ಅಖ್ತರ್ ದಾಳಿಯಲ್ಲಿ ಹ್ಯಾಟ್ರಿಕ್ ಬೌಂಡರಿ ಸಿಡಿಸಿದ ವೀರು

ಹೊಸದಿಲ್ಲಿ: ಸ್ವಿಜರ್ಲೆಂಡ್‌ನಲ್ಲಿ ಸಾಗುತ್ತಿರುವ ಐಸ್ ಕ್ರಿಕೆಟ್ ಟೂರ್ನಮೆಂಟ್‌ನಲ್ಲಿ ಭಾರತದ ಮಾಜಿ ಡ್ಯಾಶಿಂಗ್ ಓಪನರ್ ವೀರೇಂದ್ರ ಸೆಹ್ವಾಗ್ ಸತತ ಎರಡನೇ ಪಂದ್ಯದಲ್ಲೂ ಸ್ಫೋಟಕ ಬ್ಯಾಟಿಂಗ್ ಪ್ರದರ್ಶಿಸಿದ್ದಾರೆ.

ಸೈಂಟ್ ಮಾರಿಟ್ಜ್ ಐಸ್ ಕ್ರಿಕೆಟ್ 2018 ಟೂರ್ನಿಯಲ್ಲಿ ಪ್ಯಾಲೆಸ್ ಡೈಮಂಡ್ಸ್ ತಂಡವನ್ನು ಮುನ್ನಡೆಸುತ್ತಿರುವ ವೀರು, ರಾಯಲ್ಸ್ ವಿರುದ್ಧದ ದ್ವಿತೀಯ ಪಂದ್ಯದಲ್ಲೂ ಬಿರುಸಿನ ಆರಂಭವೊದಗಿಸಿದ್ದರು.

ಪಾಕಿಸ್ತಾನದ ಮಾಜಿ ವೇಗಿ ಶೋಯೆಬ್ ಅಖ್ತರ್ ದಾಳಿಯಲ್ಲಿ ಸತತ ಮೂರು ಬೌಂಡರಿಗಳನ್ನು ಸಿಡಿಸಿದ ವೀರು ಗತ ಕಾಲದ ವೈಭವವನ್ನು ಮರುಕಳಿಸಿದರು.

ಆದರೆ ಸ್ವಲ್ಪದರಲ್ಲೇ ಅರ್ಧಶತಕ ಬಾರಿಸುವ ಅವಕಾಶದಿಂದ ವಂಚಿತರಾದರು. 22 ಎಸೆತಗಳನ್ನು ಎದುರಿಸಿದ ವೀರು ಅಂತಿಮವಾಗಿ 46 ರನ್ ಗಳಿಸಿ ವಿಕೆಟ್ ಒಪ್ಪಿಸಿದರು.

ಕಳೆದ ನಡೆದ ಮೊದಲ ಪಂದ್ಯದಲ್ಲಿ ಸೋಲನ್ನಪ್ಪಿದರೂ ಐಸ್ ಕ್ರಿಕೆಟ್‌ ಇತಿಹಾಸದಲ್ಲಿ ಚೊಚ್ಚಲ ಬೌಂಡರಿ, ಸಿಕ್ಸರ್ ಜತೆಗೆ ಫಿಫ್ಟಿ ಬಾರಿಸಿದ ದಾಖಲೆಗೆ ಸೆಹ್ವಾಗ್ ಪಾತ್ರವಾಗಿದ್ದರು.

ಅಷ್ಟೇ ಯಾಕೆ ಶೋಯೆಬ್ ಅವರ ಇನ್ನಿಂಗ್ಸ್‌ನ ಪ್ರಥಮ ಎಸೆತವನ್ನು ಬೌಂಡರಿಗಟ್ಟುವ ಮೂಲಕ ಗಮನ ಸೆಳೆದಿದಿದ್ದರು.