ತಿಂಗಳಿಗೆ 10 ಲಕ್ಷ ರೂ. ಪರಿಹಾರ ಕೇಳಿದ ಶಮಿ ಪತ್ನಿ

ಕೋಲ್ಕತ್ತಾ: ಭಾರತೀಯ ಕ್ರಿಕೆಟ್ ತಂಡದ ವೇಗದ ಬೌಲರ್ ಮೊಹಮ್ಮದ್ ಶಮಿ ವಿರುದ್ಧ ಕೌಟುಂಬಿಕ ದೌರ್ಜನ್ಯ ಸಂಬಂಧ ಪ್ರಕರಣ ದಾಖಲಿಸಿಕೊಂಡಿರುವ ಪತ್ನಿ ಹಸೀನ್ ಜಾಹನ್, ಇದೀಗ ಮಾಸಿಕ 10 ಲಕ್ಷ ರೂ.ಗಳ ಪರಿಹಾರವನ್ನು ನೀಡುವಂತೆ ಕೇಳಿಕೊಂಡಿದ್ದಾರೆ.

ಅಲಿಪೋರ್ ನ್ಯಾಯಾಲಯದಲ್ಲಿ ಕೇಸಿನ ವಿಚಾರಣೆ ಪ್ರಗತಿಯಲ್ಲಿದ್ದು, ತನಗೆ ಹಾಗೂ ಮಗುವಿಗಾಗಿ ತಿಂಗಳಲ್ಲಿ 10 ಲಕ್ಷ ರೂ. ಪರಿಹಾರ ನೀಡುವಂತೆ ಆಗ್ರಹಿಸಿದ್ದಾರೆ.

ಪ್ರಸ್ತುತ ಪ್ರಕರಣದ ವಿಚಾರಣೆಯನ್ನು ಮೇ 4ಕ್ಕೆ ಮುಂದೂಡಲಾಗಿದೆ. ಪತಿ ಮೊಹಮ್ಮದ್ ಶಮಿ ಜತೆಗೆ ಆತನ ತಾಯಿ, ಹಿರಿಯ ಸದೋದರ, ಸಹೋದರಿ ಹಾಗೂ ನಾದಿನಿಯ ವಿರುದ್ಧ ಕೌಟುಂಬಿಕ ದೌರ್ಜನ್ಯದ ದೂರನ್ನು ದಾಖಲಿಸಿಕೊಂಡಿದ್ದರು.

ವಾದ ಮಂಡಿಸಿರುವ ಜಹಾನ್ ವಕೀಲ, ಕ್ರಿಕೆಟಿಗ ಶಮಿ ವರ್ಷದಲ್ಲಿ 100 ಕೋಟಿ ರೂ.ಗಿಂತಲೂ ಹೆಚ್ಚು ಸಂಭಾವನೆ ಪಡೆಯುತ್ತಿದ್ದು, ಹಾಗಾಗಿ ಮಾಸಿಕ ಖರ್ಚಿಗಾಗಿ ಪತ್ನಿಗೆ ಏಳು ಲಕ್ಷ ರೂ. ಹಾಗೂ ಮಗಳಿಗೆ 3 ಲಕ್ಷ ರೂ. ನೀಡಲು ಕಷ್ಟಕರವಾಗದು ಎಂದಿದ್ದಾರೆ.