ಹಾರ್ದಿಕ್ ಪಾಂಡ್ಯ-ಪರಿಣಿತಿ ಚೋಪ್ರಾ ಡೇಟಿಂಗ್ ?

ಹೊಸದಿಲ್ಲಿ: ಭಾರತೀಯ ಕ್ರಿಕೆಟ್ ತಂಡಕ್ಕೆ ಕಾಲಿರಿಸಿದ ಅತ್ಯಲ್ಪ ಅವಧಿಯಲ್ಲಿ ಆಲ್‌ರೌಂಡರ್ ಹಾರ್ದಿಕ್ ಪಾಂಡ್ಯ ಅತ್ಯಂತ ಹೆಚ್ಚು ಗಮನ ಸೆಳೆದಿದ್ದಾರೆ. ಹೊಸ ಹೊಸ ಹೇರ್ ಸ್ಟೈಲ್‌ಗಳ ಮೂಲಕ ಗಮನ ಸೆಳೆಯುತ್ತಿರುವ ಪಾಂಡ್ಯ ಯುವ ಕ್ರಿಕೆಟಿಗರ ಪೈಕಿ ಹೆಚ್ಚು ಸುದ್ದಿ ಮಾಡಿದ್ದಾರೆ.

ಕ್ರಿಕೆಟ್ ಮೈದಾನದ ಹೊರಗೂ ಪಾಂಡ್ಯ ಸುದ್ದಿಯಾಗುತ್ತಿದ್ದಾರೆ. ಇತ್ತೀಚೆಗಷ್ಟೇ ಬಾಲಿವುಡ್ ನಟಿ ಪರಿಣಿತಿ ಚೋಪ್ರಾ ಜೊತೆಗಿನ ಸಂಬಂಧದ ಬಗ್ಗೆ ಸಾಕಷ್ಟು ಗಾಸಿಪ್ ಹರಡಲು ಕಾರಣವಾಗಿತ್ತು.

ಪಾರ್ದಿಕ್ ಪಾಂಡ್ಯ ಮತ್ತು ಪರಿಣಿತಿ ಚೋಪ್ರಾ ಪರಸ್ಪರ ಡೇಟಿಂಗ್ ಮಾಡಿಕೊಳ್ಳುತ್ತಿದ್ದಾರೆ ಎಂಬುದರ ಬಗ್ಗೆಯೂ ವದಂತಿ ಹರಡಿತ್ತು.

ಪ್ರಸ್ತುತ ಈ ಎಲ್ಲ ಊಹಾಪೋಹಾಗಳಿಗೆ ತೆರೆ ಎಳೆದಿರುವ ಪಾಂಡ್ಯ, ತಮ್ಮಿಬ್ಬರ ನಡುವೆ ಇಂತಹ ಯಾವುದೇ ಸಂಬಂಧಗಳು ನಡೆದಿಲ್ಲ ಎಂದಿದ್ದಾರೆ.

ನನ್ನ ನೋಡಿದಾಗ ನಾನು ಎಲ್ಲವನ್ನೂ ಮಾಡಿದ ವ್ಯಕ್ತಿಯಂತೆ ಕಾಣಿಸಬಹುದು. ಆದರೆ ದಿನದ ಅಂತ್ಯದಲ್ಲಿ ನಾನು ಏನೂ ಮಾಡದ ವ್ಯಕ್ತಿಯಾಗಿದ್ದೇನೆ. ನಾನೋರ್ವ ಅಶಿಸ್ತಿನಿಂದ ವರ್ತಿಸುವ ಪಾರ್ಟಿ ವ್ಯಕ್ತಿಯಂತೆ ಗೋಚರಿಸಬಹುದು. ಆದರೆ ವಾಸ್ತವಾಂಶ ಏನೆಂದರೆ ಆಟದ ಮೇಲೆ ಯಾವಾಗಲೂ ಗಮನ ಹರಿಸುತ್ತಿದ್ದೇನೆ ಎಂದಿದ್ದಾರೆ.

ಇತ್ತೀಚೆಗಿನ ಪರಿಣಿತಿ ವಿಷಯದ ಬಗ್ಗೆ ಬಹಿರಂಗವಾಗಿಯೇ ಮಾತನಾಡಿದ ಪಾಂಡ್ಯ, ಇವೆಲ್ಲವೂ ಮಾರ್ಕೆಟಿಂಗ್ ಗಿಮಿಕ್ ಆಗಿದ್ದು, ಈ ಎಲ್ಲ ಘಟನೆಗಳ ಬಗ್ಗೆ ನನಗೆ ತಿಳಿದಿಲ್ಲ ಎಂದರು.

ಪರಿಣಿತಿ ಯಾರೆಂದು ನನಗೆ ಚೆನ್ನಾಗಿ ಗೊತ್ತಿಲ್ಲ. ನಾವಿಬ್ಬರೂ ಹಿಂದೆಂದೂ ಮಾತನಾಡಿಲ್ಲ. ಆದರೆ ಏಕಾಏಕಿ ಟ್ವಿಟರ್‌ನಲ್ಲಿ ನಮ್ಮಿಬ್ಬರ ನಡುವಣ ಪ್ರೀತಿಯ ಬಗ್ಗೆ ಸಂಭಾಷಣೆ ಆರಂಭವಾಗಿದೆ. ನಾನು ಶ್ರೀಲಂಕಾ ಸರಣಿಯಲ್ಲಿ ತಲ್ಲೀನವಾಗಿದ್ದೆ. ಅಂದು ಬೆಳಗ್ಗೆ ನಿದ್ದೆ ಮಾಡುತ್ತಿದ್ದೆ. ಆ ಬಳಿಕವಷ್ಟೇ ಈ ಎಲ್ಲ ವಿಚಾರಗಳ ಬಗ್ಗೆ ಅರಿವಿಗೆ ಬಂತು. ನನ್ನನ್ನು ಸಂಬಂಧ ಕಲ್ಪಿಸುವ ಇಂತಹ ವಿಚಾರಗಳ ಬಗ್ಗೆ ಪ್ರತಿಕ್ರಿಯೆ ನೀಡಲು ಇಚ್ಛಿಸುವುದಿಲ್ಲ ಎಂದಿದ್ದಾರೆ.