ಪೃಥ್ವಿ ಶತಕ, ಮಯಾಂಕ್ ಫಿಫ್ಟಿ; ಭಾರತ 'ಎ' ತಿರುಗೇಟು

ಬೆಕೆನ್‌ಹ್ಯಾಮ್: ಇಂಗ್ಲೆಂಡ್‌ನಲ್ಲಿ ಸಾಗುತ್ತಿರುವ ಅನಧಿಕೃತ ನಾಲ್ಕು ದಿನಗಳ ಟೆಸ್ಟ್ ಪಂದ್ಯದಲ್ಲಿ ವೆಸ್ಟ್‌ಇಂಡೀಸ್ 'ಎ' ವಿರುದ್ಧ ದ್ವಿತೀಯ ಇನ್ನಿಂಗ್ಸ್‌ನಲ್ಲಿ ಆರಂಭಿಕರಾದ ಪೃಥ್ವಿ ಶಾ ಹಾಗೂ ಮಯಾಂಕ್ ಅಗರ್ವಾಲ್ ಅಮೋಘ ಬ್ಯಾಟಿಂಗ್ ಪ್ರದರ್ಶನ ನೀಡುವ ಮೂಲಕ ಎದುರಾಳಿಗಳಿಗೆ ಭಾರತ 'ಎ' ತಿರುಗೇಟು ನೀಡಿದೆ.

ಮೊದಲ ಇನ್ನಿಂಗ್ಸ್‌ನಲ್ಲಿ ಫಸ್ಟ್ ಬಾಲ್ ಡಕೌಟ್‌ಗೆ ಬಲಿಯಾಗಿರುವ ಪೃಥ್ವಿ ಹಾಗೂ ಮಯಾಂಕ್ ದ್ವಿತೀಯ ಇನ್ನಿಂಗ್ಸ್‌ನಲ್ಲಿ ಅನುಕ್ರಮವಾಗಿ ಅಜೇಯ ಶತಕ ಹಾಗೂ ಅರ್ಧಶತಕ ಬಾರಿಸುವ ಮೂಲಕ ತಮ್ಮ ಸಾಮರ್ಥ್ಯವನ್ನು ಮೆರೆದರು.

ಪರಿಣಾಮ ಮೂರನೇ ದಿನದಂತ್ಯಕ್ಕೆ ಭಾರತ ಕೇವಲ 24 ಓವರ್‌ಗಳಲ್ಲಿ ಯಾವುದೇ ವಿಕೆಟ್ ನಷ್ಟಕ್ಕೆ 159 ರನ್ ಗಳಿಸಿದೆ. ಆದರೂ ಇನ್ನಿಂಗ್ಸ್ ಮುನ್ನಡೆಗಾಗಿ ಇನ್ನು 91 ರನ್ ಗಳಿಸಬೇಕಿದೆ.

ಕೇವಲ 74 ಎಸೆತಗಳನ್ನು ಎದುರಿಸಿರುವ ಪೃಥ್ವಿ 18 ಬೌಂಡರಿ ಹಾಗೂ ಸಿಕ್ಸರ್ ನೆರವಿನಿಂದ 101 ರನ್ ಗಳಿಸಿ ಔಟಾಗದೆ ಉಳಿದರು. ಅತ್ತ ಮಾಯಾಂಕ್ 71 ಎಸೆತಗಳಲ್ಲಿ 11 ಬೌಂಡರಿಗಳ ನೆರವಿನಿಂದ 56 ರನ್ ಗಳಿಸಿ ಕೊನೆಯ ದಿನದಾಟಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದೆ.

ಈ ಮೊದಲು ಚೆಮರ್ ಕೆ ಹೋಲ್ಡರ್ (57ಕ್ಕೆ 4) ಹಾಗೂ ಶೆರ್ಮನ್ ಲೆವಿಸ್ (35ಕ್ಕೆ 4) ದಾಳಿಗೆ ಸಿಲುಕಿದ ಭಾರತ ಎ ತನ್ನ ಮೊದಲ ಇನ್ನಿಂಗ್ಸ್‌ನಲ್ಲಿ 42.1 ಓವರ್‌ಗಳಲ್ಲಿ ಕೇವಲ 133 ರನ್‌ಗಳಿಗೆ ಸರ್ವಪತನವನ್ನು ಕಂಡಿತ್ತು.

ಬಳಿಕ ಜವಾಬ್ ನೀಡಿದ ವಿಂಡೀಸ್ 'ಎ' ತಂಡವು ಸುನಿಲ್ ಅಬ್ರಿಸ್ ಅಮೋಘ ಶತಕದ (128) ಹಾಗೂ ನಾಯಕ ಶಮರ್ ಬ್ರೂಕ್ಸ್ (91) ಅತ್ಯಾಕರ್ಷಕ ಅರ್ಧಶತಕ ನೆರವಿನಿಂದ ಮೊದಲ ಇನ್ನಿಂಗ್ಸ್‌ನಲ್ಲಿ 383 ರನ್‌ಗಳ ಬೃಹತ್ ಮೊತ್ತ ಪೇರಿಸಿತ್ತು.

ಈ ಮೂಲಕ ಮೊದಲ ಇನ್ನಿಂಗ್ಸ್‌ನಲ್ಲಿ 250 ರನ್‌ಗಳ ಬೃಹತ್ ಮುನ್ನಡೆ ದಾಖಲಿಸಿತ್ತು. ಭಾರತದ ಪರ ಅಂಕಿತ್ ರಜಪೂತ್ ನಾಲ್ಕು ವಿಕೆಟುಗಳನ್ನು ಕಬಳಿಸಿದ್ದರು.