಿಸಿಐ ಮೂಲಗಳು ಸಹ ಇದನ್ನು ಸ್ಪಷ್ಟಪಡಿಸಿದೆ. ಇನ್ನು ಸ್ವತ: ರಮೇಶ್ ಪೊವರ್, ಮನೋಜ್ ಪ್ರಭಾಕರ್, ಡೇವ್ ವಾಟ್ಮೋರ್, ಡೇವಿಡ್ ಜಾನ್ಸನ್, ಓವೈ ಶಾ, ಹರ್ಷಲ್ ಗಿಬ್ಸ್ ಇತ್ಯಾದಿ ಹೆಸರುಗಳು ಕೇಳಿಬಂದಿವೆ.