Ind vs Pak: ಸಾನಿಯಾ ಮಿರ್ಜಾ ಯಾರಿಗೆ ಬೆಂಬಲ?

ಹೊಸದಿಲ್ಲಿ: ಭಾರತ-ಪಾಕಿಸ್ತಾನದ ಹೈವೋಲ್ಟೇಜ್ ಕದನಕ್ಕೆ ಕೌಂಟ್‌ಡೌನ್ ಶುರುವಾಗಿದೆ. ಕ್ರಿಕೆಟ್ ಅಭಿಮಾನಿಗಳು ಕಾತುರದಿಂದ ಎದುರುನೋಡುತ್ತಿದ್ದಾರೆ. ಇನ್ನು ಆಟಗಾರರಿಗೂ ಟೆನ್ಷನ್ ತಪ್ಪಿದ್ದಲ್ಲ. ಮ್ಯಾಚ್ ಏನಾಗುತ್ತದೋ ಎಂದು ಅಭಿಮಾನಿಗಳಿಗೆ ಮತ್ತೊಂದು ಕಡೆ ಟೆನ್ಷನ್. ಇವರೆಲ್ಲರಿಗಿಂತ ಈಗ ಹೆಚ್ಚು ಟೆನ್ಷನ್‌ಗೆ ಒಳಗಾಗಿರುವುದು ಟೆನ್ನಿಸ್ ತಾರೆ ಸಾನಿಯಾ ಮಿರ್ಜಾ.

ಪಾಕ್ ಕ್ರಿಕೆಟಿಗ ಶೋಯಬ್ ಮಾಲಿಕ್‌ರನ್ನು ಸಾನಿಯಾ ಮದುವೆ ಮಾಡಿಕೊಂಡಿದ್ದು ಗೊತ್ತೇ ಇದೆ. ಈ ಹಿನ್ನೆಲೆಯಲ್ಲಿ ನೇಟಿಜನ್ ಒಬ್ಬರು ಸಾನಿಯಾರನ್ನು "ನೀವು ಯಾವ ತಂಡವನ್ನು ಬೆಂಬಲಿಸುತ್ತಿದ್ದೀರಿ?" ಎಂದು ಪ್ರಶ್ನಿಸಿದ್ದಾರೆ. ಇದಕ್ಕೆ ಉತ್ತರಿಸಿರುವ ಸಾನಿಯಾ, ತಾನು ಕೆಲವು ದಿನಗಳ ಮಟ್ಟಿಗೆ ಸಾಮಾಜಿಕ ಮಾಧ್ಯಮದಿಂದ ದೂರ ಉಳಿಯುತ್ತೇನೆ ಎಂದು ಉತ್ತರಿಸಿದ್ದಾರೆ.


ಈ ಬಗ್ಗೆ ಟ್ವೀಟ್ ಮಾಡಿರುವ ಅವರು, "ಮ್ಯಾಚ್ ಪ್ರಾರಂಭವಾಗಲು 24 ಗಂಟೆ ಸಹ ಇಲ್ಲ. ಕೆಲವು ದಿನಗಳ ಕಾಲ ಸಾಮಾಜಿಕ ಮಾಧ್ಯಮದಿಂದ ದೂರ ಉಳಿಯುವುದು ಉತ್ತಮ. ಇಲ್ಲದಿದ್ದರೆ ಅಸಂಬದ್ಧ ಮಾತುಗಳನ್ನು ಕೇಳಬೇಕಾಗುತ್ತದೆ. ಇದೆಲ್ಲಾ ಕೇಳುತ್ತಿದ್ದರೆ ಆರೋಗ್ಯವಾಗಿರುವ ವ್ಯಕ್ತಿಗೂ ಜ್ವರ ಬರುತ್ತದೆ. ಗರ್ಭಿಣಿಯಾಗಿರುವ ನನ್ನ ಪರಿಸ್ಥಿತಿ ಇನ್ನೆಷ್ಟು ಶೋಚನೀಯವಾಗಿರುತ್ತದೆ ಎಂಬುದನ್ನು ಊಹಿಸಿ" ಎಂದಿದ್ದಾರೆ.

"ಹಾಗಾಗಿ ಕೆಲವು ದಿನಗಳ ಮಟ್ಟಿಗೆ ಸಾಮಾಜಿಕ ಮಾಧ್ಯಮದಿಂದ ದೂರ ಇರುತ್ತೇನೆ. ಆದರೆ ನೀವೆಲ್ಲಾ ಒಂದನ್ನು ನೆನಪಿಡಿ. ಇದು ಕೇವಲ ಕ್ರಿಕೆಟ್ ಮ್ಯಾಚ್ ಮಾತ್ರ" ಎಂದು ಟ್ವೀಟ್ ಮಾಡಿ ಎಲ್ಲರ ಗಮನಸೆಳೆದಿದ್ದಾರೆ ಸಾನಿಯಾ ಮಿರ್ಜಾ. ಬುಧವಾರ ಸಂಜೆ 5 ಗಂಟೆಗೆ ಭಾರತ-ಪಾಕ್ ನಡುವೆ ಮ್ಯಾಚ್ ಆರಂಭವಾಗಲಿದೆ.