ಸೆಮಿಫೈನಲ್ಸ್‌ ಲೆಕ್ಕಚಾರ ಆರಂಭ

ಬೆಂಗಳೂರು: 12ನೇ ಆವೃತ್ತಿಯ ವಿಶ್ವಕಪ್‌ ಮಹಾಸಮರ 4ನೇ ವಾರಕ್ಕೆ ಕಾಲಿಟ್ಟಿದ್ದು, ಮಳೆ ಅಡಚಣೆಯ ನಡುವೆಯೂ ಟೂರ್ನಿಯ ಅರ್ಧಭಾಗ ಯಶಸ್ವಿಯಾಗಿ ಪೂರ್ಣಗೊಂಡಿದೆ. ಭಾರತ ಮತ್ತು ನ್ಯೂಜಿಲೆಂಡ್‌ ತಂಡಗಳನ್ನು ಹೊರತುಪಡಿಸಿ ಇತರ ತಂಡಗಳು 9 ಪಂದ್ಯಗಳ ಪೈಕಿ ಐದನ್ನು ಪೂರ್ಣಗೊಳಿಸಿವೆ. ಹೀಗಾಗಿ ಸೆಮಿಫೈನಲ್ಸ್‌ ಲೆಕ್ಕಾಚಾರ ಶುರುವಾಗಿದೆ.

ಹಲವು ವರ್ಷಗಳ ಬಳಿಕ 'ಲೀಗ್‌ ಸ್ಟೇಜ್‌' ಮಾದರಿಯನ್ನು ಮತ್ತೆ ಜಾರಿಗೆ ತಂದಿರುವ ಕಾರಣ ಪ್ರತಿ ತಂಡಗಳೂ ಉಪಾಂತ್ಯ ಪ್ರವೇಶಿಸಲು ಕಠಿಣ ಹೋರಾಟ ನಡೆಸಬೇಕಾಗಿದೆ. ಸದ್ಯ ಭಾರತ ಮತ್ತು ನ್ಯೂಜಿಲೆಂಡ್‌ ಟೂರ್ನಿಯಲ್ಲಿ ಸೋಲರಿಯದ ತಂಡಗಳಾಗಿದ್ದು, ಅಂಕಪಟ್ಟಿಯಲ್ಲಿ ಅಗ್ರ ನಾಲ್ಕರಲ್ಲಿ ಮುಂದುವರಿದಿವೆ. ಇವುಗಳಿಗೆ ಪೈಪೋಟಿ ಒಡ್ಡುತ್ತಿರುವ ಆಸ್ಪ್ರೇಲಿಯಾ ಮತ್ತು ಇಂಗ್ಲೆಂಡ್‌ ಸಹ ಸೆಮಿಫೈನಲ್ಸ್‌ ಸ್ಥಾನಕ್ಕಾಗಿ ತೀವ್ರ ಹೋರಾಟ ಮುಂದುವರಿಸಿವೆ.

ಕನಿಷ್ಠ ಐದು ಪಂದ್ಯಗಳಲ್ಲಿ ಜಯ ಗಳಿಸುವ ತಂಡಕ್ಕೆ ಅಗ್ರ ನಾಲ್ಕರಲ್ಲಿ ಕಾಣಿಸಿಕೊಳ್ಳುವ ಅವಕಾಶವಿದೆ. ಮಳೆಯಿಂದಾಗಿ ಕೆಲವು ಪಂದ್ಯಗಳು ರದ್ದಾಗುತ್ತಿದ್ದು, ತಂಡಗಳ ನಡುವೆ ಅಂಕ ಹಂಚಿಕೆಯಾಗುತ್ತಿದೆ. ಈಗಾಗಲೇ 4 ಪಂದ್ಯಗಳು ಮಳೆಯಿಂದ ರದ್ದಾಗಿರುವ ಹಿನ್ನೆಲೆಯಲ್ಲಿ ಕೆಲವು ತಂಡಗಳ ಮುಂದಿನ ಹಾದಿ ದುರ್ಗಮವಾಗಿದೆ. ಹೀಗಾಗಿ ಕನಿಷ್ಠ ಐದರಲ್ಲಿ ಗೆದ್ದ ತಂಡಗಳು ಮುಂದಿನ ಹಂತಕ್ಕೆ ತೇರ್ಗಡೆಯಾಗಲಿದೆ. ಸದ್ಯ ಅಂಕಪಟ್ಟಿಯಲ್ಲಿ 8 ಅಂಕಗಳೊಂದಿಗೆ ಮೊದಲ ಸ್ಥಾನದಲ್ಲಿರುವ ಆಸ್ಪ್ರೇಲಿಯಾ ಈ ಹಾದಿಯಲ್ಲಿ ಮುಂಚೂಣಿಯಲ್ಲಿದ್ದರೆ, ನಂತರದಲ್ಲಿ ನ್ಯೂಜಿಲೆಂಡ್‌, ಭಾರತ ಮತ್ತು ಇಂಗ್ಲೆಂಡ್‌ ತಂಡಗಳಿವೆ. ತಂಡಗಳ ನೆಟ್‌ ರನ್‌ರೇಟ್‌ ಕೂಡ ಧನಾತ್ಮಕವಾಗಿರುವುದು ಇದಕ್ಕೆ ಪೂರಕವಾಗಿದೆ. ತಲಾ ಐದು ಪಂದ್ಯಗಳಿಂದ ಕ್ರಮವಾಗಿ 5 ಮತ್ತು 4 ಅಂಕ ಹೊಂದಿರುವ ಬಾಂಗ್ಲಾ ಮತ್ತು ಶ್ರೀಲಂಕಾ ಸೆಮೀಸ್‌ಗೆ ಪೈಪೋಟಿ ಒಡ್ಡಿವೆ.