ಪಾಲಿಟಿಕ್ಸ್ ಇಲ್ಲ; ಗಂಭೀರ್ ಕಿಂಗ್ಸ್ ಮೆಂಟರ್?

ಹೊಸದಿಲ್ಲಿ: ಇದೀಗಷ್ಟೇ ಎಲ್ಲ ಪ್ರಕಾರದ ಕ್ರಿಕೆಟ್‌ಗೂ ನಿವೃತ್ತಿ ಘೋಷಿಸಿರುವ ಭಾರತದ ಎರಡು ಬಾರಿಯ ವಿಶ್ವಕಪ್ ವಿಜೇತ ತಂಡದ ಸದಸ್ಯರಾಗಿರುವ ಗೌತಮ್ ಗಂಭೀರ್, ರಾಜಕೀಯ ಅಖಾಡಕ್ಕಿಳಿಯುವುದಿಲ್ಲ ಎಂಬುದನ್ನು ಸ್ಪಷ್ಟಪಡಿಸಿದ್ದರು.

ಅದೇ ಹೊತ್ತಿಗೆ ತರಬೇತುದಾರ ಹುದ್ದೆಯಲ್ಲಿ ಗಂಭೀರ್ ಹೆಚ್ಚು ಆಸಕ್ತಿಯನ್ನು ತೋರಿದ್ದರು. ಇದಕ್ಕೆ ತಕ್ಕಂತೆ ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ (ಐಪಿಎಲ್) ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ಮೆಂಟರ್ ಹುದ್ದೆ ವಹಿಸುವ ಸಾಧ್ಯತೆಗಳು ಕಂಡುಬಂದಿದೆ.

ನಿವೃತ್ತಿ ಸಲ್ಲಿಸಿರುವ ಗಂಭೀರ್‌ಗೆ ಕಿಂಗ್ಸ್ ಇಲೆವೆನ್ ವಿಶೇಷವಾದ ಧನ್ಯವಾದಗಳನ್ನು ಸಲ್ಲಿಸಿದೆ. ಇದಕ್ಕುತ್ತರವಾಗಿ ಗಂಭೀರ್, ಶೀಘ್ರದಲ್ಲೇ ಭೇಟಿ ಮಾಡೋಣ ಎಂಬ ಉತ್ತರ ನೀಡಿದ್ದಾರೆ.

ಇದಕ್ಕೆ ಪ್ರತಿಯಾಗಿ ಕಿಂಗ್ಸ್ ತಂಡವು, ಇದು ನಮ್ಮ ಸಂತೋಷ. ಸ್ಟ್ಯಾಂಡ್‌ನಲ್ಲಿ ನಿಂತು ನಮ್ಮ ಸಿಂಹಗಳಿಗೆ ಕೈಚಪ್ಪಾಳೆ ತಟ್ಟುವುದನ್ನು ಕಾದು ನೋಡುತ್ತಿರುವುದಾಗಿ ಟ್ವೀಟ್ ಮಾಡಿದೆ.

ಕೆಲವು ಸಮಯಗಳ ಹಿಂದೆಯಷ್ಟೇ ವೀರೇಂದ್ರ ಸೆಹ್ವಾಗ್ ಮೆಂಟರ್ ಸ್ಥಾನವನ್ನು ತೊರೆದಿದ್ದರು. ಇದೀಗ ಗಂಭೀರ್ ಈ ಸ್ಥಾನಕ್ಕೆ ಆಯ್ಕೆಯಾಗುವ ಸಾಧ್ಯತೆಗಳಿವೆ.