ಆಸ್ಪ್ರೇಲಿಯಾಗೆ ಭಾರತದ ಬಾಕ್ಸಿಂಗ್‌ ಡೇ ಪಂಚ್‌

3ನೇ ಪಂದ್ಯದಲ್ಲಿ 137 ರನ್‌ ಜಯ ದಾಖಲಿಸಿದ ಟೀಮ್‌ ಇಂಡಿಯಾ| ಸರಣಿಯಲ್ಲಿ ವಿರಾಟ್‌ ಪಡೆಗೆ 2-1ರ ಅಂತರದ ಮುನ್ನಡೆ

Vijaya Karnataka Web

ಮೆಲ್ಬೋರ್ನ್‌ : ಏಳು ದಶಕಗಳಲ್ಲಿ ಮೊದಲ ಬಾರಿ ಆಸ್ಪ್ರೇಲಿಯಾ ನೆಲದಲ್ಲಿ ಚೊಚ್ಚಲ ಟೆಸ್ಟ್‌ ಸರಣಿ ಜಯ ದಾಖಲಿಸುವ ಕಡೆಗೆ ಟೀಮ್‌ ಇಂಡಿಯಾ ದಾಪುಗಾಲಿಟ್ಟಿದೆ. ಇಲ್ಲಿ ನಡೆದ ಬಾಕ್ಸಿಂಗ್‌ ಡೇ ಟೆಸ್ಟ್‌ ಪಂದ್ಯದಲ್ಲಿ ಆಸ್ಪ್ರೇಲಿಯಾ ತಂಡವನ್ನು 137 ರನ್‌ಗಳಿಂದ ಬಗ್ಗುಬಡಿದ ಭಾರತ ತಂಡ, 4 ಪಂದ್ಯಗಳ ಟೆಸ್ಟ್‌ ಸರಣಿಯಲ್ಲಿ 2-1 ಅಂತರದ ಮೇಲುಗೈ ಪಡೆದಿದೆ.

ಇದರೊಂದಿಗೆ ಭಾರತಕ್ಕೆ ಸರಣಿಯಲ್ಲಿ ಸೋಲಿನ ಆತಂಕ ದೂರವಾಗಿದ್ದು, ಇನ್ನೇನಿದ್ದರೂ ಸಿಡ್ನಿಯಲ್ಲಿ ಜನವರಿ 3ರಿಂದ ಆರಂಭವಾಗಲಿರುವ 4ನೇ ಹಾಗೂ ಅಂತಿಮ ಟೆಸ್ಟ್‌ನಲ್ಲಿ ಜಯ ದಾಖಲಿಸಿ ಸರಣಿ ಗೆಲುವಿನ ಇತಿಹಾಸ ನಿರ್ಮಿಸುವುದಷ್ಟೇ ಬಾಕಿಯಿದೆ.

ಇದೇ ವರ್ಷದ ಆರಂಭದಲ್ಲಿ ತವರಿನಲ್ಲಿ ನಡೆದ ಆಸ್ಪ್ರೇಲಿಯಾ ವಿರುದ್ಧದ ಟೆಸ್ಟ್‌ ಸರಣಿ ಗೆದ್ದಿದ್ದ ಭಾರತ ತಂಡ ಇದೀಗ ಆಸೀಸ್‌ ನೆಲದಲ್ಲಿ ಇನ್ನೊಂದು ಪಂದ್ಯ ಬಾಕಿ ಇರುವಾಗಲೇ 2-1ರ ಮುನ್ನಡೆ ಗಳಿಸಿರುವುದರಿಂದ ಬಾರ್ಡರ್‌-ಗವಾಸ್ಕರ್‌ ಟ್ರೋಫಿಯನ್ನು ತನ್ನಲ್ಲೇ ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ.

ಎಂಸಿಜಿ ಕ್ರೀಡಾಂಗಣದಲ್ಲಿ ನಡೆದ ಬಾಕ್ಸಿಂಗ್‌ ಡೇ ಟೆಸ್ಟ್‌ ಪಂದ್ಯದ 5ನೇ ಹಾಗೂ ಅಂತಿಮ ದಿನವಾದ ಭಾನುವಾರ ಮಳೆ ಕಾರಣ ಆಟ ತಡವಾಗಿ ಆರಂಭವಾಯಿತು. ನಾಲ್ಕನೇ ದಿನದಂದು ಅಜೇಯ 61 ರನ್‌ಗಳನ್ನು ಗಳಿಸಿ ಭಾರತೀಯ ಬೌಲರ್‌ಗಳನ್ನು ಕಾಡಿದ್ದ ಪ್ಯಾಟ್‌ ಕಮಿನ್ಸ್‌ (63) ಮತ್ತು ನೇಥನ್‌ ಲಯಾನ್‌ (7) ಭಾನುವಾರ ಹೆಚ್ಚು ಕಾಲ ಕೀಸ್‌ನಲ್ಲಿ ಉಳಿಯಲಿಲ್ಲ. ವೇಗಿಗಳಾದ ಜಸ್‌ಪ್ರೀತ್‌ ಬುಮ್ರಾ (53ಕ್ಕೆ 3) ಮತ್ತು ಇಶಾಂತ್‌ ಶರ್ಮಾ (40ಕ್ಕೆ 2) ಕಾಂಗರೂ ಪಡೆಯ ಬಾಲಂಗೋಚಿಗಳನ್ನು ಕೇವಲ 27 ಎಸೆತಗಳಲ್ಲಿ ಹೊಡೆದುರುಳಿಸಿದರು. ಆಸ್ಪ್ರೇಲಿಯಾ ತಂಡ ಕೊನೆಯ ದಿನದಲ್ಲಿ ತನ್ನ ಖಾತೆಗೆ ಕೇವಲ 3 ರನ್‌ ಸೇರಿಸಲಷ್ಟೇ ಶಕ್ತಗೊಂಡು, 89.3 ಓವರ್‌ಗಳಲ್ಲಿ 261 ರನ್‌ಗಳಿಗೆ ಆಲ್‌ಔಟ್‌ ಆಯಿತು.

ಗಂಗೂಲಿ ದಾಖಲೆ ಸರಿಗಟ್ಟಿದ ಕೊಹ್ಲಿ : ವಿದೇಶಿ ನೆಲದಲ್ಲಿ ಭಾರತ ತಂಡಕ್ಕೆ ಅತಿ ಹೆಚ್ಚು ಟೆಸ್ಟ್‌ ಗೆಲುವು ತಂದುಕೊಟ್ಟ ಮಾಜಿ ನಾಯಕ ಸೌರವ್‌ ಗಂಗೂಲಿ (11 ಗೆಲುವು) ಅವರ ದಾಖಲೆಯನ್ನು ಹಾಲಿ ಕ್ಯಾಪ್ಟನ್‌ ವಿರಾಟ್‌ ಕೊಹ್ಲಿ ಸರಿಗಟ್ಟಿದ್ದಾರೆ. ಗಂಗೂಲಿ 28 ಪಂದ್ಯಗಳಲ್ಲಿ 11 ಗೆಲುವು ತಂದುಕೊಟ್ಟರೆ, ಕೊಹ್ಲಿ ಕೇವಲ 24 ಪಂದ್ಯಗಳಲ್ಲಿ ಈ ಸಾಧನೆ ಮೆರೆದಿದ್ದಾರೆ. ಎಂ.ಎಸ್‌ ಧೋನಿ 30 ಟೆಸ್ಟ್‌ಗಳಲ್ಲಿ ಕೇವಲ 6 ಪಂದ್ಯಗಳನ್ನು ತಮ್ಮ ನಾಯಕತ್ವದ ಮೂಲಕ ಗೆದ್ದುಕೊಟ್ಟಿದ್ದಾರೆ.

ಶಾಸ್ತ್ರೀ ಬಿಯರ್‌ ಪಾರ್ಟಿ! : ಮೆಲ್ಬೋರ್ನ್‌ ಟೆಸ್ಟ್‌ನಲ್ಲಿ ಸಿಕ್ಕ ಗೆಲುವಿನ ಸಂಭ್ರಮವನ್ನು ಭರ್ಜರಿಯಾಗೇ ಆಚರಿಸಿದ ಟೀಮ್‌ ಇಂಡಿಯಾದ ಮುಖ್ಯ ಕೋಚ್‌ ರವಿ ಶಾಸ್ತ್ರಿ, ತಂಡ ಹೋಟೆಲ್‌ಗೆ ಹಿಂದಿರುಗುವಾಗ ಬಸ್‌ನಲ್ಲೇ ಬಿಯರ್‌ ಪಾರ್ಟಿ ಆರಂಭಿಸಿದ್ದರು. ಶಾಸ್ತ್ರಿ, ಬಸ್‌ನಿಂದ ಇಳಿದು ಬಿಯರ್‌ ಕುಡಿಯುತ್ತಲೇ ಹೋಟೆಲ್‌ ಕಡೆಗೆ ಹೆಜ್ಜೆಯಾಕುತ್ತಿರುವ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ. ''ವಾವ್‌... ಇದು ಅರ್ಹ ಬಿಯರ್‌ ಪಾರ್ಟಿ,'' ಎಂದು ಹಲವರು ಟ್ವೀಟ್‌ ಮಾಡಿ ಟೀಮ್‌ ಇಂಡಿಯಾಗೆ ಹಾರೈಸಿದ್ದಾರೆ.

ಯುವ ಅಭಿಮಾನಿಗೆ ಪ್ಯಾಡ್ಸ್‌ ಗಿಫ್ಟ್‌ : 018ರಲ್ಲಿ ಎಲ್ಲ ಮಾದರಿಯ ಕ್ರಿಕೆಟ್‌ನಲ್ಲಿ ರನ್‌ ಹೊಳೆಯನ್ನೇ ಹರಿಸಿದ ಟೀಮ್‌ ಇಂಡಿಯಾ ಕ್ಯಾಪ್ಟನ್‌ ವಿರಾಟ್‌ ಕೊಹ್ಲಿ, ತಮ್ಮ ವರ್ಷದ ಕೊನೆಯ ಇನಿಂಗ್ಸ್‌ನಲ್ಲಿ ಶೂನ್ಯಕ್ಕೆ ಔಟಾದದ್ದು ವಿಪರ್ಯಾಸ. ಮೆಲ್ಬೋರ್ನ್‌ ಟೆಸ್ಟ್‌ನ ಮೊದಲ ಇನಿಂಗ್ಸ್‌ನಲ್ಲಿ 82 ರನ್‌ ಗಳಿಸಿದ ಕೊಹ್ಲಿ 2ನೇ ಇನಿಂಗ್ಸ್‌ನಲ್ಲಿ ಡಕ್‌ಔಟಾದರು. ಪಂದ್ಯದಲ್ಲಿ ಭಾರತ ತಂಡ 137 ರನ್‌ ಜಯ ದಾಖಲಿಸಿದ ಬಳಿಕ ಬೌಂಡರಿ ಬಳಿ ಕುಳಿತಿದ್ದ ಅಭಿಮಾನಿಗಳೊಂದಿಗೆ ಸೆಲ್ಫಿ ಕ್ಲಿಕ್ಕಿಸಿಕೊಂಡ ಕೊಹ್ಲಿ, ಹಲವರಿಗೆ ಹಸ್ತಾಕ್ಷರ ನೀಡಿದರು. ಈ ಮಧ್ಯೆ ಭಾರತೀಯ ಮೂಲದ ಪುಟ್ಟ ಅಭಿಮಾನಿಯೊಬ್ಬನಿಗೆ ತಮ್ಮ ಬ್ಯಾಟಿಂಗ್‌ ಪ್ಯಾಡ್‌ಗಳನ್ನು ಉಡುಗೊರೆಯಾಗಿ ನೀಡಿ ಅಭಿಮಾನಿಗಳ ಮನ ಗೆದ್ದರು.

2018ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ವಿಕೆಟ್‌ ಪಡೆದ ಬೌಲರ್‌ಗಳು
ವಿಕೆಟ್‌ ಬೌಲರ್‌ ತಂಡ
78 ಜಸ್‌ಪ್ರೀತ್‌ ಬುಮ್ರಾ ಭಾರತ
77 ಕಗಿಸೊ ರಬಾಡ ದಕ್ಷಿಣ ಆಫ್ರಿಕಾ
76 ಕುಲ್‌ದೀಪ್‌ ಯಾದವ್‌ ಭಾರತ
76 ಆದಿಲ್‌ ರಶೀದ್‌ ಇಂಗ್ಲೆಂಡ್‌
72 ರಶೀದ್‌ ಖಾನ್‌ ಅಫಘಾನಿಸ್ತಾನ

4ನೇ ಟೆಸ್ಟ್‌: ಜ.3ರಿಂದ
ಸ್ಥಳ: ಎಸ್‌ಸಿಜಿ, ಸಿಡ್ನಿ.

179
2018ರಲ್ಲಿ ಆಡಿದ ಒಟ್ಟು 14 ಟೆಸ್ಟ್‌ ಪಂದ್ಯಗಳಲ್ಲಿ ಭಾರತ ತಂಡದ ವೇಗಿಗಳು ಗಳಿಸಿದ ಒಟ್ಟು ವಿಕೆಟ್‌. ವಿದೇಶಿ ನೆಲದಲ್ಲೇ ಒಟ್ಟು 158 ವಿಕೆಟ್‌ಗಳನ್ನು ಪಡೆದಿರುವುದು ವಿಶೇಷ.

25
2018ರಲ್ಲಿ ಭಾರತ ತಂಡ ಟೆಸ್ಟ್‌ ಕ್ರಿಕೆಟ್‌ನ ಒಟ್ಟು 28 ಇನಿಂಗ್ಸ್‌ಗಳಲ್ಲಿ 25 ಬಾರಿ ಎದುರಾಳಿ ತಂಡವನ್ನು ಆಲ್‌ಔಟ್‌ ಮಾಡುವಲ್ಲಿ ಯಶಸ್ವಿಯಾಗಿದೆ.

ಟೆಸ್ಟ್‌ನಲ್ಲಿ ಭಾರತಕ್ಕೆ ವಿದೇಶದಲ್ಲಿ ಅತಿ ಹೆಚ್ಚು ಗೆಲುವು ತಂದುಕೊಟ್ಟ ನಾಯಕರು
ವಿರಾಟ್‌ ಕೊಹ್ಲಿ 11 (24 ಟೆಸ್ಟ್‌ಗಳು)
ಸೌರವ್‌ ಗಂಗೂಲಿ 11 (28 ಟೆಸ್ಟ್‌ಗಳು)

267
ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಇಶಾಂತ್‌ ಶರ್ಮಾ ಗಳಿಸಿರುವ ಒಟ್ಟು ವಿಕೆಟ್‌ಗಳು. ಭಾರತದ ಪರ ಅತಿ ಹೆಚ್ಚು ಟೆಸ್ಟ್‌ ವಿಕೆಟ್‌ ಪಡೆದವರ ಪೈಕಿ ಇಶಾಂತ್‌ 6ನೇ ಸ್ಥಾನದಲ್ಲಿದ್ದಾರೆ.

07
ಆಸ್ಪ್ರೇಲಿಯಾ ನೆಲದಲ್ಲಿ ಭಾರತ ತಂಡ ಗೆದ್ದಿರುವ ಒಟ್ಟು ಟೆಸ್ಟ್‌ ಪಂದ್ಯಗಳು. ಪರ್ತ್‌ (2008), ಅಡಿಲೇಡ್‌ (2003, 2018), ಮೆಲ್ಬೋರ್ನ್‌ (1977, 1981, 2018) ಮತ್ತು ಸಿಡ್ನಿ (1978).