ವಿರಾಟ್‌ ಉತ್ತಮವಾಗಿ ಆಡಿದರೆ ವಿಶ್ವಕಪ್‌ ಭಾರತವೇ ಗೆಲ್ಲಲಿದೆ: ಪಂಟರ್

ಹೊಸದಿಲ್ಲಿ: ಹಾಗೊಂದು ವೇಳೆ ಮುಂಬರುವ ಏಕದಿನ ವಿಶ್ವಕಪ್‌ನಲ್ಲಿ ವಿರಾಟ್ ಕೊಹ್ಲಿ ಅತ್ಯುತ್ತಮವಾಗಿ ಆಡಿದರೆ ಭಾರತವೇ ವಿಶ್ವಕಪ್ ಗೆಲ್ಲಲಿದೆ ಎಂದು ಆಸ್ಟ್ರೇಲಿಯಾದ ಮಾಜಿ ನಾಯಕ ರಿಕಿ ಪಾಂಟಿಂಗ್ ಅಭಿಪ್ರಾಪಟ್ಟಿದ್ದಾರೆ.

ಮಾಜಿ ಕ್ರಿಕೆಟ್ ಐಕಾನ್ ಸಚಿನ್ ತೆಂಡೂಲ್ಕರ್ ಹಾಗೂ ವಿರಾಟ್ ಕೊಹ್ಲಿ ನಡುವೆ ಯಾರು ಉತ್ತಮ ಬ್ಯಾಟ್ಸ್‌ಮನ್ ಎಂಬುದಕ್ಕೆ ಉತ್ತರಿಸಲು ಪಾಂಟಿಂಗ್ ನಿರಾಕರಿಸಿದರು. ಇದಕ್ಕಾಗಿ ವಿರಾಟ್ ವೃತ್ತಿ ಜೀವನ ಮುಗಿಯುವ ವರೆಗೂ ಕಾಯಬೇಕು. ಆಗಲೇ ಸರಿಯಾದ ಚಿತ್ರಣ ಸಿಗಲಿದೆ ಎಂದರು.

ಸಚಿನ್ ಲೆಜೆಂಡ್. ಹೌದು, ವಿರಾಟ್ ಶಿಪ್ರ ಗತಿಯಲ್ಲಿ ರನ್ ಗಳಿಸುತ್ತಿದ್ದಾರೆ. ಟೆಸ್ಟ್‌ನಲ್ಲಿ ಅವರ ಸರಾಸರಿ 50ಕ್ಕೂ ಮೇಲಿದೆ. ಆದರೆ ಸಚಿನ್ 200ರಷ್ಟು ಟೆಸ್ಟ್‌ಗಳಲ್ಲಿ 50ಕ್ಕೂ ಹೆಚ್ಚು ಸರಾಸರಿ ಕಾಪಾಡಿಕೊಂಡಿದ್ದಾರೆ. ವಿರಾಟ್ ಏಕದಿನ ದಾಖಲೆಯಂತೂ ಅವಿಶ್ವಸನೀಯ. ಹಾಗಾಗಿ ಭಾರತ ಅತ್ಯಂತ ಅಪಾಯಕಾರಿ ತಂಡವೆಂದು ಭಾವಿಸುತ್ತೇನೆ. ಒಂದು ವೇಳೆ ವಿರಾಟ್‌ ಅತ್ಯುತ್ತಮವಾಗಿ ಆಡಿದರೆ ವಿಶ್ವಕಪ್ ಭಾರತವೇ ಗೆಲ್ಲಲಿದೆ ಎಂದು ವಿವರಿಸಿದರು.

ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ ಡೆಲ್ಲಿ ಡೇರ್‌ಡೆವಿಲ್ಸ್ ಕೋಚ್ ಸ್ಥಾನವನ್ನು ಪಾಂಟಿಂಗ್ ವಹಿಸಿದ್ದಾರೆ. ಅಲ್ಲದೆ ಕೋಚ್ ಆಗಿ ನಮ್ಮ ಮೇಲೆಯೂ ಒತ್ತಡವಿದೆ ಎಂಬುದನ್ನು ಒಪ್ಪಿಕೊಂಡರು.

ಈ ಬಾರಿ ಡೆಲ್ಲಿ ಕ್ಯಾಪಿಟಲ್ಸ್ ಅತ್ಯುತ್ತಮ ತಂಡವನ್ನು ಹೊಂದಿದೆ. ಎಲ್ಲರೂ ಫಿಟ್ನೆಸ್ ಕಾಯ್ದುಕೊಂಡರೆ ಪ್ರಶಸ್ತಿ ಗೆಲ್ಲುವ ಉತ್ತಮ ಅವಕಾಶವಿದೆ ಎಂದರು.