ಆ್ಯಂಟಿಗುವಾ: ಪ್ರವಾಸಿ ಭಾರತ ವಿರುದ್ಧದ ಐದು ಪಂದ್ಯಗಳ ಏಕದಿನ ಸರಣಿಯ ಕೊನೆಯ ಮೂರು ಪಂದ್ಯಗಳಿಗೆ ಪ್ರಕಟಿಸಲಾಗಿರುವ ವೆಸ್ಟ್‌ ಇಂಡೀಸ್‌ ತಂಡದಲ್ಲಿ ಕೈಲ್‌ ಹೋಪ್‌ ಮತ್ತು ಸುನಿಲ್‌ ಆ್ಯಂಬ್ರಿಸ್‌ ಸ್ಥಾನ ಪಡೆದಿದ್ದಾರೆ.
ಇದರೊಂದಿಗೆ 13 ಸದಸ್ಯರ ತಂಡದಲ್ಲಿ ಜೊನಾಥನ್‌ ಕಾರ್ಟರ್‌ ಹಾಗೂ ಕೆಸ್ರಿಕ್‌ ವಿಲಿಯನ್ಸ್‌ ಸ್ಥಾನ ಕಳೆದುಕೊಂಡಿದ್ದಾರೆ. ಸರಣಿಯಲ್ಲಿ ಭಾರತ ಈಗಾಗಲೇ 1-0 ಮುನ್ನಡೆಯಲ್ಲಿದ್ದು 3ನೇ ಪಂದ್ಯ ಶುಕ್ರವಾರ ಆ್ಯಂಟಿಗುವಾದಲ್ಲಿ ನಡೆಯಲಿದೆ. 28 ವರ್ಷದ ಬಲಗೈ ಬ್ಯಾಟ್ಸ್‌ಮನ್‌ ಕೈಲ್‌ ಹೋಪ್‌, ವಿಂಡೀಸ್‌ ವಿಕೆಟ್‌ ಕೀಪರ್‌ ಶಾಯ್‌ ಹೋಪ್‌ ಅವರ ಹಿರಿಯ ಸಹೋದರನಾಗಿದ್ದು, ಇದೇ ಮೊದಲ ಬಾರಿ ರಾಷ್ಟ್ರೀಯ ತಂಡಕ್ಕೆ ಆಯ್ಕೆಯಾಗಿದ್ದಾರೆ. 24 ವರ್ಷದ ಸುನಿಲ್‌ ಆ್ಯಂಬ್ರಿಸ್‌ ಬಲಗೈ ಆರಂಭಿಕ ಬ್ಯಾಟ್ಸ್‌ಮನ್‌ ಆಗಿದ್ದಾರೆ.
''ಸುನಿಲ್‌ ಮತ್ತು ಕೈಲ್‌ ಭರವಸೆಯ ಯುವ ಬ್ಯಾಟ್ಸ್‌ಮನ್‌ಗಳಾಗಿದ್ದು, ದೇಶೀಯ ಟೂರ್ನಿಗಳಲ್ಲಿ ತೋರಿದ ಉತ್ತಮ ಪ್ರದರ್ಶನದ ಆಧಾರದಲ್ಲಿ ತಂಡದಲ್ಲಿ ಸ್ಥಾನ ಪಡೆದಿದ್ದಾರೆ,'' ಎಂದು ವೆಸ್ಟ್‌ ಇಂಡೀಸ್‌ ಕ್ರಿಕೆಟ್‌ ಮಂಡಳಿಯ ಆಯ್ಕೆ ಸಮಿತಿಯ ಮುಖ್ಯಸ್ಥ ಕಟ್ರ್ನಿ ಬ್ರೌನ್‌ ತಿಳಿಸಿದ್ದಾರೆ.
ವೆಸ್ಟ್‌ ಇಂಡೀಸ್‌ ತಂಡ: ಜೇಸನ್‌ ಹೋಲ್ಡರ್‌(ನಾಯಕ), ಸುನಿಲ್‌ ಆ್ಯಂಬ್ರಿಸ್‌, ದೇವೇಂದ್ರ ಬಿಶೂ, ರಾಸ್ಟನ್‌ ಚೇಸ್‌, ಮಿಗ್ಯುಯೆಲ್‌ ಕಮಿನ್ಸ್‌, ಕೈಲ್‌ ಹೋಪ್‌, ಶಾಯ್‌ ಹೋಪ್‌, ಅಲ್ಜಾರಿ ಜೋಸೆಫ್‌, ಎವಿನ್‌ ಲೆವಿಸ್‌, ಜೇಸನ್‌ ಮೊಹಮ್ಮದ್‌, ಆ್ಯಶ್ಲೆ ನರ್ಸ್‌, ಕೀರನ್‌ ಪೊವೆಲ್‌, ರೊವ್‌ಮನ್‌ ಪೊವೆಲ್‌.