ದಕ್ಷಿಣ ಆಫ್ರಿಕಾ ವಿರುದ್ಧದ 6ನೇ ಏಕದಿನ ಪಂದ್ಯ ಇಂದು | ಮನೀಶ್‌ ಪಾಂಡೆ ಆಡುವ ನಿರೀಕ್ಷೆ
ಸೆಂಚೂರಿಯನ್‌: ದಕ್ಷಿಣ ಆಫ್ರಿಕಾ ನೆಲದಲ್ಲಿ ಚೊಚ್ಚಲ ಏಕದಿನ ಸರಣಿ ಗೆದ್ದು ಬೀಗುತ್ತಿರುವ ಪ್ರವಾಸಿ ಭಾರತ ತಂಡಕ್ಕೆ ಇದೀಗ ತನ್ನ ಬೆಂಚ್‌ ಸ್ಟ್ರೆಂತ್‌ ಪರೀಕ್ಷೆಯ ಅವಕಾಶ ಒದಗಿ ಬಂದಿದ್ದು, 6ನೇ ಏಕದಿನ ಪಂದ್ಯದಲ್ಲಿ ಕೆಲ ಬದಲಾವಣೆಗಳೊಂದಿಗೆ ಕಣಕ್ಕಿಳಿಯುವ ಸಾಧ್ಯತೆಯಿದೆ.
ಸೂಪರ್‌ ಸ್ಪೋರ್ಟ್‌ ಪಾರ್ಕ್‌ ಮೈದಾನದಲ್ಲಿ ಶುಕ್ರವಾರ ನಡೆಯುವ ಪಂದ್ಯ ಭಾರತದ ಪಾಲಿಗೆ ಔಪಚಾರಿಕ. ಏಕೆಂದರೆ ಸರಣಿಯ ಮೊದಲ ಐದು ಪಂದ್ಯಗಳ ಮುಕ್ತಾಯದ ವೇಳೆಗೆ ಭಾರತ 4-1ರಲ್ಲಿ ಸರಣಿ ಕೈವಶ ಮಾಡಿಕೊಂಡಿದೆ. ಹೀಗಾಗಿ ಇದುವರೆಗೆ ಬೆಂಚ್‌ ಕಾಯಿಸಿರುವ ಕೆಲ ಆಟಗಾರರಿಗೆ 6ನೇ ಪಂದ್ಯದಲ್ಲಿ ಅವಕಾಶ ನೀಡುವ ಲೆಕ್ಕಾಚಾರದಲ್ಲಿದೆ. ಜತೆಗೆ ಪಂದ್ಯವನ್ನು ಗೆದ್ದು ಸರಣಿ ಜಯದ ಅಂತರವನ್ನು 5-1ಕ್ಕೆ ಹೆಚ್ಚಿಸಿಕೊಂಡು ಫೆ.18ರಂದು ಆರಂಭವಾಗಲಿರುವ ಟಿ20 ಸರಣಿಗೆ ಸಜ್ಜಾಗುವ ತವಕದಲ್ಲಿದೆ.
ಮತ್ತೊಂದೆಡೆ ಭಾರತ ವಿರುದ್ಧ ಇದೇ ಮೊದಲ ಬಾರಿ ತವರು ನೆಲದಲ್ಲಿ ಏಕದಿನ ಸರಣಿ ಸೋತಿರುವ ದಕ್ಷಿಣ ಆಫ್ರಿಕಾ ತಂಡ, ಅಂತಿಮ ಪಂದ್ಯದಲ್ಲಿ ಗೆಲುವನ್ನು ಎದುರು ನೋಡುತ್ತಿದೆ. ಆದರೆ ಪ್ರವಾಸಿಗರ ಸಂಘಟಿತ ಆಕ್ರಮಣಕ್ಕೆ ಬೆದರಿ ಬೆಂಡಾಗಿರುವ ಹರಿಣ ಪಡೆ, ಸೆಂಚೂರಿಯನ್‌ನಲ್ಲಿ ಗೆಲ್ಲಬೇಕಾದರೆ ಭಾರತದಂತೆ ಒಗ್ಗಟ್ಟಿನ ಪ್ರದರ್ಶನ ತೋರಬೇಕಿದೆ.
ಮಧ್ಯಮ ಕ್ರಮಾಂಕಕ್ಕೆ ಸರ್ಜರಿ ಸಾಧ್ಯತೆ
ಬ್ಯಾಟಿಂಗ್‌ ವಿಭಾಗದಲ್ಲಿ ಅಗ್ರ ಕ್ರಮಾಂದ ಮೂವರು ಆಟಗಾರರಲ್ಲಿ ಯಾವುದೇ ಬದಲಾವಣೆಗಳಿಲ್ಲ. ಏಕೆಂದರೆ ತಲಾ ಒಂದು ಶತಕ ಬಾರಿಸಿರುವ ಆರಂಭಿಕರಾದ ರೋಹಿತ್‌ ಶರ್ಮಾ, ಶಿಖರ್‌ ಧವನ್‌, 2 ಶತಕಗಳೊಂದಿಗೆ ಅಬ್ಬರಿಸಿಇರುವ ನಾಯಕ ವಿರಾಟ್‌ ಕೊಹ್ಲಿ ಭಾರತದ ಸರಣಿ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ. ಆದರೆ 4ರಿಂದ 7ನೇ ಕ್ರಮಾಂಕದವರೆಗಿನ ಬ್ಯಾಟ್ಸ್‌ಮನ್‌ಗಳು ಒಟ್ಟಾಗಿ ಸರಣಿಯಲ್ಲಿ ಕೇವಲ ಒಂದು ಅರ್ಧಶತಕ ಮಾತ್ರ ಗಳಿಸಿದ್ದಾರೆ. ಹೀಗಾಗಿ ಮಧ್ಯಮ ಕ್ರಮಾಂಕದಲ್ಲಿ ಕನ್ನಡಿಗ ಮನೀಶ್‌ ಪಾಂಡೆ, ಅವರನ್ನು ಆಡಿಸಿದರೆ, ಅಜಿಂಕ್ಯ ರಹಾನೆ ಅಥವಾ ಶ್ರೇಯಸ್‌ ಅಯ್ಯರ್‌ ಆಡುವ ಬಳಗದಿಂದ ಹೊರಗುಳಿಯಲಿದ್ದಾರೆ. ಇನ್ನು ಸತತವಾಗಿ ಕ್ರಿಕೆಟ್‌ ಆಡಿರುವ ವೇಗಿಗಳಾದ ಭುವನೇಶ್ವರ್‌ ಕುಮಾರ್‌ ಮತ್ತು ಜಸ್‌ಪ್ರೀತ್‌ ಬುಮ್ರಾರಲ್ಲಿ ಒಬ್ಬರಿಗೆ ವಿಶ್ರಾಂತಿ ನೀಡಿ, ಮೊಹಮ್ಮದ್‌ ಶಮಿಗೆ ಅವಕಾಶ ನೀಡುವ ಸಾಧ್ಯತೆ ಹೆಚ್ಚು.
ವಿರಾಟ್‌ಗೆ 200ನೇ ಇನಿಂಗ್ಸ್‌
ಟೀಮ್‌ ಇಂಡಿಯಾ ನಾಯಕ ವಿರಾಟ್‌ ಕೊಹ್ಲಿ ಅವರಿಗಿದು ಸ್ಮರಣೀಯ ಪಂದ್ಯ. ಏಕೆಂದರೆ ವಿರಾಟ್‌ ಏಕದಿನ ಅಂತರಾಷ್ಟ್ರೀಯ ವೃತ್ತೀಜೀವನದಲ್ಲಿ ಇದು 200ನೇ ಇನಿಂಗ್ಸ್‌ ಆಡಲಿದ್ದಾರೆ. ಇದುವರೆಗೆ ಆಡಿರುವ 207 ಪಂದ್ಯಗಳಲ್ಲಿ ಕೊಹ್ಲಿ ಅವರಿಗೆ 199 ಇನಿಂಗ್ಸ್‌ಗಳಲ್ಲಿ ಬ್ಯಾಟಿಂಗ್‌ ಅವಕಾಶ ಸಿಕ್ಕಿದೆ. ಈಗಾಗಲೇ ಸರಣಿಯಲ್ಲಿ 2 ಶತಕ, ಒಂದು ಅರ್ಧಶತಕ ಸಹಿತ 143ರ ಉನ್ನತ ಸರಾಸರಿಯಲ್ಲಿ 429 ರನ್‌ ಸಿಡಿಸಿರುವ ವಿರಾಟ್‌, ಅಂತಿಮ ಪಂದ್ಯದಲ್ಲಿ 71 ರನ್‌ ಗಳಿಸಿದರೆ, ಸರಣಿಯಲ್ಲಿ 500 ರನ್‌ಗಳ ಸರದಾರನಾಗಲಿದ್ದಾರೆ.
ಪಂದ್ಯ ಆರಂಭ: ಸಂಜೆ 4.30ಕ್ಕೆ (ಭಾರತೀಯ ಕಾಲಮಾನ)
ಸ್ಥಳ: ಸೂಪರ್‌ ಸ್ಪೋರ್ಟ್‌ ಪಾರ್ಕ್‌, ಸೆಂಚೂರಿಯನ್‌
ನೇರ ಪ್ರಸಾರ: ಟೆನ್‌ ಸ್ಪೋರ್ಟ್ಸ್ ನೆಟ್‌ವರ್ಕ್‌
ತಂಡಗಳ ವಿವರ
ಭಾರತ: ವಿರಾಟ್‌ ಕೊಹ್ಲಿ(ನಾಯಕ), ಶಿಖರ್‌ ಧವನ್‌, ರೋಹಿತ್‌ ಶರ್ಮಾ, ಅಜಿಂಕ್ಯ ರಹಾನೆ, ಶ್ರೇಯಸ್‌ ಅಯ್ಯರ್‌, ಎಂ.ಎಸ್‌ ಧೋನಿ, ಹಾರ್ದಿಕ್‌ ಪಾಂಡ್ಯ, ಭುವನೇಶ್ವರ್‌ ಕುಮಾರ್‌, ಯುಜ್ವೇಂದ್ರ ಚಹಾಲ್‌, ಕುಲ್‌ದೀಪ್‌ ಯಾದವ್‌, ಜಸ್‌ಪ್ರೀತ್‌ ಬುಮ್ರಾ, ಅಕ್ಷ ರ್‌ ಪಟೇಲ್‌, ದಿನೇಶ್‌ ಕಾರ್ತಿಕ್‌, ಮನೀಶ್‌ ಪಾಂಡೆ, ಕೇದಾರ್‌ ಜಾಧವ್‌, ಶಾರ್ದೂಲ್‌ ಠಾಕೂರ್‌, ಮೊಹಮ್ಮದ್‌ ಶಮಿ.
ದಕ್ಷಿಣ ಆಫ್ರಿಕಾ: ಏಡನ್‌ ಮರ್ಕ್ರಮ್‌(ನಾಯಕ), ಜೆ.ಪಿ ಡುಮಿನಿ, ಹಶೀಮ್‌ ಆಮ್ಲಾ, ಎಬಿ ಡಿ'ವಿಲಿಯರ್ಸ್‌, ಮೊರ್ನೆ ಮಾರ್ಕೆಲ್‌, ಡೇವಿಡ್‌ ಮಿಲ್ಲರ್‌, ಕ್ರಿಸ್‌ ಮೊರಿಸ್‌, ಕಗಿಸೊ ರಬಾಡ, ಆ್ಯಂಡಿಲ್‌ ಫೆಲುಕ್ವಾಯೊ, ಲುಂಗಿ ಎನ್‌ಗಿಡಿ, ಹೆನ್ರಿಕ್‌ ಕ್ಲಾಸೆನ್‌, ಇಮ್ರಾನ್‌ ತಾಹಿರ್‌, ಫರ್ಹಾನ್‌ ಬೆಹರ್ಡೀನ್‌, ಖಾಯ ಜೊಂಡೊ, ತಬ್ರೈಜ್‌ ಶಮ್ಸಿ.
ಐಸಿಸಿ ರಾರ‍ಯಂಕಿಂಗ್‌
ಭಾರತ: 01
ದಕ್ಷಿಣ ಆಫ್ರಿಕಾ: 02
ಸೆಂಚೂರಿಯನ್‌ನಲ್ಲಿ ಮುಖಾಮುಖಿ: 06
ಭಾರತ ಗೆಲುವು: 03
ದಕ್ಷಿಣ ಆಫ್ರಿಕಾ ಗೆಲುವು: 02
ಫಲಿತಾಂಶವಿಲ್ಲ: 01
09
ಸೆಂಚೂರಿಯನ್‌ನ ಸೂಪರ್‌ ಸ್ಪೋರ್ಟ್‌ ಪಾರ್ಕ್‌ನಲ್ಲೇ ನಡೆದ ಪ್ರಸಕ್ತ ಏಕದಿನ ಸರಣಿಯ 2ನೇ ಪಂದ್ಯದಲ್ಲಿ ಭಾರತ 9 ವಿಕೆಟ್‌ಗಳ ಭರ್ಜರಿ ಜಯ ದಾಖಲಿಸಿತ್ತು.