ಶಂಕಾಸ್ಪದ ಬೌಲಿಂಗ್‌ ಸುಳಿಗೆ ರಾಯುಡು

ದುಬೈ : ಭಾರತ ತಂಡದ ಪ್ರಮುಖ ಬ್ಯಾಟ್ಸ್‌ಮನ್‌ ಹಾಗೂ ಸಾಂದರ್ಭಿಕ ಆಫ್‌ ಸ್ಪಿನ್ನರ್‌ ಅಂಬಾಟಿ ರಾಯುಡು, ಆತಿಥೇಯ ಆಸ್ಪ್ರೇಲಿಯಾ ವಿರುದ್ಧದ ಪ್ರಸಕ್ತ ಏಕದಿನ ಕ್ರಿಕೆಟ್‌ ಸರಣಿಯ ಮೊದಲ ಪಂದ್ಯದ ವೇಳೆ ಶಂಕಾಸ್ಪದ ಬೌಲಿಂಗ್‌ ಕಳಂಕ ಎದುರಿಸಿದ್ದಾರೆ.

ಸಿಡ್ನಿಯಲ್ಲಿ ಕಳೆದ ಶನಿವಾರ ನಡೆದ ಪಂದ್ಯದಲ್ಲಿ 3 ಪಂದ್ಯಗಳ ಸರಣಿಯ ಮೊದಲ ಪಂದ್ಯದ ವೇಳೆ ರಾಯುಡು 2 ಓವರ್‌ ಬೌಲಿಂಗ್‌ ನಡೆಸಿ 13 ರನ್‌ಗಳನ್ನು ಬಿಟ್ಟುಕೊಟ್ಟಿದ್ದರು.

''ಪಂದ್ಯದ ಅಧಿಕಾರಿಗಳು 33 ವರ್ಷದ ಆಟಗಾರನ ಆಫ್‌ ಸ್ಪಿನ್‌ ಬೌಲಿಂಗ್‌ ಶೈಲಿ ಕಾನೂನುಬದ್ಧವಾಗಿಲ್ಲ ಎಂದು ವರದಿ ಮಾಡಿದ್ದು, ಈ ವಿಚಾರವನ್ನು ಭಾರತ ತಂಡದ ಮ್ಯಾನೇಜ್ಮೆಂಟ್‌ ಗಮನಕ್ಕೆ ತರಲಾಗಿದೆ. ಟೆಸ್ಟ್‌, ಏಕದಿನ ಹಾಗೂ ಟಿ20ಐ ಪಂದ್ಯಗಳಲ್ಲಿ ರಾಯುಡು ಅವರ ಬೌಲಿಂಗ್‌ ಶೈಲಿಯನ್ನು ಮತ್ತಷ್ಟು ಗಂಭೀರವಾಗಿ ಪರಿಶೀಲಿಸಲಾಗುವುದು. ಮುಂದಿನ 14 ದಿನಗಳ ಒಳಗಾಗಿ ಅವರು ಬೌಲಿಂಗ್‌ ಶೈಲಿ ಪರೀಕ್ಷೆಗೆ ಒಳಪಡಬೇಕು. ಇದರ ಫಲಿತಾಂಶ ಹೊರಬರುವ ವರೆಗೂ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತಮ್ಮ ಬೌಲಿಂಗ್‌ ಮುಂದುವರಿಸಬಹುದು,'' ಎಂದು ಐಸಿಸಿ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.

ರಾಯುಡು ತಮ್ಮ ಏಕದಿನ ಕ್ರಿಕೆಟ್‌ ವೃತ್ತಿ ಬದುಕಿನಲ್ಲಿ ಈವರೆಗೆ 20.1 ಓವರ್‌ಗಳನ್ನು ಎಸೆದಿದ್ದು, 3 ವಿಕೆಟ್‌ ಪಡೆದಿದ್ದಾರೆ. ಇನ್ನು ಆಡಿರುವ 6 ಟಿ20ಐ ಪಂದ್ಯಗಳಲ್ಲಿ ಯಾವುದೇ ಬೌಲಿಂಗ್‌ ನಡೆಸಿಲ್ಲ. ಸೀಮಿತ ಓವರ್‌ಗಳ ಕ್ರಿಕೆಟ್‌ ಕಡೆಗೆ ಹೆಚ್ಚು ಏಕಾಗ್ರತೆ ವಹಿಸುವ ಉದ್ದೇಶದಿಂದ ಕಳೆದ ವರ್ಷ ನವೆಂಬರ್‌ನಲ್ಲಿ ರಾಯುಡು ಪ್ರಥಮ ದರ್ಜೆ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದರು.