ಶುಭಕೋರಿದ 'ಬಿಗ್‌ ಬಾಸ್‌'ಗೆ ಉತ್ತರಿಸಿದ ಕಿಂಗ್‌ ಕೊಹ್ಲಿ!

ತಿರುವನಂತಪುರ: ವಿಂಡೀಸ್‌ ವಿರುದ್ಧದ ಟಿ20 ಕ್ರಿಕೆಟ್‌ ಸರಣಿಯ ಮೊದಲ ಪಂದ್ಯದಲ್ಲಿ ಅಜೇಯ 94 ರನ್‌ ಬಾರಿಸಿ ಭಾರತ ತಂಡಕ್ಕೆ 6 ವಿಕೆಟ್‌ಗಳ ಭರ್ಜರಿ ಜಯ ತಂದುಕೊಟ್ಟ ಕ್ಯಾಪ್ಟನ್‌ ವಿರಾಟ್‌ ಕೊಹ್ಲಿಗೆ ಇಡೀ ಕ್ರಿಕೆಟ್‌ ಜಗತ್ತೇ ಸಲಾಮು ಹೊಡೆದಿದೆ.

ವಿರಾಟ್‌ ಕೊಹ್ಲಿ ಅವರ ವೀರಾವೇಶದ ಬ್ಯಾಟಿಂಗ್‌ ನೆರವಿನಿಂದ ಭಾರತ ತಂಡ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್‌ನಲ್ಲಿ ವಿಶ್ವ ದಾಖಲೆಯ 5ನೇ ಬಾರಿ 200+ ರನ್‌ಗಳ ಗುರಿ ಬೆನ್ನತ್ತಿ ಪಂದ್ಯ ಗೆದ್ದುಕೊಂಡಿದೆ. ಈ ದಾಖಲೆಗೆ ಕಾರಣರಾದ ವಿರಾಟ್‌ ಕೊಹ್ಲಿ ಅವರನ್ನು ವೆಸ್ಟ್ ಇಂಡೀಸ್‌ನ ಸಾರ್ವಕಾಲಿಕ ಶ್ರೇಷ್ಠ ಆಟಗಾರ ಹಾಗೂ ಮಾಜಿ ನಾಯಕ ಸರ್‌ ವಿವಿಯನ್‌ ರಿಚರ್ಡ್ಸ್‌ ಕೂಡ ಗುಣಗಾನ ಮಾಡಿದ್ದಾರೆ.

ವೆಸ್ಟ್‌ ಇಂಡೀಸ್‌ ವಿರುದ್ಧ ಹೈದರಾಬಾದ್‌ನ ರಾಜೀವ್‌ ಗಾಂಧೀ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಶುಕ್ರವಾರ ನಡೆದ ಪಂದ್ಯದ ಬಳಿಕ ಟ್ವಿಟರ್‌ ಮೂಲಕ ಕೊಹ್ಲಿಗೆ ಮೆಚ್ಚುಗೆಯ ಸುರಿಮಳೆಗೈದ ಸರ್‌ ವಿವಿಯನ್‌ ರಿಚರ್ಡ್ಸ್‌, "ಅದ್ಭುತ, ನಿಜಕ್ಕೂ ಅದ್ಭುತ ವಿರಾಟ್‌ ಕೊಹ್ಲಿ," ಎಂದು ತಮ್ಮ ಅಧೀಕೃತ ಟ್ವಿಟರ್‌ ಖಾತೆಯ ಗೋಡೆ ಮೇಲೆ ರಿಚರ್ಡ್ಸ್‌ ಬರೆದಿದ್ದರು.

ದಾಖಲೆ ಹೊಸ್ತಿಲಲ್ಲಿ ಕೊಹ್ಲಿ ಮಾತ್ರವಲ್ಲ ಯುಜ್ವೇಂದ್ರ ಚಹಲ್‌ ಕೂಡ ಇದ್ದಾರೆ!

ಇದಕ್ಕೆ ಪ್ರತಿಕ್ರಿಯೆ ನೀಡಿರುವ ಕೊಹ್ಲಿ, ವೆಸ್ಟ್‌ ಇಂಡೀಸ್‌ ಕ್ರಿಕೆಟ್‌ನ ದಿಗ್ಗಜನಿಂದ ಬಂದಂತಹ ಮಾತುಗಳಿಗೆ ಮನ ಸೋತಿದ್ದಾರೆ. "ಥ್ಯಾಂಕ್ಸ್‌ ಬಿಗ್‌ ಬಾಸ್‌. ನಿಮ್ಮಿಂದ ಈ ಮಾತುಗಳು ಬಂದಿರುವುದು ನನ್ನ ಪಾಲಿಗೆ ಬಹಳ ದೊಡ್ಡದು," ಎಂದು ಕೊಹ್ಲಿ ಉತ್ತರಿಸಿದ್ದಾರೆ.


ಮತ್ತೊಂದು ದಾಖಲೆ ಹೊಸ್ತಿಲಲ್ಲಿ ಕೊಹ್ಲಿ
ಭಾನುವಾರ (ಡಿ.8ರಂದು) ಕೇರಳದ ತಿರುವನಂತಪುರದ ಗ್ರೀನ್‌ ಫೀಲ್ಡ್‌ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ನಡೆಯಲಿರುವ ವೆಸ್ಟ್‌ ಇಂಡೀಸ್‌ ವಿರುದ್ಧದ 2ನೇ ಟಿ20 ಪಂದ್ಯದಲ್ಲಿ ಮತ್ತೊಂದು ವಿಶೇಷ ದಾಖಲೆ ಬರೆಯುವ ಅವಕಾಶ ಕಿಂಗ್‌ ಕೊಹ್ಲಿಗಿದೆ. ಈ ಪಂದ್ಯದಲ್ಲಿ ಕೊಹ್ಲಿ 25 ರನ್‌ಗಳನ್ನು ಗಳಿಸಿದರೆ, ಭಾರತ ನೆಲದಲ್ಲಿ ಟೀಮ್‌ ಇಂಡಿಯಾ ಪರ 1000 ಅಂತಾರಾಷ್ಟ್ರೀಯ ಟಿ20 ರನ್‌ಗಳನ್ನು ಗಳಿಸಿದ ಮೊತ್ತ ಮೊದಲ ಬ್ಯಾಟ್ಸ್‌ಮನ್‌ ಎಂಬ ದಾಖಲೆ ತಮ್ಮದಾಗಿಸಿಕೊಳ್ಳಲಿದ್ದಾರೆ.



ರೋಹಿತ್ ಶರ್ಮಾ ದಾಖಲೆ ಮುರಿಯುವ ತವಕದಲ್ಲಿ ಕಿಂಗ್ ಕೊಹ್ಲಿ

ಅಂತಾರಾಷ್ಟ್ರೀಯ ಟಿ20 ಪಂದ್ಯಗಳಲ್ಲಿ ಅತಿ ಹೆಚ್ಚು ಪಂದ್ಯಶ್ರೇಷ್ಠ ಪ್ರಶಸ್ತಿಗಳನ್ನು ಪಡೆದ ವಿಶ್ವ ದಾಖಲೆಯನ್ನೂ ಕೊಹ್ಲಿ ಸರಿಗಟ್ಟಿದ್ದಾರೆ. 12 ಬಾರಿ ಪಂದ್ಯ ಶ್ರೇಷ್ಠ ಗೌರವ ಪಡೆದಿರುವ ಕೊಹ್ಲಿ ಈ ಮೂಲಕ ಅಫಘಾನಿಸ್ತಾನದ ಆಲ್‌ರೌಂಡರ್‌ ಮೊಹಮ್ಮದ್‌ ನಬಿ (12) ಅವರೊಟ್ಟಿಗೆ ಈ ದಾಖಲೆ ಹಂಚಿಕೊಂಡಿದ್ದಾರೆ. ಪಾಕಿಸ್ತಾನದ ಆಲ್‌ರೌಂಡರ್‌ ಶಾಹಿದ್‌ ಅಫ್ರಿದಿ 11 ಬಾರಿ ಪಂದ್ಯಶ್ರೇಷ್ಠ ಗೌರವ ಪಡೆದು ಈ ಪಟ್ಟಿಯಲ್ಲಿ 2ನೇ ಸ್ಥಾನದಲ್ಲಿದ್ದಾರೆ.