ಟಾಪ್ 10 ಪಟ್ಟಿಗೆ ಲಗ್ಗೆಯಿಟ್ಟ ರೋಹಿತ್ ಶರ್ಮಾ; ಅಜಿಂಕ್ಯ ರಹಾನೆ ನಂ.5

ದುಬೈ: ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ) ಬಿಡುಗಡೆ ಮಾಡಿರುವ ತಾಜಾ ಟೆಸ್ಟ್ ಬ್ಯಾಟಿಂಗ್ ರ‍್ಯಾಂಕಿಂಗ್ ಪಟ್ಟಿಯಲ್ಲಿ ಟೀಮ್ ಇಂಡಿಯಾ ಬಲಗೈ ಓಪನರ್ ರೋಹಿತ್ ಶರ್ಮಾ ಟಾಪ್ 10 ಪಟ್ಟಿಗೆ ಲಗ್ಗೆಯಿಟ್ಟಿದ್ದಾರೆ.

ಭರ್ಜರಿ 12 ಸ್ಥಾನಗಳ ನೆಗೆತ ಕಂಡಿರುವ ರೋಹಿತ್ ಶರ್ಮಾ ಇದೇ ಮೊದಲ ಬಾರಿಗೆ ರೋಹಿತ್ ಶರ್ಮಾ ಅಗ್ರ 10ರೊಳಗೆ ಪ್ರವೇಶಿಸಿದ್ದಾರೆ. ಒಟ್ಟು 722 ರೇಟಿಂಗ್ ಅಂಕಗಳನ್ನು ರೋಹಿತ್ ಕಲೆ ಹಾಕಿದ್ದಾರೆ. ಈ ಮೂಲಕ ಜೀವನಶ್ರೇಷ್ಠ ರ‍್ಯಾಂಕಿಂಗ್ ಕಂಡಿದ್ದಾರೆ.

ಇದೀಗ ಅಧಿಕೃತ; ಬಿಸಿಸಿಐಯಲ್ಲಿ ದಾದಾಗಿರಿ ಆರಂಭ; ನೂತನ ಅಧ್ಯಕ್ಷ ಪದವಿ ವಹಿಸಿದ ಸೌರವ್ ಗಂಗೂಲಿ!

ದಕ್ಷಿಣ ಆಫ್ರಿಕಾ ವಿರುದ್ಧ ನಡೆದ ಮೂರು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ರೋಹಿತ್ ಶರ್ಮಾ 132.25ರ ಸರಾಸರಿಯಲ್ಲಿ 529 ರನ್ ಪೇರಿಸಿದ್ದರು. ಇದರಲ್ಲಿ ಎರಡು ಶತಕ ಹಾಗೂ ಚೊಚ್ಚಲ ದ್ವಿಶತಕವು ಸೇರಿದೆ.

ಇನ್ನೊಂದೆಡೆ ರಾಂಚಿ ಟೆಸ್ಟ್ ಪಂದ್ಯದಲ್ಲಿ ಅಮೋಘ ಶತಕ ಸಾಧನೆ ಮಾಡಿರುವ ಉಪನಾಯಕ ಅಜಿಂಕ್ಯ ರಹಾನೆ ನಾಲ್ಕು ಸ್ಥಾನಗಳ ಬಡ್ತಿ ಪಡೆದು 5ನೇ ಸ್ಥಾನಕ್ಕೆ ಲಗ್ಗೆಯಿಟ್ಟಿದ್ದಾರೆ.

ವೆಜಿಟೇರಿಯನ್ ಆದ ಮೇಲೆ ವಿರಾಟ್ ಕೊಹ್ಲಿ ಜೀವನ ಹೇಗೆ ಬದಲಾಯಿತು?

ಅತ್ತ ನಾಯಕ ವಿರಾಟ್ ಕೊಹ್ಲಿ ನಂ.2 ಸ್ಥಾನವನ್ನು ಕಾಯ್ದುಕೊಂಡರೂ ರೇಟಿಂಗ್‌ನಲ್ಲಿ ಅಲ್ಪ ಇಳಿಕೆ ಕಂಡಿದ್ದಾರೆ. ದ್ವಿತೀಯ ಪಂದ್ಯದಲ್ಲಿ ಅಮೋಘ ದ್ವಿಶತಕ ಸಿಡಿಸಿರುವ ವಿರಾಟ್ ಕೊಹ್ಲಿ ಅಗ್ರಸ್ಥಾನದಲ್ಲಿರುವ ಆಸ್ಟ್ರೇಲಿಯಾದ ಮಾಜಿ ನಾಯಕ ಸ್ಟೀವ್ ಸ್ಮಿತ್ ಸನಿಹಕ್ಕೆ ತಲುಪಿದ್ದರು. ಅಲ್ಲದೆ ಸ್ಮಿತ್ ಓವರ್‌ಟೇಕ್ ಮಾಡಲು ಕೇವಲ ಎರಡು ರೇಟಿಂಗ್ ಅಂಕಗಳ ಅವಶ್ಯಕತೆಯಿತ್ತು. ಆದರೆ ರಾಂಚಿ ಟೆಸ್ಟ್‌ನಲ್ಲಿ ವಿಫಲಗೊಳ್ಳುವದರೊಂದಿಗೆ 10 ರೇಟಿಂಗ್ ಅಂಕಗಳ ಇಳಿಕೆ ಕಂಡಿರುವ ವಿರಾಟ್ ಕೊಹ್ಲಿ 926ಕ್ಕೆ ತಲುಪಿದ್ದಾರೆ.

ಅತ್ತ ಚೇತೇಶ್ವರ ಪೂಜಾರ ನಾಲ್ಕನೇ ಸ್ಥಾನವನ್ನು ಭದ್ರವಾಗಿಸಿದ್ದಾರೆ. ಇದರೊಂದಿಗೆ ಟಾಪ್ 10 ಪಟ್ಟಿಯಲ್ಲಿ ಭಾರತದ ನಾಲ್ವರು ಬ್ಯಾಟ್ಸ್‌ಮನ್‌ಗಳು ಗುರುತಿಸಿಕೊಂಡಿದ್ದಾರೆ.

ತಾಜಾ ಟೆಸ್ಟ್ ಬ್ಯಾಟಿಂಗ್ ರ‍್ಯಾಂಕಿಂಗ್ ಪಟ್ಟಿ ಇಂತಿದೆ:
1. ಸ್ಟೀವ್ ಸ್ಮಿತ್ (ಆಸ್ಟ್ರೇಲಿಯಾ): 937
2. ವಿರಾಟ್ ಕೊಹ್ಲಿ(ಭಾರತ): 926
3. ಕೇನ್ ವಿಲಿಯಮ್ಸನ್(ನ್ಯೂಜಿಲೆಂಡ್): 878
4. ಚೇತೇಶ್ವರ ಪೂಜಾರ (ಭಾರತ): 795
5. ಅಜಿಂಕ್ಯ ರಹಾನೆ (ಭಾರತ): 751
6. ಹೆನ್ರಿ ನಿಕೋಲಸ್ (ನ್ಯೂಜಿಲೆಂಡ್): 749
7. ಜೋ ರೂಟ್ (ಇಂಗ್ಲೆಂಡ್): 731
8. ಟಾಮ್ ಲ್ಯಾಥಮ್ (ನ್ಯೂಜಿಲೆಂಡ್): 724
9. ದಿಮುತ್ ಕರುಣಾರತ್ನೆ (ಶ್ರೀಲಂಕಾ): 723
10. ರೋಹಿತ್ ಶರ್ಮಾ (ಭಾರತ): 722

ಭಾರತ-ದ.ಆಫ್ರಿಕಾ 27 ವರ್ಷಗಳ ಟೆಸ್ಟ್ ಇತಿಹಾಸದಲ್ಲೇ ಸ್ಮರಣೀಯ ದಾಖಲೆ ಬರೆದ ರೋಹಿತ್ ಶರ್ಮಾ!

ಇನ್ನು ಬೌಲಿಂಗ್ ವಿಭಾಗದಲ್ಲಿ ಟಾಪ್ 10 ಪಟ್ಟಿಯಲ್ಲಿರುವ ಜಸ್ಪ್ರೀತ್ ಬುಮ್ರಾ ನಾಲ್ಕು ಹಾಗೂ ರವಿಚಂದ್ರನ್ ಅಶ್ವಿನ್ 10ನೇ ಸ್ಥಾನಕ್ಕೆ ಕುಸಿತ ಕಂಡಿದ್ದಾರೆ. ಈ ವಿಭಾಗವನ್ನು ಆಸ್ಟ್ರೇಲಿಯಾದ ಪ್ಯಾಟ್ ಕಮಿನ್ಸ್ ಮುನ್ನಡೆಸುತ್ತಿದ್ದು, ದಕ್ಷಿಣ ಆಫ್ರಿಕಾದ ಕಗಿಸೋ ರಬಡ ಎರಡನೇ ಸ್ಥಾನದಲ್ಲಿದ್ದಾರೆ.

ಏತನ್ಮಧ್ಯೆ ಟೆಸ್ಟ್ ಆಲ್‌ರೌಂಡರ್‌ಗಳ ಪಟ್ಟಿಯನ್ನು ವೆಸ್ಟ್‌ಇಂಡೀಸ್‌ನ ಜೇಸನ್ ಹೋಲ್ಡರ್ ಮುನ್ನಡೆಸುತ್ತಿದ್ದು, ರವಿಚಂದ್ರನ್ ಜಡೇಜಾ ಎರಡು ಹಾಗೂ ರವಿಚಂದ್ರನ್ ಅಶ್ವಿನ್ ಆರನೇ ಸ್ಥಾನದಲ್ಲಿದ್ದಾರೆ.