ಅರ್ಜುನ್ ಕ್ರಿಕೆಟ್ ಜೀವನದ ಮಹತ್ವದ ಮೈಲುಗಲ್ಲು: ಸಚಿನ್

ಹೊಸದಿಲ್ಲಿ: ಮಾಸ್ಟರ್‌ ಬ್ಲಾಸ್ಟರ್‌ ಸಚಿನ್‌ ತೆಂಡೂಲ್ಕರ್‌ ಅವರ ಪುತ್ರ ಅರ್ಜುನ್‌ ತೆಂಡೂಲ್ಕರ್‌, ಶ್ರೀಲಂಕಾ ಪ್ರವಾಸ ಕೈಗೊಳ್ಳಲಿರುವ ಭಾರತದ 19 ವರ್ಷದೊಳಗಿನವರ ತಂಡದಲ್ಲಿ ಸ್ಥಾನ ಪಡೆದಿದ್ದಾರೆ.

ಇದರಂತೆ ಪ್ರತಿಕ್ರಿಯಿಸಿರುವ ಮಾಜಿ ದಂತಕತೆ ಸಚಿನ್, ''ಇದು ಅರ್ಜುನ್ ಕ್ರಿಕೆಟ್ ಜೀವನದ ಮಹತ್ವದ ಮೈಲುಗಲ್ಲು'' ಎಂದು ಅಭಿಪ್ರಾಯಪಟ್ಟಿದ್ದಾರೆ.

''ಅರ್ಜುನ್ ಆಯ್ಕೆಯಾಗಿರುವುದರಲ್ಲಿ ಸಂತಸವಿದೆ. ಇದು ಮಗನ ಕ್ರಿಕೆಟ್ ಜೀವನದ ಮಹತ್ವದ ಮೈಲುಗಲ್ಲು. ನಾನು ಹಾಗೂ ಅಂಜಲಿ ಯಾವತ್ತೂ ಆತನ ಆಯ್ಕೆಯನ್ನು ಬೆಂಬಲಿಸುತ್ತಿದ್ದು, ಮಗನ ಯಶಸ್ಸಿಗಾಗಿ ಪ್ರಾರ್ಥಿಸುವುದಾಗಿ'' ತಿಳಿಸಿದ್ದಾರೆ.

ಆರು ಎಡಿ ಎತ್ತರದ 18 ವರ್ಷದ ಎಡಗೈ ಮಧ್ಯಮ ವೇಗಿ ಹಾಗೂ ಎಡಗೈ ಬ್ಯಾಟ್ಸ್‌ಮನ್‌ ಆಗಿರುವ ಅರ್ಜುನ್ ಲಂಕಾ ವಿರುದ್ಧ ಎರಡು ನಾಲ್ಕು ದಿನಗಳ ಪಂದ್ಯಕ್ಕಾಗಿ ತಂಡಕ್ಕೆ ಆಯ್ಕೆಯಾಗಿದ್ದಾರೆ.

ಅರ್ಜುನ್ ಅಂಡರ್ 19 ಕೂಚ್ ಬಿಹಾರ್ ಟ್ರೋಫಿಯಲ್ಲಿ 18 ವಿಕೆಟುಗಳನ್ನು ಕಬಳಿಸಿ ಗಮನಾರ್ಹ ಸಾಧನೆ ಮಾಡಿದ್ದರು. ಹಾಗೆಯೇ ಮಧ್ಯಪ್ರದೇಶ ವಿರುದ್ಧ 95 ರನ್ ತೆತ್ತು ಐದು ವಿಕೆಟುಗಳನ್ನು ಪಡೆದಿದ್ದರು.