ಇಲ್ಲಿನ ಈಡನ್ ಪಾರ್ಕ್ ಕ್ರೀಡಾಂಗಣದಲ್ಲಿ ಭಾನುವಾರ ನಡೆದ 5 ಪಂದ್ಯಗಳ ಸರಣಿಯ 2ನೇ ಪಂದ್ಯದಲ್ಲಿ ಟಾಸ್ ಗೆದ್ದು ಬ್ಯಾಟ್ ಮಾಡಿದ ಆತಿಥೇಯ ನ್ಯೂಜಿಲೆಂಡ್ ತಂಡವನ್ನು 20 ಓವರ್ಗಳಲ್ಲಿ 132/5 ರನ್ಗಳ ಸಾಧಾರಣ ಮೊತಕ್ಕೆ ಕಟ್ಟಿಹಾಕುವಲ್ಲಿ ಟೀಮ್ ಇಂಡಿಯಾ ಯಶಸ್ವಿಯಾಯಿತು.
ಬಳಿಕ 133 ರನ್ಗಳ ಸುಲಭದ ಮೊತ್ತವನ್ನು ಗುರಿ ಬೆನ್ನತ್ತಿದ ಭಾರತ ತಂಡ ಆರಂಭದಲ್ಲೇ ರೋಹಿತ್ ಶರ್ಮಾ (8) ಮತ್ತು ಕ್ಯಾಪ್ಟನ್ ವಿರಾಟ್ ಕೊಹ್ಲಿ (11) ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು.
ಆದರೆ, ಭಾರತ ತಂಡಕ್ಕೆ ಮತ್ತೊಮ್ಮೆ ಆಸರೆಯಾದ ವಿಕೆಟ್ಕೀಪರ್ ಬ್ಯಾಟ್ಸ್ಮನ್ ಕೆಎಲ್ ರಾಹುಲ್, ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್ ವೃತ್ತಿ ಬದುಕಿನ 11ನೇ ಶತಕ ಬಾರಿಸಿ ತಂಡವನ್ನು ಸುಲಭವಾಗಿ ಗುರಿ ಮುಟ್ಟುವಂತೆ ಮಾಡಿದರು. 41 ಎಸೆತಗಳಲ್ಲಿ 42 ರನ್ ಗಳಿಸಿದ್ದ ರಾಹುಲ್, ತಮ್ಮ ರನಮ್ ಗತಿಯ ಗಿಯರ್ ಬದಲಾಯಿಸಿ ನಂತರದ 2 ಎಸೆತಗಳಲ್ಲಿ ಸಿಕ್ಸರ್ ಮತ್ತು ಫೋರ್ ಬಾರಿಸುವ ಮೂಲಕ 43 ಎಸೆತಗಳಲ್ಲಿ ಅರ್ಧಶತಕ ಸಿಡಿಸಿದರು. ಈ ಮೂಲಕ ನ್ಯೂಜಿಲೆಂಡ್ ವಿರುದ್ಧದ ಸರಣಿಯಲ್ಲಿ ಬ್ಯಾಕ್ ಟು ಬ್ಯಾಕ್ ಹಾಫ್ ಸೆಂಚುರಿ ಬಾರಿಸಿ ಮಿಂಚಿದರು. ಅಂತಿಮವಾಗಿ 50 ಎಸೆತಗಳಲ್ಲಿ 3 ಫೋರ್ ಮತ್ತು 2 ಸಿಕ್ಸರ್ನೊಂದಿಗೆ 57 ರನ್ ಬಾರಿಸಿ ಅಜೇಯರಾಗಿ ಉಳಿದರು.
ವಿಕೆಟ್ಕೀಪರ್ ಬ್ಯಾಟ್ಸ್ಮನ್ ಆಗಿ ವಿಶೇಷ ದಾಖಲೆ ಬರೆದ ರಾಹುಲ್
ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್ನಲ್ಲಿ ಕೆಎಲ್ ರಾಹುಲ್ ವಿಕೆಟ್ಕೀಪರ್ ಆಗಿ ಆಡಿದ ಮೊದಲ ಎರಡು ಪಂದ್ಯಗಳಲ್ಲಿ ಅರ್ಧಶತಕ ಬಾರಿಸಿ ಟಿ20-ಐ ಇತಿಹಾಸದಲ್ಲಿ ಈ ಸಾಧನೆ ಮಾಡಿದ ವಿಶ್ವದ ಮೊದಲ ಆಟಗಾರ ಎಂಬ ದಾಖಲೆಯನ್ನು ತಮ್ಮದಾಗಿಸಿಕೊಂಡಿದ್ದಾರೆ. ನ್ಯೂಜಿಲೆಂಡ್ ವಿರುದ್ಧ ಆಕ್ಲೆಂಡ್ನ ಈಡನ್ ಪಾರ್ಕ್ ಕ್ರೀಡಾಂಗಣದಲ್ಲಿ ಜ.24 ರಂದು (ಶುಕ್ರವಾರ) ನಡೆದ ಟಿ20 ಸರಣಿಯ ಮೊದಲ ಪಂದ್ಯದಲ್ಲಿ ರಾಹುಲ್ 56 ರನ್ ಸಿಡಿಸಿದರೆ, ಜ.26ರಂದು (ಭಾನುವಾರ) ನಡೆದ 2ನೇ ಪಂದ್ಯದಲ್ಲಿ 50 ಎಸೆತಗಳಲ್ಲಿ ಅಜೇಯ 57 ರನ್ ಬಾರಿಸಿ ವಿಶೇಷ ದಾಖಲೆ ತಮ್ಮದಾಗಿಸಿಕೊಂಡರು.
ಕೆಎಲ್ ರಾಹುಲ್ 11ನೇ ಅರ್ಧಶತಕ
57 ರನ್
50 ಎಸೆತ
03 ಫೋರ್
02 ಸಿಕ್ಸರ್
114.00 ಸ್ಟ್ರೈಕ್ರೇಟ್
11, ಟಿ20 ಕ್ರಿಕೆಟ್ನಲ್ಲಿ ಭಾರತದ ಪರ 2 ಶತಕಗಳನ್ನು ಬಾರಿಸಿರು ಕೆಎಲ್ ರಾಹುಲ್ ನ್ಯೂಜಿಲೆಂಡ್ ವಿರುದ್ಧದ 2ನೇ ಚುಟಕು ಕದನದಲ್ಲಿ ಅರ್ಧಶತಕ ಬಾರಿಸಿ ತಮ್ಮ ವೃತ್ತಿ ಬದುಕಿನ 11ನೇ ಹಾಫ್ ಸೆಂಚುರಿ ದಾಖಲಿಸಿದ್ದಾರೆ.
ಆಕ್ಲೆಂಡ್ನಲ್ಲಿ ಮಿಣಿ ಮಿಣಿ ಮಿಂಚಿದ ಭಾರತ
ಶ್ರೇಯಸ್ ಕೈತಪ್ಪಿದ ಅರ್ಧಶತಕ
ರಾಹುಲ್ಗೆ ಉತ್ತಮ ಸಾಥ್ ನೀಡಿದ ಕಳೆದ ಪಂದ್ಯದ ಮ್ಯಾಚ್ ವಿನ್ನರ್ ಶ್ರೇಯಸ್ ಅಯ್ಯರ್, 3ನೇ ವಿಕೆಟ್ಗೆ 67 ಎಸೆತಗಳಲ್ಲಿ 86 ರನ್ಗಳ ಜೊತೆಯಾಟವಾಡಿದರು. ಸ್ಫೋಟಕ ಬ್ಯಾಟಿಂಗ್ ನಡೆಸಿದ ಶ್ರೇಯಸ್, 33 ಎಸೆತಗಳಲ್ಲಿ 1 ಫೋರ್ ಮತ್ತು ಮೂರು ಸಿಕ್ಸರ್ನೊಂದಿಗೆ 44 ರನ್ ಗಳಿಸಿ ಔಟ್ ಆದರು. ಸಿಕ್ಸರ್ ಸಿಡಿಸಿ ಅರ್ಧಶತಕ ಬಾರಿಸಲು ಯತ್ನಿಸಿದ ಶ್ರೇಯಸ್, ಲೆಗ್ ಸ್ಪಿನ್ನರ್ ಇಶ್ ಸೋಧಿ ಬೌಲಿಂಗ್ನಲ್ಲಿ ಲಾಂಗ್ ಆನ್ನಲ್ಲಿ ಫೀಲ್ಡಿಂಗ್ ಮಾಡುತ್ತಿದ್ದ ಟಿಮ್ ಸೌಥೀಗೆ ಕ್ಯಾಚಿತ್ತರು. ಈಡನ್ ಪಾರ್ಕ್ನಲ್ಲೇ ನಡೆದ ಮೊದಲ ಪಂದ್ಯದಲ್ಲಿ 6 ವಿಕೆಟ್ ಜಯ ದಾಖಲಿಸಿದ್ದ ಭಾರತ ತಂಡ, ಅದೇ ಅಂಗಣದಲ್ಲಿ ಕಿವೀಸ್ಗೆ 7 ವಿಕೆಟ್ಗಳ ಸೋಲುಣಿಸಿ 5 ಪಂದ್ಯಗಳ ಸರಣಿಯಲ್ಲಿ 2-0 ಅಂತರದ ಮುನ್ನಡೆ ತನ್ನದಾಗಿಸಿಕೊಂಡಿದೆ.
ಭಾರತ vs ನ್ಯೂಜಿಲೆಂಡ್: 2ನೇ ಟಿ20ಯ ಸಂಕ್ಷಿಪ್ತ ಸ್ಕೋರ್
ನ್ಯೂಜಿಲೆಂಡ್: 20 ಓವರ್ಗಳಲ್ಲಿ 5 ವಿಕೆಟ್ಗೆ 132 (ಮಾರ್ಟಿನ್ ಗಪ್ಟಿಲ್ 33, ಕಾಲಿನ್ ಮನ್ರೊ 26, ಟಿಮ್ ಸೀಫರ್ಟ್ ಔಟಾಗದೆ 33; ರವೀಂದ್ರ ಜಡೇಜಾ 18ಕ್ಕೆ 2, ಶಿವಂ ದುಬೇ 16ಕ್ಕೆ 1).
ಭಾರತ: 17.3 ಓವರ್ಗಳಲ್ಲಿ 3 ವಿಕೆಟ್ಗೆ 135 (ರೋಹಿತ್ ಶರ್ಮಾ 8, ಕೆಎಲ್ ರಾಹುಲ್ ಅಜೇಯ 57, ವಿರಾಟ್ ಕೊಹ್ಲಿ 11, ಶ್ರೇಯಸ್ ಅಯ್ಯರ್ 44, ಶಿವಂ ದುಬೇ ಅಜೇಯ 8; ಟಿಮ್ ಸೌಥೀ 20ಕ್ಕೆ 2, ಇಶ್ ಸೋಧಿ 33ಕ್ಕೆ 1).