ರೂಲ್ಸ್, ರೂಲ್ಸ್, ರೂಲ್ಸ್; ಭಾರತದ ಗೆಲುವು ವಿಳಂಬ

ಸೆಂಚುರಿಯನ್: ದಕ್ಷಿಣ ಆಫ್ರಿಕಾ ವಿರುದ್ಧ ಸಾಗುತ್ತಿರುವ ದ್ವಿತೀಯ ಏಕದಿನ ಪಂದ್ಯದಲ್ಲಿ ಅಂತರಾಷ್ಟ್ರೀಯ ಕ್ರಿಕೆಟ್ ಮಂಡಳಿಯ (ಐಸಿಸಿ) ವಿಚಿತ್ರ ನಿಯಮದಿಂದಾಗಿ ಭಾರತದ ಗೆಲುವು ವಿಳಂಬಗೊಂಡಿದೆ.

ಗೆಲುವಿಗಾಗಿ 119 ರನ್ ಬೆನ್ನತ್ತಿದ ಭಾರತ ತಂಡವು 19 ಓವರ್‌ಗಳಲ್ಲಿ ಒಂದು ವಿಕೆಟ್ ನಷ್ಟಕ್ಕೆ 117 ರನ್ ಗಳಿಸಿದ್ದಾಗ ಅಂಪೈರ್‌ಗಳು ಊಟದ ವಿರಾಮವನ್ನು ತೆಗೆದುಕೊಳ್ಳಲು ನಿರ್ಧರಿಸಿದ್ದರು.

ಈ ಮೊದಲು ಭಾರತವು ವಿಜಯದ ಸನಿಹ ತಲುಪಿದ್ದರ ಹಿನ್ನಲೆಯಲ್ಲಿ ಪಂದ್ಯವನ್ನು ಅರ್ಧ ತಾಸುಗಳಷ್ಟು ಮುಂದುವರಿಸಲು ನಿರ್ಧರಿಸಲಾಗಿತ್ತು. ಆದರೆ ಹೆಚ್ಚುವರಿ ಅರ್ಧ ತಾಸಿನೊಳಗೆ ವಿಜಯದ ಗೆರೆ ದಾಟಲು ಭಾರತ ವಿಫಲವಾಗಿತ್ತು.

ಇದರಿಂದಾಗಿ 40 ನಿಮಿಷಗಳಷ್ಟು ಊಟದ ವಿರಾಮ ತೆಗೆದುಕೊಳ್ಳಲು ಅಂಪೈರ್‌ಗಳು ನಿರ್ಧರಿಸಿದ್ದರು. ಈ ಬಗ್ಗೆ ನಾಯಕ ವಿರಾಟ್ ಕೊಹ್ಲಿ ಮೈದಾನದಲ್ಲೇ ಅಸಮಾಧಾನವನ್ನು ತೋಡಿಕೊಂಡಿದ್ದರು.

ಒಟ್ಟಿನಲ್ಲಿ ಐಸಿಸಿ ನಿಯಮಗಳ ಬಗ್ಗೆ ಟೀಕೆಗಳು ಎದುರಾಗಿವೆ. ಇಲ್ಲಿ ಸಾಮಾನ್ಯ ಜ್ಞಾನಕ್ಕೆ ಯಾವುದೇ ಬೆಲೆಯಿಲ್ಲವೇ ಎಂಬುದು ಚರ್ಚೆಗೆ ಗ್ರಾಸವಾಗಿದೆ.