ದಾದಾ, ರಾಹುಲ್ ಸಾಲಿಗೆ ಸೇರಿದ ವಿಹಾರಿ

ಲಂಡನ್: ಇಂಗ್ಲೆಂಡ್ ವಿರುದ್ಧ ನಡೆಯುತ್ತಿರುವ ಐದು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಟೀಮ್ ಇಂಡಿಯಾ 3-1ರ ಅಂತರದ ಹೀನಾಯ ಸೋಲಿಗೆ ಗುರಿಯಾಗಿರಬಹುದು. ಇದರಿಂದಾಗಿ ಕೊನೆಯ ಟೆಸ್ಟ್ ಪಂದ್ಯ ಪ್ರತಿಷ್ಠೆಗಷ್ಟೇ ಸೀಮಿತಗೊಂಡಿತು.

ಆದರೆ ಅಂತಿಮ ಟೆಸ್ಟ್ ಪಂದ್ಯದಲ್ಲಿ ಭಾರತಕ್ಕೆ ಧನಾತ್ಮಕ ಅಂಶವೊಂದು ಲಭಿಸಿದೆ. ಅವರೇ ಹನುಮ ವಿಹಾರಿ. ಇಂಗ್ಲೆಂಡ್ ನೆಲದಲ್ಲಿ ಡೆಬ್ಯು ಮಾಡಿರುವ ವಿಹಾರಿ, ತಮ್ಮ ಚೊಚ್ಚಲ ಪಂದ್ಯದಲ್ಲೇ ಅರ್ಧಶತಕ ಸಾಧನೆ ಮಾಡಿದ್ದಾರೆ.

ಈ ಮೂಲಕ ಭಾರತದ ಮಾಜಿ ಯಶಸ್ವಿ ನಾಯಕರುಗಳಾದ ಸೌರವ್ ಗಂಗೂಲಿ ಹಾಗೂ ರಾಹುಲ್ ದ್ರಾವಿಡ್ ಸಾಲಿಗೆ ಸೇರಿದ್ದಾರೆ.

ಇಂಗ್ಲೆಂಡ್ ವಿರುದ್ದದ ಐದನೇ ಟೆಸ್ಟ್ ಪಂದ್ಯದಲ್ಲಿ 56 ರನ್ ಸಿಡಿಸಿರುವ 24ರ ಹರೆಯದ ಈ ಆಂಧ್ರ ಪ್ರದೇಶದ ಯುವ ಬ್ಯಾಟ್ಸ್‌ಮನ್ ಭವಿಷ್ಯದ ತಾರೆಯಾಗಿ ನಿರೀಕ್ಷೆ ಮೂಡಿಸಿದ್ದಾರೆ.

1996ರಲ್ಲಿ ಇಂಗ್ಲೆಂಡ್ ವಿರುದ್ಧ ಅವರದ್ದೇ ನೆಲದಲ್ಲಿ ಪಾದಾರ್ಪಣೆ ಮಾಡಿರುವ ಗಂಗೂಲಿ (131) ಚೊಚ್ಚಲ ಶತಕ ಸಾಧನೆ ಮಾಡಿದ್ದರು. ಇದೇ ಪಂದ್ಯದಲ್ಲಿ ದ್ರಾವಿಡ್ (95) ರನ್ ಗಳಿಸಿ ವಿಶ್ವ ಕ್ರಿಕೆಟ್‌ಗೆ ತಮ್ಮ ಸಂದೇಶವನ್ನು ಸಾರಿದ್ದರು.