ಆಸೀಸ್‌ಗಿಂತಲೂ ತೀವ್ರ ಪೈಪೋಟಿ ಒಡ್ಡಲಿದ್ದೇವೆ: ವಿರಾಟ್

ಲಂಡನ್: ಆಸ್ಟ್ರೇಲಿಯಾ ವಿರುದ್ಧದ ಏಕದಿನ ಸರಣಿಯಲ್ಲಿ 5-0 ಅಂತರದ ವೈಟ್‌ವಾಶ್ ಬಳಿದಿರುವ ಆತಿಥೇಯ ಇಂಗ್ಲೆಂಡ್ ಬಳಿಕ ನಡೆದ ಏಕೈಕ ಟ್ವೆಂಟಿ-20 ಪಂದ್ಯದಲ್ಲೂ ಗೆಲುವು ದಾಖಲಿಸಿತ್ತು.

ಈ ಬಗ್ಗೆ ತಲೆಕೆಡಿಸಿಕೊಳ್ಳದ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ, ಇಂಗ್ಲೆಂಡ್ ವಿರುದ್ಧ ಅವರದ್ದೇ ನಾಡಿನಲ್ಲಿ ಆಸೀಸ್‌ಗಿಂತಲೂ ತೀವ್ರ ಪೈಪೋಟಿ ಒಡ್ಡುವ ಭರವಸೆ ನೀಡಿದ್ದಾರೆ.

ಇಂಗ್ಲೆಂಡ್ ವಿರುದ್ಧದ ಟ್ವೆಂಟಿ-20, ಏಕದಿನ ಹಾಗೂ ಟೆಸ್ಟ್ ಸರಣಿಯಲ್ಲಿ ಕಠಿಣ ಪೈಪೋಟಿ ನಿರೀಕ್ಷೆ ಮಾಡುವುದಾಗಿ ಕೊಹ್ಲಿ ಹೇಳಿದರು.

"ನಮಗೆ ನಮ್ಮ ಸಾಮರ್ಥ್ಯದಲ್ಲಿ ನಂಬಿಕೆಯಿದೆ. ನಿಸ್ಸಂಶಯವಾಗಿಯೂ ಗರಿಷ್ಠ ಟ್ವೆಂಟಿ-20 ಅನುಭವವನ್ನು ಪಡೆದಿದ್ದೇವೆ. ನಾವು ಐಪಿಎಲ್‌ ಮುಗಿಸಿ ಬಂದಿದ್ದು, ಐರ್ಲೆಂಡ್ ವಿರುದ್ಧವೂ ಉತ್ತಮ ಪ್ರದರ್ಶನ ನೀಡಿದ್ದೇವೆ" ಎಂದರು.

"ಅದೇ ಹೊತ್ತಿಗೆ ಧನಾತ್ಮಕ ಕ್ರಿಕೆಟ್ ಆಡಲು ಬಯಸುವುದಾಗಿ ಕೊಹ್ಲಿ ತಿಳಿಸಿದರು. ಸರಣಿಯು ಅತ್ಯಂತ ಉತ್ಸಾಹ ಭರಿತವಾಗಲಿದ್ದು, ನಿರ್ಣಾಯಕ ಕ್ಷಣಗಳನ್ನು ಗೆದ್ದರೆ ಏನು ಬೇಕಾದರೂ ಸಂಭವಿಸಬಹುದು" ಎಂದು 29ರ ಹರೆಯದ ಕೊಹ್ಲಿ ಸೇರಿಸಿದರು.