ಬೌಂಡರಿಗಳ ಆಧಾರದಲ್ಲಿ ಗುಜರಾತ್‌ಗೆ ಜಯ

ಹೈದರಾಬಾದ್‌ : ಮುಷ್ತಾಕ್‌ ಅಲಿ ಟ್ರೋಫಿ ಟಿ20 ದೇಶಿ ಕ್ರಿಕೆಟ್‌ ಟೂರ್ನಿಯಲ್ಲಿ ಇದೇ ಮೊದಲ ಬಾರಿಗೆ ಶುಕ್ರವಾರ ಪಂದ್ಯವೊಂದರ ಫಲಿತಾಂಶಕ್ಕೆ ಬೌಂಡರಿಗಳ ಮಾನದಂಡ ಬಳಸಲಾಯಿತು.

ಅದು ಗುಜರಾತ್‌ ಮತ್ತು ರಾಜಸ್ಥಾನ ತಂಡಗಳ ನಡುವೆ ಹೈದರಾಬಾದ್‌ನಲ್ಲಿ ನಡೆದ ಪಂದ್ಯ.

ಉಭಯ ತಂಡಗಳು 20 ಓವರ್‌ಗಳಲ್ಲಿ 147 ರನ್‌ ಗಳಿಸಿದ ಪರಿಣಾಮ ಪಂದ್ಯ ಟೈ ಆಯಿತು. ಆ ನಂತರ ಫಲಿತಾಂಶಕ್ಕಾಗಿ ಸೂಪರ್‌ ಓವರ್‌ಗೆ ಮೊರೆಹೋಗಲಾಯಿತು. ಆದರೆ, ಸೂಪರ್‌ ಓವರ್‌ ಕೂಡ ಟೈ ಆಯಿತು. ಸೂಪರ್‌ ಓವರ್‌ನಲ್ಲಿ ಮೊದಲು ಬ್ಯಾಟ್‌ ಮಾಡಿದ ರಾಜಸ್ಥಾನ 2 ವಿಕೆಟ್‌ ನಷ್ಟಕ್ಕೆ 4 ರನ್‌ ಗಳಿಸಿತು. 5 ರನ್‌ಗಳ ಗುರಿ ಬೆನ್ನಟ್ಟಿದ ಗುಜರಾತ್‌ ತಂಡಕ್ಕೂ ಒಂದು ಓವರ್‌ನಲ್ಲಿ ಗಳಿಸಲು ಸಾಧ್ಯವಾಗಿದ್ದು ನಾಲ್ಕೇ ರನ್‌ (1 ವಿಕೆಟ್‌ ನಷ್ಟಕ್ಕೆ). ಹೀಗಾಗಿ ಪಂದ್ಯದಲ್ಲಿ ಒಟ್ಟಾರೆ ಗಳಿಸಿದ ಬೌಂಡರಿಗಳ ಆಧಾರದಲ್ಲಿ ಫಲಿತಾಂಶ ನಿರ್ಧರಿಸಲಾಯಿತು. ಅದರ ಪ್ರಕಾರ, 16 ಬೌಂಡರಿ ಗಳಿಸಿದ ಗುಜರಾತ್‌ ತಂಡವನ್ನು ವಿಜಯಿ ಎಂದು ಘೋಷಿಸಲಾಯಿತು. 13 ಬೌಂಡರಿ ಬಾರಿಸಿದ ರಾಜಸ್ಥಾನಕ್ಕೆ ನಿರಾಸೆಯೇ ಗತಿಯಾಯಿತು.