ಮಹಿಳಾ ಟಿ20 ವಿಶ್ವಕಪ್‌: ಭಾರತಕ್ಕೆ ಮಣಿದ ಪಾಕ್‌

ಏಜೆನ್ಸೀಸ್‌ ಪ್ರಾವಿಡೆನ್ಸ್‌ (ಗಯಾನ): ಅನುಭವಿ ಮಿಥಾಲಿ ರಾಜ್‌(56) ಅವರ ಅರ್ಧಶತಕದ ನೆರವಿನಿಂದ ಭಾರತ ತಂಡ ಮಹಿಳಾ ಟಿ20 ವಿಶ್ವಕಪ್‌ನ ತನ್ನ ದ್ವಿತೀಯ ಲೀಗ್‌ ಪಂದ್ಯದಲ್ಲಿ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ ತಂಡದ ವಿರುದ್ಧ 7 ವಿಕೆಟ್‌ಗಳ ಜಯಭೇರಿ ಬೇರಿಸಿತು.

ಇಲ್ಲಿನ ಪ್ರಾವಿಡೆನ್ಸ್‌ ಕ್ರೀಡಾಂಗಣದಲ್ಲಿ ಭಾನುವಾರ ನಡೆದ ಪಂದ್ಯದಲ್ಲಿ ಟಾಸ್‌ ಗೆದ್ದು ಮೊದಲು ಫೀಲ್ಡಿಂಗ್‌ ಆಯ್ಕೆ ಮಾಡಿಕೊಂಡ ಹರ್ಮನ್‌ಪ್ರೀತ್‌ ಕೌರ್‌ ಬಳಗ, ನಿಗದಿತ 20 ಓವರ್‌ಗಳಲ್ಲಿ ಪಾಕಿಸ್ತಾನ ತಂಡದ 7 ವಿಕೆಟ್‌ ಕಿತ್ತು 133 ರನ್‌ಗಳಿಗೆ ಕಡಿವಾಣ ಹಾಕಿತು. ಬಳಿಕ ಗುರಿ ಬೆನ್ನತ್ತಿದ ಭಾರತ 19 ಓವರ್‌ಗಳಲ್ಲಿ 3 ವಿಕೆಟ್‌ ನಷ್ಟಕ್ಕೆ 137 ರನ್‌ಗಳಿಸಿ, ಸತತ ಎರಡನೇ ಜಯ ದಾಖಲಿಸಿತು. ಭಾರತದ ಪರ ಮಿಥಾಲಿ (56 ರನ್‌, 47 ಎಸೆತ, 7 ಫೋರ್‌) ಹಾಗೂ ಸ್ಮೃತಿ ಮಂಧನಾ (26) ಮಿಂಚಿದರು.

ಇದಕ್ಕೂ ಮೊದಲು ಬದ್ದ ವೈರಿ ವಿರುದ್ಧ ಅಬ್ಬರಿಸುವ ಇರಾದೆಯೊಂದಿಗೆ ಕಣಕ್ಕಿಳಿದ ಪಾಕಿಸ್ತಾನ ಖಾತೆ ತೆರೆಯುವ ಮುನ್ನವೇ ಆರಂಭಿಕ ಆಟಗಾರ್ತಿ ಆಯೆಶಾ ಜಾಫರ್‌(0)ಅವರು ಅರುಂಧತಿ ರೆಡ್ಡಿ ಬೌಲಿಂಗ್‌ನಲ್ಲಿ ವೇದಾ ಕೃಷ್ಣಮೂರ್ತಿಗೆ ಕ್ಯಾಚಿತ್ತು ಮೈದಾನ ತೊರೆದರು. ನಂತರ ಕ್ರೀಸ್‌ಗೀಳಿದ ಉಮೈಮಾ ಸೋಹೆಲ್‌(3) ಇಲ್ಲದ ರನ್‌ ಕದಿಯಲು ಹೋಗಿ ರನ್‌ಔಟಾದರು. ಹೀಗಾಗಿ ಕೇವಲ 10 ರನ್‌ಗಳಿಗೆ 2 ವಿಕೆಟ್‌ ಕಳೆದುಕೊಂಡು ಸಂಕಷ್ಟಕ್ಕೆ ಗುರಿಯಾದ ಪಾಕಿಸಾನ ತಂಡ, 15 ಎಸೆತಗಳಲ್ಲಿ 3 ಫೋರ್‌ ಸಹಿತ 17 ರನ್‌ಗಳಿಸಿ ಕ್ರೀಸ್‌ನಲ್ಲಿ ನೆಲೆಯೂರುತ್ತಿದ್ದ ನಾಯಕಿ ಜೇವಿಯರ್‌ ಖಾನ್‌ ಅವರನ್ನು ನೆಚ್ಚಿಕೊಂಡಿತ್ತು. ಆದರೆ ಜೇವಿಯರ್‌ ಹೋರಾಟ ತಂಡದ ಒಟ್ಟು ಮೊತ್ತ 30 ಆಗುವಷ್ಟರಲ್ಲಿಯೇ ಕೊನೆಗೊಂಡಿತು.

ಕೇವಲ 30 ರನ್‌ಗಳಿಗೆ ಅಗ್ರ ಕ್ರಮಾಂಕದ ಮೂರು ವಿಕೆಟ್‌ ಉರುಳಿಸಿ ಮೇಲುಗೈ ಸಾಧಿಸಿದ ಭಾರತೀಯರು ನಂತರ ಬಿಸ್ಮಾ ಮರೂಫ್‌ ಮತ್ತು ನಿದಾ ದಾರ್‌ ಅವರ ಕೆಚ್ಚೆದೆಯ ಹೋರಾಟದಿಂದ ವಿಚಲಿತಗೊಂಡರು. ಭಾರತೀಯ ಬೌಲರ್‌ಗಳನ್ನು ತಾಳ್ಮೆ ಹಾಗೂ ಎಚ್ಚರಿಕೆಯಿಂದ ಎದುರಿಸಿದ ಇವರಿಬ್ಬರೂ ಕ್ರೀಸ್‌ಗೆ ಗಟ್ಟಿಯಾಗಿ ಅಂಟಿಕೊಂಡರು.

ಒಂದೆಡೇ ನಿದಾ ದಾರ್‌ ಬಿರುಸಿನ ಆಟಕ್ಕೆ ಒತ್ತು ನೀಡಿದರೆ, ಬಿಸ್ಮಾ ರಕ್ಷ ಣಾತ್ಮಕ ಆಟಕ್ಕೆ ಮೊರೆ ಹೋದರು. ಇವರಿಬ್ಬರ ಆಪಾಯವನ್ನು ಅರಿತ ಟೀಮ್‌ ಇಂಡಿಯಾ, ಕೊನೆಗೂ ಬಿಸ್ಮಾ ಮರೂಫ್‌ ಅವರನ್ನು ಔಟ್‌ ಮಾಡಿ ನಾಲ್ಕನೇ ವಿಕೆಟ್‌ ಜತೆಯಾಟವನ್ನು ಬೇರ್ಪಡಿಸಿತು. 49 ಎಸೆತಗಳನ್ನೆದುರಿಸಿದ ಬಿಸ್ಮಾ 4 ಫೋರ್‌ ಸಹಿತ 53 ರನ್‌ಗಳಿಸಿ ತಂಡದ ಗೌರವಾನ್ವಿತ ಮೊತ್ತಕ್ಕೆ ನೆರವಾದರು. ಆದರೆ ಬಿಸ್ಮಾ ಔಟಾದ 18ನೇ ಓವರ್‌ನಲ್ಲಿಯೇ ಸ್ಫೋಟಕ ಆಟದೊಂದಿಗೆ ಅರ್ಧಶತಕ ಗಳಿಸಿದ ನಿದಾ ಅವರನ್ನು ಹೇಮಲತಾ ಔಟ್‌ ಮಾಡುವಲ್ಲಿ ಯಶಸ್ವಿಯಾದರು. 35 ಎಸೆತಗಳನ್ನೆದುರಿಸಿದ ನಿದಾ 5 ಫೋರ್‌, 2 ಅಮೋಘ ಸಿಕ್ಸರ್‌ ಸಹಿತ 52 ರನ್‌ ಕಲೆಹಾಕಿದರು. ಭಾರತ ತಂಡ ಇದೇ 15ರಂದು ಐರ್ಲೆಂಡ್‌ ತಂಡವನ್ನು ಎದುರಿಸಲಿದೆ.

ಸಂಕ್ಷಿಪ್ತ ಸ್ಕೋರ್‌

ಪಾಕಿಸ್ತಾನ: 20 ಓವರ್‌ಗಳಲ್ಲಿ 133/7 (ಬಿಸ್ಮಾ ಮರೂಫ್‌ 54, ನಿದಾ ದಾರ್‌ 52, ಜೇವಿಯರ್‌ ಖಾನ್‌ 17; ಹೇಮಲತಾ 34ಕ್ಕೆ 2, ಪೂನಮ್‌ ಯಾದವ್‌ 22ಕ್ಕೆ 2).

ಭಾರತ: 19 ಓವರ್‌ಗಳಲ್ಲಿ 137/3 (ಮಿಥಾಲಿ ರಾಜ್‌ 56, ಸ್ಮೃತಿ ಮಂಧನಾ 26; ನಿದಾ ದಾರ್‌ 17ಕ್ಕೆ 1, ಬಿಸ್ಮಾ ಮರೂಫ್‌ 21ಕ್ಕೆ 1).