ಭಾರತದ ಬೃಹತ್‌ ಮೊತ್ತಕ್ಕೆ ಹನುಮನ ಶತಕದ ಕಾಣಿಕೆ

ಬೆಂಗಳೂರು: ಹನುಮ ವಿಹಾರಿ ಅವರ ಶತಕ (138*) ಮತ್ತು ಅಂಕಿತ್‌ ಬಾವ್ನೆ (80)ಅವರ ಜವಾಬ್ದಾರಿಯುತ ಅರ್ಧಶತಕದ ಬಲದಿಂದ ಭಾರತ ‘ಎ’ ತಂಡ 2ನೇ ಅನಧಿಕೃತ ಟೆಸ್ಟ್‌ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ‘ಎ’ ತಂಡದ ವಿರುದ್ಧ ಬೃಹತ್‌ ಮೊತ್ತದತ್ತ ದಾಪುಗಾಲಿಟ್ಟಿದೆ.

ಆಲೂರಿನ ಕೆಎಸ್‌ಸಿಎ ಕ್ರಿಕೆಟ್‌ ಮೈದಾನದಲ್ಲಿ ಶುಕ್ರವಾರ ಆರಂಭವಾದ ಪಂದ್ಯದಲ್ಲಿ ಟಾಸ್‌ ಸೋತು ಮೊದಲು ಬ್ಯಾಟಿಂಗ್‌ಗೆ ಆಹ್ವಾನ ಪಡೆದ ಆತಿಥೇಯ ಶ್ರೇಯಸ್‌ ಅಯ್ಯರ್‌ ಬಳಗ ದಿನದಾಟದ ಮುಕ್ತಾಯಕ್ಕೆ 90 ಓವರ್‌ಗಳಲ್ಲಿ 4 ವಿಕೆಟ್‌ ಕಳೆದುಕೊಂಡು 322 ರನ್‌ ಕಲೆಹಾಕಿದೆ. ಶತಕವೀರ ಹನುಮ ವಿಹಾರಿ(138) ಮತ್ತು ವಿಕೆಟ್‌ ಕೀಪರ್‌ ಶ್ರೀಕರ್‌ ಭರತ್‌(30) 2ನೇ ದಿನದಾಟಕ್ಕೆ ಕ್ರೀಸ್‌ ಕಾಯ್ದುಕೊಂಡಿದ್ದಾರೆ. ಮೂರು ಬದಲಾವಣೆಗಳೊಂದಿಗೆ ಕಣಕ್ಕಿಳಿದ ಭಾರತ ತಂಡಕ್ಕೆ ಆರಂಭಿಕ ಬ್ಯಾಟ್ಸ್‌ಮನ್‌ಗಳಾದ ಪೃಥ್ವಿ ಶಾ ಮತ್ತು ಮಯಾಂಕ್‌ ಅಗರ್ವಾಲ್‌ ಭದ್ರ ಅಡಿಪಾಯ ಹಾಕುವಲ್ಲಿ ಎಡವಿದರು. ಎಂ.ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಹಿಂದಿನ ಪಂದ್ಯದಲ್ಲಿ ಶತಕಗಳೊಂದಿಗೆ ತಂಡಕ್ಕೆ ಗೆಲುವು ತಂದುಕೊಡುವಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ್ದ ಈ ಜೋಡಿ ತಂಡದ ಮೊತ್ತ 18 ರನ್‌ ಆಗುವಷ್ಟರಲ್ಲಿ ವಿಕೆಟ್‌ ಒಪ್ಪಿಸಿ ನಿರಾಸೆ ಮೂಡಿಸಿದರು.

ಹನುಮ ಶತಕದ ಸೊಬಗು
ಆರಂಭಿಕ ಆಘಾತದಿಂದ ತಂಡವನ್ನು ಪಾರು ಮಾಡುವ ಜವಾಬ್ದಾರಿ ಹೊತ್ತ ಹನುಮ ವಿಹಾರಿ ಮತ್ತು ನಾಯಕ ಶ್ರೇಯಸ್‌ ಅಯ್ಯರ್‌ ಮೂರನೇ ವಿಕೆಟ್‌ಗೆ 62 ರನ್‌ಗಳ ಜತೆಯಾಟ ನೀಡಿದರು. 54 ಎಸೆತಗಳಲ್ಲಿ 6 ಬೌಂಡರಿ ಸಹಿತ 39 ರನ್‌ ಗಳಿಸಿದ ಅಯ್ಯರ್‌, ಮುತುಸಾಮಿಗೆ ವಿಕೆಟ್‌ ಒಪ್ಪಿಸಿದರು. ನಂತರ ವಿಹಾರಿಯನ್ನು ಜತೆಗೂಡಿದ ಅಂಕಿತ್‌ ಬಾವ್ನೆ ತಾಳ್ಮೆ ಹಾಗೂ ಎಚ್ಚರಿಕೆಯ ಆಟವಾಡಿದರು. ಪ್ರವಾಸಿ ತಂಡದ ಬೌಲರ್‌ಗಳನ್ನು ಸಮರ್ಥವಾಗಿ ನಿಭಾಯಿಸಿದ ವಿಹಾರಿ ಪಂದ್ಯದ ಮೂರನೇ ಅವಧಿಯಲ್ಲಿ ಶತಕ ಪೂರೈಸಿ ಸಂಭ್ರಮಿಸಿದರು. ವಿಹಾರಿಗೆ ಉತ್ತಮ ಸಾಥ್‌ ನೀಡಿದ ಬಾವ್ನೆ ಸಹ ಅರ್ಧಶತಕ ಗಳಿಸಿ ಮಿಂಚಿದರು.

ಆದರೆ 146 ಎಸೆತಗಳಲ್ಲಿ 10 ಬೌಂಡರಿ, 1 ಸಿಕ್ಸರ್‌ ಸಹಿತ 80 ರನ್‌ ಗಳಿಸಿ ಕ್ರೀಸ್‌ನಲ್ಲಿದ್ದ ಬಾವ್ನೆ, ಪೀಟ್‌ ಎಸೆದ 74ನೇ ಓವರ್‌ನ ಕೊನೆಯ ಎಸೆತದಲ್ಲಿ ಸ್ಟಂಪ್‌ ಔಟ್‌ ಆಗಿ ನಿರಾಸೆಯಿಂದಲೇ ಪೆವಿಲಿಯನ್‌ ಸೇರಿದರು. ನಂತರ ಕ್ರೀಸ್‌ಗೆ ಬಂದ ವಿಕೆಟ್‌ ಕೀಪರ್‌ ಶ್ರೀಕರ್‌ ಭರತ್‌(30), 273 ಎಸೆತಗಳಲ್ಲಿ 13 ಬೌಂಡರಿಯೊಂದಿಗೆ ಅಜೇಯ 138 ರನ್‌ ಗಳಿಸಿರುವ ಹನುಮ ವಿಹಾರಿಯೊಂದಿಗೆ ವಿಕೆಟ್‌ ಕಾಯ್ದುಕೊಂಡಿದ್ದಾರೆ.

ಸಂಕ್ಷಿಪ್ತ ಸ್ಕೋರ್‌
ಭಾರತ ‘ಎ’: 90 ಓವರ್‌ಗಳಲ್ಲಿ 4 ವಿಕೆಟ್‌ಗೆ 322(ಹನುಮ ವಿಹಾರಿ 138*, ಅಂಕಿತ್‌ ಬಾವ್ನೆ 80, ಶ್ರೇಯಸ್‌ ಅಯ್ಯರ್‌ 39, ಶ್ರೀಕರ್‌ ಭರತ್‌; ಡೇನ್‌ ಪೀಟ್‌ 46ಕ್ಕೆ 1, ಸೆನುರಾನ್‌ ಮುತುಸಾಮಿ 51ಕ್ಕೆ 1, ಒಲಿವರ್‌ 54ಕ್ಕೆ 1).