ಲಾಸ್ಟ್ ಬಾಲ್ ಫಿನಿಶ್; ದ.ಆಫ್ರಿಕಾ ವಿರುದ್ಧ ಭಾರತ ಮಹಿಳಾ ತಂಡಕ್ಕೆ ರೋಚಕ ಗೆಲುವು

ಕೊಲಂಬೊ: ಅಂತರಾಷ್ಟ್ರೀಯ ಮಹಿಳಾ ವಿಶ್ವಕಪ್ ಅರ್ಹತಾ ಸುತ್ತಿನ ಫೈನಲ್ ಪಂದ್ಯದಲ್ಲಿ ಕೊನೆಯ ಎಸೆತದಲ್ಲಿ ಗೆಲುವು ದಾಖಲಿಸಿರುವ ಭಾರತೀಯ ಮಹಿಳಾ ತಂಡ, ಅಮೋಘ ಸಾಧನೆ ಮಾಡಿದೆ. ಗೆಲುವಿಗಾಗಿ 245 ರನ್ ಗುರಿ ಬೆನ್ನತ್ತಿದ್ದ ಭಾರತ ಒಂಬತ್ತು ವಿಕೆಟ್ ನಷ್ಟಕ್ಕೆ ಗುರಿ ತಲುಪುವ ಮೂಲಕ ಒಂದು ವಿಕೆಟ್ ಅಂತರದ ರೋಚಕ ಗೆಲುವು ದಾಖಲಿಸಿದೆ.

41 ಎಸೆತಗಳಲ್ಲಿ ಎರಡು ಬೌಂಡರಿ ಹಾಗೂ ಸಿಕ್ಸರ್ ನೆರವಿನಿಂದ 41 ರನ್ ಗಳಿಸಿದ ನಾಯಕಿ ಹಮನ್‌ಪ್ರೀತ್ ಕೌರ್ ತಂಡದ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ್ದರು. ಕೊನೆಯ ಎರಡು ಎಸೆತಗಳಲ್ಲಿ ಅನುಕ್ರಮವಾಗಿ ಸಿಕ್ಸರ್ ಹಾಗೂ ಎರಡು ರನ್ ಬಾರಿಸಿದ ಕೌರ್ ತಂಡವನ್ನು ಗೆಲುವಿನ ಗೆರೆ ದಾಟಿಸಿದರು.

ಆಕರ್ಷಕ ಅರ್ಧಶತಕ ಬಾರಿಸಿದ ದೀಪ್ತಿ ಶರ್ಮಾ ಹಾಗೂ ಆರಂಭಿಕ ಆಟಗಾರ್ತಿ ಮೋನಾ ಮೆಶ್ರಂ (51) ಭಾರತಕ್ಕೆ ಅತ್ಯುತ್ತಮ ಆರಂಭವೊದಗಿಸಿದರು. ಇನ್ನುಳಿದಂತೆ ವೇದಾ ಕೃಷ್ಣಮೂರ್ತಿ 31 ರನ್‌ಗಳ ಇನ್ನಿಂಗ್ಸ್ ಕಟ್ಟಿದರು.

ಇದಕ್ಕೂ ಮೊದಲು ಬ್ಯಾಟಿಂಗ್ ನಡೆಸಿದ್ದ ದಕ್ಷಿಣ ಆಫ್ರಿಕಾ 49.4 ಓವರ್‌ಗಳಲ್ಲಿ 244 ರನ್‌ಗಳಿಗೆ ತನ್ನೆಲ್ಲ ವಿಕೆಟ್‌ಗಳನ್ನು ಕಳೆದುಕೊಂಡಿತ್ತು. ದಕ್ಷಿಣ ಆಫ್ರಿಕಾ ಇನ್ನಿಂಗ್ಸ್‌ನಲ್ಲಿ ಒಂದೇ ಒಂದು ಅರ್ಧಶತಕ ಕೂಡಾ ದಾಖಲಾಗಿರಲಿಲ್ಲ. ತಂಡದ ಪರ ಪಿಗ್ನಾನ್ ಡು ಫ್ರೀಜ್ ಗರಿಷ್ಠ 40 ರನ್ ಗಳಿಸಿದರು. ಭಾರತದ ಪರ ಮೂರು ವಿಕೆಟ್ ಕಬಳಿಸಿದ ರಾಜೇಶ್ವರಿ ಗಾಯಕ್‌ವಾಡ್ ಮಿಂಚಿದರು.

2017ನೇ ಸಾಲಿನ ಐಸಿಸಿ ಮಹಿಳಾ ವಿಶ್ವಕಪ್ ಜೂನ್ ತಿಂಗಳಲ್ಲಿ ಇಂಗ್ಲೆಂಡ್‌ನಲ್ಲಿ ನಡೆಯಲಿದೆ. ಭಾರತ ಸೇರಿದಂತೆ ದಕ್ಷಿಣ ಆಫ್ರಿಕಾ, ಪಾಕಿಸ್ತಾನ, ಶ್ರೀಲಂಕಾ, ಇಂಗ್ಲೆಂಡ್, ಆಸ್ಟ್ರೇಲಿಯಾ, ನ್ಯೂಜಿಲೆಂಡ್, ವೆಸ್ಟ್ಇಂಡೀಸ್ ತಂಡಗಳು ಭಾಗವಹಿಸಲಿದೆ.