ಐಸಿಸಿ ಟೆಸ್ಟ್‌ ರ‍್ಯಾಂಕಿಂಗ್ಸ್‌: ಮಯಾಂಕ್‌ ಅಗರ್ವಾಲ್‌, ಮೊಹಮ್ಮದ್‌ ಶಮಿ ಜೀವಮಾನ ಶ್ರೇಷ್ಠ ಸಾಧನೆ

ದುಬೈ: ಭಾರತ ಮತ್ತು ಬಾಂಗ್ಲಾದೇಶ ನಡುವಣ ಟೆಸ್ಟ್‌ ಸರಣಿಯ ಮೊದಲ ಪಂದ್ಯದ ಅಂತ್ಯಕ್ಕೆ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಸಮಿತಿ (ಐಸಿಸಿ) ಬಿಡುಗಡೆ ಮಾಡಿರುವ ನೂತನ ಟೆಸ್ಟ್‌ ರ‍್ಯಾಂಕಿಂಗ್ಸ್‌ನಲ್ಲಿ ಭಾರತದ ಯುವ ಆರಂಭಿಕ ಬ್ಯಾಟ್ಸ್‌ಮನ್‌ ಮಯಾಂಕ್‌ ಅಗರ್ವಾಲ್‌ ಮತ್ತು ಅನುಭವಿ ವೇಗಿ ಮೊಹಮ್ಮದ್‌ ಶಮಿ ಜೀವಮಾನ ಶ್ರೇಷ್ಠ ಸಾಧನೆ ಮೆರೆದಿದ್ದಾರೆ.

ಇಂದೋರ್‌ನ ಹೋಳ್ಕರ್‌ ಕ್ರೀಡಾಂಗಣದಲ್ಲಿ ನಡೆದ ಮೊದಲ ಟೆಸ್ಟ್‌ ಪಂದ್ಯದಲ್ಲಿ ಮಯಾಂಕ್‌ ಅಗರ್ವಾಲ್‌ (243) ಅವರ ದ್ವಿಶತಕ ಮತ್ತು ವೇಗದ ಬೌಲರ್‌ಗಳ ಮಿಂಚಿನ ದಾಳಿಯ ಬಲದಿಂದ ಟೀಮ್‌ ಇಂಡಿಯಾ ಇನಿಂಗ್ಸ್‌ ಮತ್ತು 130 ರನ್‌ಗಳ ಭರ್ಜರಿ ಗೆಲುವು ದಾಖಲಿಸಿತು.

ಆರ್‌ಸಿಬಿಗೆ ಉಮೇಶ್‌ ಯಾದವ್‌ ಓಪನಿಂಗ್‌ ಬ್ಯಾಟ್ಸ್‌ಮನ್‌?

ತಮ್ಮ ವೃತ್ತಿ ಜೀವನದ ಅಮೋಘ ಲಯದಲ್ಲಿರುವ ಶಮಿ, ಮೊದಲ ಇನಿಂಗ್ಸ್‌ನಲ್ಲಿ 27ಕ್ಕೆ 3 ಮತ್ತು ದ್ವಿತೀಯ ಇನಿಂಗ್ಸ್‌ನಲ್ಲಿ 31ಕ್ಕೆ 4 ವಿಕೆಟ್‌ ಪಡೆದು ತಂಡದ ಗೆಲುವಿನಲ್ಲಿ ಮಹತ್ವದ ಪಾತ್ರ ವಹಿಸಿದ್ದರು. ಈ ಮೂಲಕ ಐಸಿಸಿ ಟೆಸ್ಟ್‌ ಬೌಲರ್ಸ್‌ ರ‍್ಯಾಂಕಿಂಗ್ಸ್‌ನಲ್ಲೂ ಶಮಿ 790 ಅಂಕಗಳೊಂದಿಗೆ 7ನೇ ಸ್ಥಾನ ಪಡೆಯುವ ಮೂಲಕ ವೃತ್ತಿ ಬದುಕಿನ ಸಾರ್ವಕಾಲಿಕ ಅತ್ಯುತ್ತನ ಸಾಧನೆ ಮೆರೆದಿದ್ದಾರೆ.

ವೇಗದ ಬೌಲರ್‌ಗಳ ಪೈಕಿ ಭಾರತ ಪರ ಅತಿ ಹೆಚ್ಚು ಟೆಸ್ಟ್‌ ರ‍್ಯಾಂಕಿಂಗ್ಸ್‌ ಅಂಕಗಳನ್ನು ಗಳಿಸಿದವರ ಪೈಕಿ ಶಮಿ ಮೂರನೇ ಸ್ಥಾನ ಅಲಂಕರಿಸಿದ್ದಾರೆ. ಕೇವಲ ಕಪಿಲ್‌ ದೇವ್‌ (877) ಮತ್ತು ಜಸ್‌ಪ್ರೀತ್‌ ಬುಮ್ರಾ (832) ಮಾತ್ರವೇ ಶಮಿಗಿಂತಲೂ ಮುಂದಿದ್ದಾರೆ.

ಟೀಮ್‌ ಇಂಡಿಯಾದ ಚೊಚ್ಚಲ ಡೇ ನೈಟ್‌ ಟೆಸ್ಟ್‌ಗೆ ಈಡನ್‌ ಗಾರ್ಡನ್ಸ್‌ನಲ್ಲಿ ಪಿಚ್‌ ರೆಡಿ

11ನೇ ರ‍್ಯಾಂಕ್‌ ಪಡೆದ ಮಯಾಂಕ್‌
ಇನ್ನು ಟೆಸ್ಟ್‌ ಬ್ಯಾಟ್ಸ್‌ಮನ್‌ಗಳ ನೂತನ ರ‍್ಯಾಂಕಿಂಗ್ಸ್‌ನಲ್ಲಿ ಭಾರತ ತಂಡದ ಆರಂಭಿಕ ಬ್ಯಾಟ್ಸ್‌ಮನ್‌ ಮಯಾಂಕ್‌ ಅಗರ್ವಾಲ್‌, ತಮ್ಮ ವೃತ್ತಿ ಬದುಕಿನ ಶ್ರೇಷ್ಠ ಸಾಧನೆಯಾಗಿ 11ನೇ ರ‍್ಯಾಂಕ್‌ ಅಲಂಕರಿಸಿದ್ದಾರೆ. ಬಾಂಗ್ಲಾ ವಿರುದ್ಧದ 1ನೇ ಟೆಸ್ಟ್‌ ಪಂದ್ಯದಲ್ಲಿ 243 ರನ್‌ಗಳ ಅದ್ಭುತ ದ್ವಿಶತಕ ಬಾರಿಸಿದ ಮಯಾಂಕ್‌, ಒಟ್ಟು 8 ಪಂದ್ಯಗಳಿಂದ 858 ರನ್‌ಗಳೊಂದಿಗೆ 691 ರ‍್ಯಾಂಕಿಂಗ್‌ ಅಂಕಗಳನ್ನು ಸಂಪಾದಿಸಿದ್ದಾರೆ.

ಟೆಸ್ಟ್‌ ವೃತ್ತಿ ಬದುಕಿನ ಮೊದಲ 8 ಟೆಸ್ಟ್‌ ಪಂದ್ಯಗಳಲ್ಲಿ ಮಯಾಂಕ್‌ ಗಿಂತಲೂ ಕೇವಲ 7 ಬ್ಯಾಟ್ಸ್‌ಮನ್‌ಗಳು ಮಾತ್ರವೇ ಹೆಚ್ಚು ರನ್‌ ಗಳಿಸಿದ್ದಾರೆ. ಡಾನ್‌ ಬ್ರಾಡ್ಮನ್‌ (1210), ಎವರ್ಟನ್‌ ವೀಕ್ಸ್‌ (968), ಸುನಿಲ್‌ ಗವಾಸ್ಕರ್‌ (938), ಮಾರ್ಕ್‌ ಟೇಲರ್‌ (906), ಜಾರ್ಜ್‌ ಹೆಡ್ಲೀ (904), ಫ್ರಾಂಕ್‌ ವಾರೆಲ್‌ (890) ಮತ್ತು ಹರ್ಬರ್ಟ್ ಸ್ಟಲಿಫಿ (872).

ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನಲ್ಲಿ ತ್ರಿಶತಕ ಬಾರಿಸಿದ ಭಾರತ

ಐಸಿಸಿ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಸ್ಪರ್ಧೆಯ ಭಾಗವಾಗಿರುವ ಬಾಂಗ್ಲಾ ವಿರುದ್ಧ ಟೆಸ್ಟ್‌ ಸರಣಿಯ ಮೊದಲ ಪಂದ್ಯವನ್ನು ಗೆದ್ದಿರುವ ಭಾರತ ತಂಡ 1-0 ಅಂತರದ ಮುನ್ನೆಯಲ್ಲಿದ್ದು, ಇದೀಗ ಕೋಲ್ಕತಾದಲ್ಲಿ ನ.22ರಂದು ಆರಂಭವಾಗಲಿರುವ ಚೊಚ್ಚಲ ಡೇ-ನೈಟ್‌ ಟೆಸ್ಟ್‌ ಪಂದ್ಯದಲ್ಲಿ ಗೆದ್ದು ತವರು ನೆರಲದಲ್ಲಿ ಸತತ 12ನೇ ಟೆಸ್ಟ್‌ ಸರಣಿ ಗೆದ್ದ ವಿಶ್ವ ದಾಖಲೆ ಬರೆಯುವುದನ್ನು ಎದುರು ನೋಡುತ್ತಿದೆ.