ಇಂದಿನಿಂದ ವೆಸ್ಟ್ ಇಂಡೀಸ್ ವಿರುದ್ಧದ 3ನೇ ಟೆಸ್ಟ್ | ವಿರಾಟ್ ಪಡೆಗೆ ಸರಣಿ ಗೆಲುವಿನ ಗುರಿ
ಸೇಂಟ್ ಲೂಸಿಯಾ: ಕೆರಿಬಿಯನ್ ನಾಡಿನಲ್ಲಿ ಇತಿಹಾಸ ನಿರ್ಮಿಸುವ ಗುರಿಯೊಂದಿಗೆ ಪ್ರವಾಸಿ ಭಾರತ ತಂಡ, ಇಲ್ಲಿ ಮಂಗಳವಾರ ಆರಂಭವಾಗಲಿರುವ 3ನೇ ಟೆಸ್ಟ್ ಪಂದ್ಯದಲ್ಲಿ ಆತಿಥೇಯ ವೆಸ್ಟ್ ಇಂಡೀಸ್ ತಂಡವನ್ನು ಎದುರಿಸಲಿದೆ.
ಇಲ್ಲಿನ ಡರ್ರೆನ್ ಸಾಮಿ ರಾಷ್ಟ್ರೀಯ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆಯುವ ಪಂದ್ಯವನ್ನು ಭಾರತ ಗೆದ್ದರೆ, ವಿಂಡೀಸ್ನಲ್ಲಿ ಆತಿಥೇಯರ ವಿರುದ್ಧದ ಒಂದೇ ಟೆಸ್ಟ್ ಸರಣಿಯಲ್ಲಿ ಮೊದಲ ಬಾರಿ ಎರಡು ಪಂದ್ಯಗಳನ್ನು ಗೆದ್ದ ದಾಖಲೆ ಬರೆಯಲಿದೆ. ಅಲ್ಲದೆ ಈಗಾಗಲೇ ಸರಣಿಯಲ್ಲಿ 1-0 ಅಂತರದಲ್ಲಿ ಮುನ್ನಡೆ ಪಡೆದಿರುವ ಟೀಮ್ ಇಂಡಿಯಾ, ನಾಲ್ಕು ಪಂದ್ಯಗಳ ಸರಣಿಯನ್ನೂ ತನ್ನದಾಗಿಸಿಕೊಳ್ಳಲಿದೆ.
ಆಂಟಿಗುವಾದಲ್ಲಿ ನಡೆದ ಮೊದಲ ಟೆಸ್ಟ್ ಪಂದ್ಯವನ್ನು ಇನಿಂಗ್ಸ್ ಹಾಗೂ 92 ರನ್ಗಳಿಂದ ಜಯಿಸಿದ್ದ ಭಾರತಕ್ಕೆ ಕಿಂಗ್ಸ್ಟನ್ನಲ್ಲಿ ನಡೆದ ಎರಡನೇ ಪಂದ್ಯದಲ್ಲಿ ಗೆಲುವು ಕೈ ತಪ್ಪಿತ್ತು. ವಿಂಡೀಸ್ ಆಲ್ರೌಂಡರ್ ರಾಸ್ಟನ್ ಚೇಸ್ ಶತಕ ಬಾರಿಸಿ ವಿರಾಟ್ ಪಡೆಗೆ ಗೆಲುವು ತಪ್ಪಿಸಿ ಪಂದ್ಯವನ್ನು ಡ್ರಾಗೊಳಿಸಿದ್ದರು.
ರಾಹುಲ್, ರಹಾನೆ ಮೇಲೆ ನಿರೀಕ್ಷೆ
ದ್ವಿತೀಯ ಟೆಸ್ಟ್ನಲ್ಲಿ ಆಕರ್ಷಕ ಶತಕ ದಾಖಲಿಸಿದ್ದ ರಾಜ್ಯದ ಆರಂಭಿಕ ಬ್ಯಾಟ್ಸ್ಮನ್ ಕೆ.ಎಲ್ ರಾಹುಲ್ ಅವರ ಮೇಲೆ ಕುತೂಲಹದ ಕಣ್ಣು ನೆಟ್ಟಿದೆ. ಗಾಯಾಳು ಮುರಳಿ ವಿಜಯ್ ಅನುಪಸ್ಥಿತಿಯಲ್ಲಿ ಶಿಖರ್ ಧವನ್ ಜತೆ ಇನಿಂಗ್ಸ್ ಆರಂಭಿಸಿದ್ದ ರಾಹುಲ್ 158 ರನ್ ಗಳಿಸಿ ಮಿಂಚಿದ್ದರು. ಅಲ್ಲದೆ ಜಮೈಕಾ ಟೆಸ್ಟ್ನ ಮತ್ತೊಬ್ಬ ಶತಕವೀರ ಅಜಿಂಕ್ಯ ರಹಾನೆ, ನಾಯಕ ವಿರಾಟ್ ಭಾರತದ ಬ್ಯಾಟಿಂಗ್ ಶಕ್ತಿಗಳಾಗಿದ್ದಾರೆ. ಬೌಲಿಂಗ್ನಲ್ಲಿ ವೇಗಿಗಳಾದ ಇಶಾಂತ್ ಶರ್ಮಾ, ಮೊಹಮ್ಮದ್ ಶಮಿ, ಉಮೇಶ್ ಯಾದವ್, ಸ್ಪಿನ್ನರ್ಗಳಾದ ರವಿಚಂದ್ರನ್ ಅಶ್ವಿನ್ ಹಾಗೂ ಅಮಿತ್ ಮಿಶ್ರಾ ಉತ್ತಮ ಫಾರ್ಮ್ನಲ್ಲಿರುವುದು ಭಾರತದ ಬಲವನ್ನು ಹೆಚ್ಚಿಸಿದೆ.
ಭಾರತ ಗೆದ್ದರೆ ವಿರಾಟ್ ದಾಖಲೆ
3ನೇ ಟೆಸ್ಟ್ನಲ್ಲಿ ಟೀಮ್ ಇಂಡಿಯಾ ಗೆದ್ದರೆ ವಿಂಡೀಸ್ ನೆಲದಲ್ಲಿ ಒಂದೇ ಸರಣಿಯಲ್ಲಿ ಎರಡು ಗೆಲುವು ತಂದುಕೊಟ್ಟ ಭಾರತದ ಮೊದಲ ನಾಯಕ ಎಂಬ ಹಿರಿಮೆಗೆ ವಿರಾಟ್ ಕೊಹ್ಲಿ ಪಾತ್ರರಾಗಲಿದ್ದಾರೆ. ಇದುವರೆಗೆ 10 ನಾಯಕರು ಕೆರಿಬಿಯನ್ ನಾಡಿನಲ್ಲಿ ಭಾರತ ತಂಡವನ್ನು ಮುನ್ನಡೆಸಿದ್ದು 1971ರಲ್ಲಿ ಅಜಿತ್ ವಾಡೇಕರ್, 1976ರಲ್ಲಿ ಬಿಷನ್ ಸಿಂಗ್ ಬೇಡಿ, 2002ರಲ್ಲಿ ಸೌರವ್ ಗಂಗೂಲಿ, 2006ರಲ್ಲಿ ರಾಹುಲ್ ದ್ರಾವಿಡ್ ಮತ್ತು 2011ರಲ್ಲಿ ಎಂ.ಎಸ್ ಧೋನಿ ಸಾರಥ್ಯದಲ್ಲಿ ಭಾರತ ತಲಾ ಒಂದು ಪಂದ್ಯಗಳನ್ನು ಗೆದ್ದಿದೆ.
ಒತ್ತಡದಲ್ಲಿ ವಿಂಡೀಸ್
ಮತ್ತೊಂದೆಡೆ ದ್ವಿತೀಯ ಟೆಸ್ಟ್ನಲ್ಲಿ ಸೋಲು ತಪ್ಪಿಸಿಕೊಂಡಿದ್ದ ವಿಂಡೀಸ್ ಸರಣಿ ಸಮಬಲಕ್ಕೆ ಕಾತರಿಸುತ್ತಿದೆ. ಆದರೆ ರಾಸ್ಟನ್ ಚೇಸ್, ಜರ್ಮೈನ್ ಬ್ಲಾಕ್ವುಡ್ ಹೊರತಾಗಿ ಉಳಿದ ಬ್ಯಾಟ್ಸ್ಮನ್ಗಳ ವೈಫಲ್ಯ, ಬೌಲರ್ಗಳ ಸತ್ವಹೀನ ಪ್ರದರ್ಶನ ತಂಡಕ್ಕೆ ಹಿನ್ನಡೆಯಾಗಿದೆ. ಹೀಗಾಗಿ ವಿರಾಟ್ ಬಳಗ 3ನೇ ಟೆಸ್ಟ್ ಪಂದ್ಯವನ್ನು ಗೆಲ್ಲುವ ನೆಚ್ಚಿನ ತಂಡವಾಗಿ ಕಣಕ್ಕಿಳಿಯಲಿದೆ.
ತಂಡಗಳ ವಿವರ
ಭಾರತ: ವಿರಾಟ್ ಕೊಹ್ಲಿ (ನಾಯಕ), ಕೆ.ಎಲ್.ರಾಹುಲ್, ಶಿಖರ್ ಧವನ್, ಚೇತೇಶ್ವರ್ ಪೂಜಾರ, ಅಜಿಂಕ್ಯ ರಹಾನೆ, ವೃದ್ಧಿಮಾನ್ ಸಹಾ, ರವಿಚಂದ್ರನ್ ಅಶ್ವಿನ್, ಅಮಿತ್ ಮಿಶ್ರಾ, ಇಶಾಂತ್ ಶರ್ಮಾ, ಮೊಹಮ್ಮದ್ ಶಮಿ, ಉಮೇಶ್ ಯಾದವ್, ಮುರಳಿ ವಿಜಯ್, ರೋಹಿತ್ ಶರ್ಮಾ, ರವೀಂದ್ರ ಜಡೇಜಾ, ಸ್ಟುವರ್ಟ್ ಬಿನ್ನಿ, ಭುವನೇಶ್ವರ್ ಕುಮಾರ್ ಮತ್ತು ಶಾರ್ದೂಲ್ ಠಾಕೂರ್.
ವೆಸ್ಟ್ ಇಂಡೀಸ್: ಜೇಸನ್ ಹೋಲ್ಡರ್ (ನಾಯಕ), ಕ್ರೇಗ್ ಬ್ರಾತ್ವೇಟ್, ಶಾಯ್ ಹೋಪ್, ಜರ್ಮೈನ್ ಬ್ಲಾಕ್ವುಡ್, ಕಾರ್ಲೋಸ್ ಬ್ರಾತ್ವೇಟ್, ಡರ್ರೆನ್ ಬ್ರಾವೊ, ಮರ್ಲಾನ್ ಸ್ಯಾಮುಯೆಲ್ಸ್, ದೇವೇಂದ್ರ ಬಿಶೂ, ರಾಸ್ಟನ್ ಚೇಸ್, ಮಿಗ್ಯುಲ್ ಕಮಿನ್ಸ್, ಶೇನ್ ಡೌರಿಚ್, ಶನನ್ ಗೇಬ್ರಿಯೆಲ್, ಲೀನ್ ಜಾನ್ಸನ್ ಮತ್ತು ಅಲ್ಜರಿ ಜೋಸೆಫ್.
ಪಂದ್ಯ ಆರಂಭ: ರಾತ್ರಿ 7.30ಕ್ಕೆ (ಭಾರತೀಯ ಕಾಲಮಾನ)
ಸ್ಥಳ: ಡರ್ರೆನ್ ಸಾಮಿ ರಾಷ್ಟ್ರೀಯ ಕ್ರಿಕೆಟ್ ಕ್ರೀಡಾಂಗಣ, ಸೇಂಟ್ ಲೂಸಿಯಾ
ನೇರ ಪ್ರಸಾರ: ಟೆನ್ ಸ್ಪೋರ್ಟ್ಸ್
ಐಸಿಸಿ ರಾರಯಂಕಿಂಗ್
ಭಾರತ: 02
ವೆಸ್ಟ್ ಇಂಡೀಸ್: 08