ಪ್ಯಾರಿಸ್: ಐದು ಬಾರಿ ವರ್ಷದ ಐಎಎಎಫ್ ವಿಶ್ವ ಅಥ್ಲೀಟ್ ಗೌರವ ಸಂಪಾದಿಸಿರುವ ಜಮೈಕಾದ ಉಸೇನ್ ಬೋಲ್ಟ್, ಪ್ರಸಕ್ತ ಸಾಲಿನ ಐಎಎಎಫ್ ವಿಶ್ವ ಅಥ್ಲೀಟ್ ಪ್ರಶಸ್ತಿಗೆ ಸಿದ್ಧಗೊಂಡಿರುವ ಅಂತಿಮ ಪಟ್ಟಿಯಲ್ಲಿ ರಿಯೊ ಒಲಿಂಪಿಕ್ಸ್ ಚಿನ್ನದ ಪದಕ ವಿಜೇತೆ ಥಾಂಪ್ಸನ್ ಜತೆ ಸ್ಥಾನ ಗಳಿಸಿದ್ದಾರೆ.
ಹೋದ ಆಗಸ್ಟ್ನಲ್ಲಿ ಬ್ರೆಜಿಲ್ನ ರಿಯೊ ಡಿ ಜನೈರೊದಲ್ಲಿ ನಡೆದ ಒಲಿಂಪಿಕ್ಸ್ನ ಪುರುಷರ 100 ಮತ್ತು 200 ಮೀಟರ್ ಓಟದಲ್ಲಿ ಸ್ವರ್ಣ ಗೆದ್ದಿರುವ ಬೋಲ್ಟ್ , ಒಲಿಂಪಿಕ್ಸ್ನಲ್ಲಿ ಸತತ ಮೂರು ಬಾರಿ ಚಿನ್ನ ಗೆದ್ದ ಮೊದಲ ಓಟಗಾರ ಎಂಬ ಹಿರಿಮೆಗೆ ಪಾತ್ರರಾಗಿದ್ದಾರೆ. ಈ ವೇಳೆ 100 ಮತ್ತು 200ಮೀ. ಸ್ಪರ್ಧೆಯಲ್ಲಿ ಕ್ರಮವಾಗಿ 9.58 ಮತ್ತು 19.19ಸೆಕೆಂಡ್ಗಳಲ್ಲಿ ಗುರಿ ತಲುಪಿದ ದಾಖಲೆ ಹೊಂದಿದ್ದಾರೆ.
ಇವರಲ್ಲದೆ 5000 ಮತ್ತು 10,000 ಮೀಟರ್ ಒಲಿಂಪಿಕ್ ಚಾಂಪಿಯನ್ ಬ್ರಿಟನ್ನಿನ ಮೊ ಫರ್ಹಾ ಮತ್ತು ದಕ್ಷಿಣ ಆಫ್ರಿಕಾದ 400ಮೀ. ಒಲಿಂಪಿಕ್ ಚಾಂಪಿಯನ್ ವಾಯ್ದೆ ವಾನ್ ನೀಕೆರ್ಕ್ ಪುರುಷರ ಪಟ್ಟಿಯಲ್ಲಿದ್ದಾರೆ.
ರಿಯೊ ಒಲಿಂಪಿಕ್ಸ್ನ ಮಹಿಳಾ ವಿಭಾಗದಲ್ಲಿ 100 ಮತ್ತು 200ಮೀ. ವಿಭಾಗದಲ್ಲಿ ಬಂಗಾರ ಗೆದ್ದಿರುವ ಮೈಕಾದವರೇ ಆದ ಎಲಿಯೆನಾ ಥಾಂಪ್ಸನ್ ಮಹಿಳೆಯರ ಅಂತಿಮ ಪಟ್ಟಿಯಲ್ಲಿ ಸ್ಥಾನ ಗಿಟ್ಟಿಸಿದ್ದು, ಪ್ರಶಸ್ತಿ ಗೆಲ್ಲುವ ಫೇವರಿಟ್ ಎನಿಸಿದ್ದಾರೆ. ಮುಂದಿನ ತಿಂಗಳು ಐಎಎಎಫ್ ವಿಜೇತರನ್ನು ಘೋಷಿಸಲಿದೆ.