ಭಾರತಕ್ಕೆ ನಂ.1 ಪಟ್ಟ ಗುರಿ; ಇತಿಹಾಸ ಪುನರ್ ರಚಿಸಿತೇ ಕಿವೀಸ್?

ಹೊಸದಿಲ್ಲಿ: ತವರಿನಲ್ಲಿ ನ್ಯೂಜಿಲೆಂಡ್ ವಿರುದ್ಧ ಸಾಗಲಿರುವ ಮೂರು ಪಂದ್ಯಗಳ ಏಕದಿನ ಸರಣಿಯನ್ನು ವಶಪಡಿಸಿಕೊಳ್ಳುವ ಮೂಲಕ ಮತ್ತೆ ಐಸಿಸಿ ರ‍್ಯಾಂಕಿಂಗ್ ಪಟ್ಟಿಯಲ್ಲಿ ಅಗ್ರಪಟ್ಟ ವಶಪಡಿಸಿಕೊಳ್ಳುವ ಇರಾದೆಯಲ್ಲಿದೆ. ಅತ್ತ ನ್ಯೂಜಿಲೆಂಡ್ ಭಾರತದಲ್ಲಿ ಇತಿಹಾಸ ಪುನರ್ ರಚಿಸುವ ತವಕದಲ್ಲಿದೆ.

ಪ್ರಸಕ್ತ ಸಾಲಿನಲ್ಲಿ ಭಾರತ ಆಡಿರುವ 22 ಪಂದ್ಯಗಳ ಪೈಕಿ 17ರಲ್ಲಿ ಗೆಲುವು ದಾಖಲಿಸಿದೆ. ಇಂಗ್ಲೆಂಡ್ ವಿರುದ್ಧ 3-0, ವೆಸ್ಟ್ಇಂಡೀಸ್ ವಿರುದ್ಧ 3-1, ಶ್ರೀಲಂಕಾ ವಿರುದ್ಧ 5-0 ಹಾಗೂ ಆಸ್ಟ್ರೇಲಿಯಾ ವಿರುದ್ಧ 4-1 ಅಂತರದ ಸರಣಿ ಗೆಲುವುಗಳು ಸೇರಿವೆ. ಆದರೆ ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಫೈನಲ್‌ನಲ್ಲಿ ಪಾಕಿಸ್ತಾನ ವಿರುದ್ಧದ ಸೋಲು ಮರೆಯಲಾರದ ಕಹಿ ನೆನಪಾಗಿದೆ.

ಅತ್ತ ನ್ಯೂಜಿಲೆಂಡ್ 2017ನೇ ಸಾಲಿನಲ್ಲಿ ಆಡಿರುವ 13 ಪಂದ್ಯಗಳಲ್ಲಿ ಏಳರಲ್ಲಿ ಗೆಲುವು ದಾಖಲಿಸಿದೆ. ಇದರಲ್ಲಿ ಆಸ್ಟ್ರೇಲಿಯಾ ವಿರುದ್ಧ 2-0 ಗೆಲುವು ದಾಖಲಾಗಿದ್ದರೆ ದಕ್ಷಿಣ ಆಫ್ರಿಕಾ ವಿರುದ್ಧ 2-3ರ ಅಂತರದ ಸೋಲಿಗೆ ಗುರಿಯಾಗಿತ್ತು.

ಭಾರತ ನೆಲದಲ್ಲಿ ಅಂಕಿಅಂಶಗಳು ಸಹ ಕಿವೀಸ್ ಪರವಾಗಿಲ್ಲ. ಹಾಗೆಯೇ18-11ರ ಸೋಲು-ಗೆಲುವುಗಳ ಅನುಪಾತವನ್ನು ಹೊಂದಿದೆ. 1988, 1995, 1999, 2010 ಮತ್ತು 2016ನೇ ಸಾಲಿನಲ್ಲೂ ಭಾರತದಲ್ಲಿ ಸೋಲಿಗೊಳಗಾಗಿತ್ತು.

ಒಟ್ಟಿನಲ್ಲಿ 2019 ವಿಶ್ವಕಪ್‌ಗೆ ಸಿದ್ಧತೆ ನಡೆಸುತ್ತಿರುವ ಭಾರತಕ್ಕೆ ಐದನೇ ರ‍್ಯಾಂಕ್‌ನ ಕಿವೀಸ್ ಸವಾಲಾಗಲಿದೆಯೇ ಎಂಬುದಕ್ಕೆ ಭಾನುವಾರದಿಂದ ಉತ್ತರ ಸಿಗಲಿದೆ.