ಅಖ್ತರ್‌ ಬೆಂಬಿಡದೆ ಕಾಡುತ್ತಿರುವ ಭಾರತ ವಿರುದ್ಧದ ವಿಶ್ವಕಪ್ ಸೋಲು!

ಹೊಸದಿಲ್ಲಿ: ಇದುವರೆಗಿನ ಏಕದಿನ ವಿಶ್ವಕಪ್‌ ಇತಿಹಾಸದಲ್ಲಿ ಪಾಕಿಸ್ತಾನ ವಿರುದ್ಧ ಎಲ್ಲ ಏಳು ಪಂದ್ಯಗಳಲ್ಲಿ ಭಾರತ ಗೆಲುವುಗಳನ್ನು ದಾಖಲಿಸಿದೆ. ಈ ನಡುವೆ 2003 ಹಾಗೂ 1993ರ ಏಕದಿನ ವಿಶ್ವಕಪ್‌ನಲ್ಲಿ ಭಾರತ ವಿರುದ್ಧ ಸೋಲು ತಮ್ಮ ಕ್ರೀಡಾ ಜೀವನದಲ್ಲಿ ಎದುರಾದ ಅತ್ಯಂತ ಕೆಟ್ಟ ಅನುಭವವಾಗಿದೆ ಎಂದು ರಾವಿಲ್ಪಿಂಡಿ ಎಕ್ಸ್‌ಪ್ರೆಸ್ ಖ್ಯಾತಿ ಪಾಕಿಸ್ತಾದ ಮಾಜಿ ವೇಗಿ ಶೋಯಿಬ್ ಅಖ್ತರ್ ಅಭಿಪ್ರಾಯಪಟ್ಟಿದ್ದಾರೆ.

2003ರಲ್ಲಿ 274 ರನ್ ಪೇರಿಸಿಯೂ ಪಾಕ್‌ಗೆ ಗೆಲುವು ದಾಖಲಿಲ್ಲ. ತಮಗೆ ಎದುರಾದ ಫಿಟ್ನೆಸ್ ಸಮಸ್ಯೆ ಹಾಗೂ ಮಾಜಿ ನಾಯಕ ವಖಾರ್ ಯೂನಿಸ್ ಕೆಟ್ಟ ನಾಯಕತ್ವದಿಂದ ಪಾಕ್‌ಗೆ ಸೋಲು ಎದುರಾಗಿತ್ತು ಎಂದು ಅಖ್ತರ್ ನೆನಪಿಸಿಕೊಂಡಿದ್ದಾರೆ.

2003ರಲ್ಲಿ ಸೆಂಚುರಿಯನ್‌ನಲ್ಲಿ ಭಾರತ ವಿರುದ್ಧ ವಿಶ್ವಕಪ್ ಪಂದ್ಯ ತಮ್ಮ ವೃತ್ತಿ ಜೀವನದ ಅತ್ಯಂತ ನಿರಾಶದಾಯಕ ಪಂದ್ಯವಾಗಿದೆ. ಎಡ ಮೊಣಕಾಲಿಗೆ ನಾಲ್ಕೈದು ಇಂಜೆಕ್ಷನ್ ತೆಗೆದುಕೊಂಡಿದ್ದರಿಂದ ನಿಶ್ಚಲಗೊಂಡಿತ್ತು. ಪರಿಣಾಮ ತಮ್ಮ ಸಾಮರ್ಥ್ಯಕ್ಕೆ ತಕ್ಕ ಬೌಲಿಂಗ್ ಮಾಡಲು ಸಾಧ್ಯವಾಗಲಿಲ್ಲ ಎಂದರು.

ಉತ್ತಮ ಬ್ಯಾಟಿಂಗ್ ಪಿಚ್ ಆಗಿದ್ದರಿಂದ ಮೊದಲ ಇನ್ನಿಂಗ್ಸ್ ಕೊನೆಯಲ್ಲಿ ಇನ್ನು ಹೆಚ್ಚು 40 ರನ್ ಪೇರಿಸಬೇಕಿತ್ತು ಎಂದು ನಾನು ತಂಡದಲ್ಲಿ ಹೇಳಿದ್ದೆ. ಆದರೆ ಭಾರತವನ್ನು ಆಲೌಟ್ ಮಾಡಬಹುದು ಎಂದು ಎಲ್ಲರೂ ಹೇಳಿದ್ದರು ಎಂದರು.

ನಾನು ಬೌಲಿಂಗ್ ಆರಂಭಿಸಿದಾಗ ಎಡ ಮೊಣಕಾಲು ನಿಶ್ಚಲಗೊಂಡಿತ್ತು. ಇದರಿಂದ ಬೌಲಿಂಗ್ ರನಪ್ ಸರಿಯಾಗಿ ಪಡೆಯಲು ಸಾಧ್ಯವಾಗುತ್ತಿರಲಿಲ್ಲ. ಸಚಿನ್ ಹಾಗೂ ಸೆಹ್ವಾಗ್ ಅತ್ಯುತ್ತಮವಾಗಿ ಆಡಿದರು. ಹೇಗೆ ಔಟ್ ಮಾಡಬೇಕೆಂದು ತಿಳಿಯುತ್ತಿರಲಿಲ್ಲ. ದುರದೃಷ್ಟವಶಾತ್ ನಾಯಕ ವಕಾರ್ ಯೂನಿಸ್ ತಮ್ಮನ್ನು ಬೌಲಿಂಗ್‌ನಿಂದ ಬದಲಾಯಿಸಿದರು. ಬಳಿಕ ಹಿಂತಿರುಗಿಸಿದಾಗ 98 ರನ್ ಗಳಿಸಿದ್ದ ಸಚಿನ್ ವಿಕೆಟ್ ಪಡೆದಿದ್ದೆ. ಬಳಿಕ ನಾಯಕರಲ್ಲಿ ನನ್ನು ಆರಂಭದಲ್ಲೇ ಮುಂದುವರಿಸಬೇಕಿತ್ತು ಎಂದು ಹೇಳಿರುವುದಾಗಿ ಅಖ್ತರ್ ನೆನಪಿಸಿಕೊಂಡಿದ್ದಾರೆ.

ಭಾರತ ವಿರುದ್ಧ ಸೋಲು ಈಗಲೂ ಕಾಡುತ್ತಿದೆ. ಸೋಲಿನ ಬಗ್ಗೆ ಈಗಲೂ ನಿರಾಸೆಯಿದೆ. ಇನ್ನು ಸ್ವಲ್ಪ ಹೆಚ್ಚು ರನ್ ಗಳಿಸಿ ಉತ್ತಮವಾಗಿ ಬೌಲಿಂಗ್ ಮಾಡಿ ಪಂದ್ಯ ಗೆಲ್ಲಬಹುದಿತ್ತು. ಆದರೆ ದುರದೃಷ್ಟವಶಾತ್ ನನ್ನ ಫಿಟ್ನೆಸ್ ಹಾಗೂ ಕೆಟ್ಟ ನಾಯಕತ್ವದಿಂದ ಸೋಲಬೇಕಾಯಿತು ಎಂದರು.