IND vs WI: ಕಟಕ್‌ ಕ್ಲೈಮ್ಯಾಕ್ಸ್‌ ಕದನ ಗೆದ್ದ ಟೀಮ್‌ ಇಂಡಿಯಾ ಮುಡಿಗೆ ಏಕದಿನ ಸರಣಿ

ಕಟಕ್‌: ಬೃಹತ್‌ ಮೊತ್ತದ ರನ್‌ ಚೇಸಿಂಗ್‌ನ ಅಂತ್ಯಕ್ಕೆ ಸ್ಟಾರ್‌ ಬ್ಯಾಟ್ಸ್‌ಮನ್‌ಗಳು ಇಲ್ಲದೇ ಇದ್ದರೂ ಒತ್ತಡ ಮೆಟ್ಟಿನಿಂತ ಭಾರತ ತಂಡ ತಂಡ ವೆಸ್ಟ್ ಇಂಡೀಸ್‌ ತಂಡವನ್ನು 4 ವಿಕೆಟ್‌ಗಳಿಂದ ಮಣಿಸಿ 3 ಪಂದ್ಯಗಳ ಏಕದಿನ ಕ್ರಿಕೆಟ್‌ ಸರಣಿಯಲ್ಲಿ 2-1 ಅಂತರದ ಜಯ ದಾಖಲಿಸಿತು.

ಇಲ್ಲಿನ ಬಾರಬತಿ ಕ್ರೀಡಾಂಗಣದಲ್ಲಿ ನಡೆದ ಮಾಡು ಇಲ್ಲವೆ ಮಡಿ ಪಂದ್ಯದಲ್ಲಿ ಭಾರತ ತಂಡದ ನಾಯಕ ವಿರಾಟ್‌ ಕೊಹ್ಲಿ ಟಾಸ್‌ ಗೆದ್ದು ಮೊದಲು ಫೀಲ್ಡಿಂಗ್‌ ಆಯ್ಕೆ ಮಾಡಿಕೊಂಡರು. ಆದರೆ, ಬೌಲರ್‌ಗಳ ಸಾಧಾರಣ ಪ್ರದರ್ಶನದ ಫಲವಾಗಿ 50 ಓವರ್‌ಗಳಲ್ಲಿ ವೆಸ್ಟ್‌ ಇಂಡೀಸ್‌ ತಂಡ 5 ವಿಕೆಟ್‌ಗೆ 315 ರನ್‌ಗಳ ದೊಡ್ಡ ಮೊತ್ತ ದಾಖಲಿಸಿತ್ತು.

ಬಳಿಕ ಗುರಿ ಬೆನ್ನತ್ತಿದ ಭಾರತ, ರೋಹಿತ್‌ ಶರ್ಮಾ (63), ಕೆಎಲ್‌ ರಾಹುಲ್‌ (77) ಮತ್ತು ಕ್ಯಾಪ್ಟನ್‌ ವಿರಾಟ್‌ ಕೊಹ್ಲಿ (85) ಅವರ ಅರ್ಧಶತಕಗಳು ಹಾಗೂ ಇನಿಂಗ್ಸ್‌ ಅಂತ್ಯದಲ್ಲಿ ಆಲ್‌ರೌಂಡರ್‌ ರವೀಂದ್ರ ಜಡೇಜಾ (ಅಜೇಯ 39) ಮತ್ತು ಶಾರ್ದುಲ್‌ ಠಾಕೂರ್‌ (ಅಜೇಯ 17) ಜವಾಬ್ದಾರಿಯುತ ಬ್ಯಾಟಿಂಗ್‌ ಮೂಲಕ ತಂಡವನ್ನು ಜಯದ ದಡ ಮುಟ್ಟಿಸಿದರು. 48.4 ಓವರ್‌ಗಳಲ್ಲಿ 6 ವಿಕೆಟ್‌ಗೆ ಭಾರತ 316 ರನ್‌ ಗಳಿಸಿ ಜಯ ತನ್ನದಾಗಿಸಿಕೊಂಡಿತು. ಈ ಮೂಲಕ ಒಡಿಐನಲ್ಲಿ ವೆಸ್ಟ್ ಇಂಡೀಸ್‌ ವಿರುದ್ಧ ಸತತ 10ನೇ ಸರಣಿ ಗೆದ್ದು ಬೀಗಿತು.

ಭಾರತ vs ವೆಸ್ಟ್‌ ಇಂಡೀಸ್‌ 3ನೇ ಒಡಿಐ ಸ್ಕೋರ್‌ ಕಾರ್ಡ್‌

ಇದಕ್ಕೂ ಮುನ್ನ ವೆಸ್ಟ್‌ ಇಂಡೀಸ್‌ ಪರ ಎವಿನ್‌ ಲೂಯಿಸ್‌ (21) ಮತ್ತು ಶೇಯ್‌ ಹೋಪ್‌ (42) ಉತ್ತಮ ಆರಂಭ ಒದಗಿಸಿದರೆ, ನಂತರದ ಬಂದ ಶಿಮ್ರಾನ್‌ ಹೆಟ್ಮಾಯೆರ್‌ (37) ಮತ್ತು ರಾಸ್ಟನ್ ಚೇಸ್‌ (38) ಉಪಯುಕ್ತ ಕಾಣಿಕೆ ನೀಡಿದರು. ಆದರೆ, ತಂಡದ ಮೊತ್ತ 300 ರನ್‌ಗಳ ಗಡಿ ದಾಟುವಂತೆ ಮಾಡಿದ್ದು ಯುವ ಬ್ಯಾಟ್ಸ್‌ಮನ್‌ ನಿಕೊಲಾಸ್‌ ಪೂರನ್‌ ಮತ್ತು ಕ್ಯಾಪ್ಟನ್‌ ಕೈರೊನ್‌ ಪೊಲಾರ್ಡ್ಸ್‌. ಭಾರತೀಯ ಬೌಲರ್‌ಗಳನ್ನು ಮನಬಂದಂತೆ ದಂಡಿಸಿದ ಪೂರನ್‌, 64 ಎಸೆತಗಳಲ್ಲಿ 10 ಫೋರ್‌ ಮತ್ತು 3 ಸಿಕ್ಸರ್‌ ಒಳಗೊಂಡ 89 ರನ್‌ಗಳನ್ನು ಚಚ್ಚಿದರು.

ನಾಯಕನ ಆಟವಾಡಿದ ಕೈರೊನ್‌ ಪೊಲಾರ್ಡ್‌, 51 ಎಸೆತಗಳಲ್ಲಿ 3 ಫೋರ್‌ ಮತ್ತು 7 ಭರ್ಜರಿಯ ಸಿಕ್ಸರ್‌ಗಳನ್ನು ಒಳಗೊಂಡ ಅಜೇಯ 74 ರನ್‌ಗಳನ್ನು ಬಾರಿಸಿದರು. ಭಾರತದ ಪರ ಪದಾರ್ಪಣೆಯ ಪಂದ್ಯವನ್ನಾಡಿದ ನವದೀಪ್‌ ಸೈನಿ, ತಮ್ಮ 10 ಓವರ್‌ಗಳ ಸ್ಪೆಲ್‌ನಲ್ಲಿ 58 ರನ್‌ ನೀಡಿ 2 ವಿಕೆಟ್‌ ಪಡೆದರು.

ಶಾರ್ದುಲ್‌ ಪರಾಕ್ರಮ
ತಂಡವನ್ನು ಗುರಿ ಮುಟ್ಟಿಸುವ ಜವಾಬ್ದಾರಿ ಹೊತ್ತಿದ್ದ ವಿರಾಟ್‌ ಕೊಹ್ಲಿ 85 ರನ್‌ ಗಳಿಸಿದ್ದಾಗ ಕೀಮೊ ಪೌಲ್‌ ಬೌಲಿಂಗ್‌ನಲ್ಲಿ ಕ್ಲೀನ್‌ ಬೌಲ್ಡ್‌ ಆದರು. ಈ ಹಂತದಲ್ಲಿ ಅಭಿಮಾನಿಗಳ ಮನದಲ್ಲಿ ಆತಂಕ ಮನೆ ಮಾಡಿತ್ತು. ಆದರೆ, ಬ್ಯಾಟಿಂಗ್‌ ಕ್ರಮಾಂಕದಲ್ಲಿ ಬಡ್ತಿ ಪಡೆದು ಬಂದ ಶಾರ್ದುಲ್‌ ಠಾಕೂರ್‌, 6 ಎಸೆತಗಳಲ್ಲಿ 2 ಫೋರ್‌ ಮತ್ತು 1 ಸಿಕ್ಸರ್‌ ಒಳಗೊಂಡ ಅಜೇಯ 17 ರನ್‌ ಗಳಿಸಿ ತಂಡವನ್ನು ಸುಲಭವಾಗಿ ಗೆಲುವಿನ ದಡ ಮುಟ್ಟಿಸಿದರು.

ಚೇಸ್‌ ಮಾಸ್ಟರ್‌ ವಿರಾಟ್‌ ಕೊಹ್ಲಿ
ಕಳೆದ 10 ವರ್ಷಗಳಲ್ಲಿ ಭಾರತ ತಂಡ ಒಡಿಐನಲ್ಲಿ ಒಟ್ಟು 10 ಬಾರಿ 300ಕ್ಕೂ ಅಧಿಕ ರನ್‌ಗಳ ಗುರಿಯನ್ನು ಬೆನ್ನತ್ತಿ ಜಯ ದಕ್ಕಿಸಿಕೊಂಡಿದೆ. ಇದರಲ್ಲಿ ವಿರಾಟ್‌ ಕೊಹ್ಲಿ 7 ಶತಕ ಮತ್ತು ಏಕೈಕ ಅರ್ಧಶತಕ (ಭಾನುವಾರದ ಪಂದ್ಯದಲ್ಲಿ) ದಾಖಲಿಸಿದ್ದಾರೆ. ಈ ಮೂಲಕ ರನ್‌ ಚೇಸಿಂಗ್‌ನಲ್ಲಿ ತಾವು ಮಾಸ್ಟರ್‌ ಎಂಬುದನ್ನು ಮತ್ತೊಮ್ಮೆ ಸಾಬೀತು ಪಡಿಸಿದ್ದಾರೆ.

1008 ರನ್‌
ಏಕದಿನ ಕ್ರಿಕೆಟ್‌ನಲ್ಲಿ ಭಾರತ ತಂಡದ ನೂತನ ಆರಂಭಿಕ ಜೋಡಿ ರೋಹಿತ್‌ ಶರ್ಮಾ ಮತ್ತು ಕೆಎಲ್‌ ರಾಹುಲ್‌, 2019ರಲ್ಲಿ ಜೊತೆಯಾಗಿ ಗಳಿಸಿರುವ ಒಟ್ಟು ರನ್‌.

ಸಂಕ್ಷಿಪ್ತ ಸ್ಕೋರ್‌
ವೆಸ್ಟ್‌ ಇಂಡೀಸ್‌: 50 ಓವರ್‌ಗಳಲ್ಲಿ 5 ವಿಕೆಟ್‌ಗೆ 315 (ಲೂಯಿಸ್‌ 21, ಹೋಪ್‌ 42, ಹೆಟ್ಮಾಯೆರ್‌ 37, ಚೇಸ್‌ 38, ಪೂರನ್‌ 89, ಪೊಲಾರ್ಡ್‌ ಅಜೇಯ 74; ನವದೀಪ್‌ ಸೈನಿ 58ಕ್ಕೆ 2).
ಭಾರತ: 48.4 ಓವರ್‌ಗಳಲ್ಲಿ 6 ವಿಕೆಟ್‌ಗೆ 316 (ರೋಹಿತ್‌ 63, ರಾಹುಲ್‌ 77, ವಿರಾಟ್‌ 85, ಜಡೇಜಾ ಅಜೇಯ 39; ಕೀಮೊ ಪೌಲ್‌ 59ಕ್ಕೆ 3).


ನವದೀಪ್‌ ಸೈನಿಗೆ ಪದಾರ್ಪಣೆ ಭಾಗ್ಯ
ಭಾರತ ತಂಡದ ವೇಗ ಬೌಲಿಂಗ್ ವಿಭಾಗಕ್ಕೆ ಹೆಚ್ಚಿನ ಬಲ ಒದಗಿಸಲು ಯುವ ವೇಗದ ಬೌಲರ್‌ ನವದೀಪ್‌ ಸೈನಿ ಅವರನ್ನು ಮೂರನೇ ಹಾಗೂ ಅಂತಿಮ ಒಡಿಐನಲ್ಲಿ ಆಡಿಸಲಾಗುತ್ತಿದ್ದು, ಈ ಮೂಲಕ ಭಾರತ ಏಕದಿನ ಕ್ರಿಕೆಟ್‌ ತಂಡಕ್ಕೆ 27 ವರ್ಷದ ವೇಗದ ಬೌಲರ್ ಪದಾರ್ಪಣೆ ಮಾಡಲಿದ್ದಾರೆ. ಟಿ20 ಕ್ರಿಕೆಟ್‌ನಲ್ಲಿ ಈಗಾಗಲೇ ಭಾರತವನ್ನು ಪ್ರತಿನಿಧಿಸಿರುವ ಸೈನಿ ಮೊದಲ ಪಂದ್ಯದಲ್ಲೇ ನಾಲ್ಕು ವಿಕೆಟ್‌ ಪಡೆದು ಮಿಂಚಿದ್ದರು. ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ನಲ್ಲಿ ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ತಂಡದ ಪರ ಆಡುವ ಸೈನಿ, ಭಾರತ ತಂಡದ ವೇಗದ ಬೌಲಿಂಗ್‌ ವಿಭಾಗದ ಭವಿಷ್ಯದ ತಾರೆ ಎನಿಸಿಕೊಂಡಿದ್ದಾರೆ. ಗಾಯಾಳು ದೀಪಕ್‌ ಚಹರ್‌ ಅವರ ಸ್ಥಾನದಲ್ಲಿ ಸೈನಿಗೆ ಅವಕಾಶ ಲಭ್ಯವಾಯಿತು. ಕಳೆದ ವೆಸ್ಟ್‌ ಇಂಡೀಸ್‌ ಪ್ರವಾಸದಲ್ಲಿ ಟಿ20-ಐ ಕ್ರಿಕೆಟ್‌ಗೆ ಭಾರತದ ಪರ ಪದಾರ್ಪಣೆ ಮಾಡಿದ್ದರು.


ಭಾರತ ತಂಡದ ಪ್ಲೇಯಿಂಗ್‌ 11
ರೋಹಿತ್‌ ಶರ್ಮಾ, ಕೆಎಲ್‌ ರಾಹುಲ್‌, ವಿರಾಟ್‌ ಕೊಹ್ಲಿ (ನಾಯಕ), ಶ್ರೇಯಸ್‌ ಅಯ್ಯರ್‌, ರಿಷಭ್‌ ಪಂತ್‌ (ವಿಕೆಟ್‌ಕೀಪರ್‌), ಕೇದಾರ್‌ ಜಾಧವ್‌, ರವೀಂದ್ರ ಜಡೇಜಾ, ಮೊಹಮ್ಮದ್‌ ಶಮಿ, ಶಾರ್ದುಲ್‌ ಠಾಕುರ್‌, ಕುಲ್ದೀಪ್‌ ಯಾದವ್‌, ನವದೀಪ್‌ ಸೈನಿ.


ವೆಸ್ಟ್‌ ಇಂಡೀಸ್‌ ತಂಡದ ಪ್ಲೇಯಿಂಗ್‌ 11
ಎವಿನ್‌ ಲೂಯಿಸ್‌, ಶೇಯ್‌ ಹೋಪ್‌ (ವಿಕೆಟ್‌ಕೀಪರ್‌), ಶಿಮ್ರಾನ್‌ ಹೆಟ್ಮಾಯೆರ್‌, ರಾಸ್ಟನ್‌ ಚೇಸ್‌, ನಿಕೊಲಾಸ್‌ ಪೂರನ್‌, ಕೈರೊನ್‌ ಪೊಲಾರ್ಡ್‌ (ನಾಯಕ), ಜೇಸನ್‌ ಹೋಲ್ಡರ್‌, ಅಲ್ಜಾರಿ ಜೋಸೆಫ್‌, ಖಾರಿ ಪಿಯರ್‌, ಶೆಲ್ಡನ್‌ ಕಾಟ್ರೆಲ್‌.