ಹೊಸದಿಲ್ಲಿ: ಪ್ಲೇ ಆಫ್‌ ಹಾದಿಯನ್ನು ಮತ್ತಷ್ಟು ಸುಗಮಗೊಳಿಸಿಕೊಳ್ಳುವ ಗುರಿಯೊಂದಿಗೆ ಹಾಲಿ ಚಾಂಪಿಯನ್‌ ಸನ್‌ರೈಸರ್ಸ್‌ ಹೈದರಾಬಾದ್‌ ತಂಡ, ಐಪಿಎಲ್‌-10ರ ತನ್ನ 11ನೇ ಪಂದ್ಯದಲ್ಲಿ ಡೆಲ್ಲಿ ಡೇರ್‌ ಡೆವಿಲ್ಸ್‌ ತಂಡವನ್ನು ಎದುರಿಸಲಿದೆ.
ಫಿರೋಜ್‌ ಶಾ ಕೋಟ್ಲಾ ಮೈದಾನದಲ್ಲಿ ನಡೆಯುವ ಪಂದ್ಯ ಆತಿಥೇಯ ಡೆಲ್ಲಿ ಪಾಲಿಗೆ ಅಳಿವು-ಉಳಿವಿನ ಪಂದ್ಯವಾಗಿದೆ. ಏ.19ರಂದು ಹೈದರಾಬಾದ್‌ನಲ್ಲಿ ಎದುರಾದ ಸನ್‌ರೈಸರ್ಸ್‌ ವಿರುದ್ಧದ ಪರಾಜಯ ಸೇರಿದಂತೆ ಸತತ ಐದು ಸೋಲು ಕಂಡಿರುವ ಡೆಲ್ಲಿ, ಪ್ಲೇ ಆಫ್‌ ಕನಸನ್ನು ಜೀವಂತವಾಗಿಟ್ಟುಕೊಳ್ಳಬೇಕಾದರೆ ಮುಂದಿನ ಎಲ್ಲಾ ಪಂದ್ಯಗಳನ್ನು ಗೆಲ್ಲಲೇಬೇಕಾದ ಒತ್ತಡದಲ್ಲಿದೆ.
ಯುವ ಬ್ಯಾಟಿಂಗ್‌ ಪಡೆಯ ದಯನೀಯ ವೈಫಲ್ಯ ಡೆಲ್ಲಿಯ ಹೀನಾಯ ಪ್ರದರ್ಶನಕ್ಕೆ ಕಾರಣವಾಗಿದೆ. ಅದರಲ್ಲೂ ಕರ್ನಾಟಕದ ಆಟಗಾರ ಕರುಣ್‌ ನಾಯರ್‌ 8 ಪಂದ್ಯಗಳಲ್ಲಿ ಕೇವಲ 12.71ರ ಸರಾಸರಿಯೊಂದಿಗೆ 89 ರನ್‌ ಮಾತ್ರ ಗಳಿಸಿದ್ದಾರೆ. ಬ್ಯಾಟಿಂಗ್‌ ವೈಫಲ್ಯದ ನಡುವೆಯೂ ಕರುಣ್‌, ಕಳೆದ ಪಂದ್ಯದಲ್ಲಿ ಜಹೀರ್‌ ಖಾನ್‌ ಅಲಭ್ಯತೆಯಿಂದಾಗಿ ತಂಡವನ್ನು ಮುನ್ನಡೆಸುವ ಅವಕಾಶ ಪಡೆದಿದ್ದರು. ಕಿಂಗ್ಸ್‌ ಇಲೆವೆನ್‌ ವಿರುದ್ಧದ ಆ ಪಂದ್ಯದಲ್ಲಿ ಡೆಲ್ಲಿ 67 ರನ್‌ಗಳಿಗೆ ಆಲ್‌ಔಟಾಗಿತ್ತು.
ಮತ್ತೊಂದೆಡೆ ಟೂರ್ನಿಯಲ್ಲಿ 7ನೇ ಗೆಲುವನ್ನು ಎದುರು ನೋಡುತ್ತಿರುವ ಸನ್‌ರೈಸರ್ಸ್‌ ಗೆಲ್ಲುವ ನೆಚ್ಚಿನ ತಂಡವಾಗಿದೆ. ಬಲಿಷ್ಠ ಕೋಲ್ಕೊತಾ ನೈಟ್‌ ರೈಡರ್ಸ್‌ ವಿರುದ್ಧದ ಪಂದ್ಯದಲ್ಲಿ ಸಿಡಿಲಬ್ಬರದ ಶತಕ ಸಿಡಿಸಿದ್ದ ನಾಯಕ ಡೇವಿಡ್‌ ವಾರ್ನರ್‌, ನ್ಯೂಜಿಲೆಂಡ್‌ ತಂಡದ ನಾಯಕ ಕೇನ್‌ ವಿಲಿಯಮ್ಸನ್‌, ಮಧ್ಯಮ ವೇಗಿ ಭುವನೇಶ್ವರ್‌ ಕುಮಾರ್‌ ಅಮೋಘ ಫಾರ್ಮ್‌ನಲ್ಲಿರುವುದು ತಂಡದ ಬಲವನ್ನು ಹೆಚ್ಚಿಸಿದೆ. ಅಲ್ಲದೆ ದೇಶೀಯ ಪ್ರತಿಭೆ ಮೊಹಮ್ಮದ್‌ ಸಿರಾಜ್‌, ಅಫಘಾನಿಸ್ತಾನದ ಲೆಗ್‌ಸ್ಪಿನ್ನರ್‌ ರಶೀದ್‌ ಖಾನ್‌ ತಂಡದ ಬೌಲಿಂಗ್‌ಗೆ ಇನ್ನಷ್ಟು ಶಕ್ತಿ ತುಂಬಿದ್ದಾರೆ.
ಸ್ಟಾರ್‌ ಆಟಗಾರರು
ಡೆಲ್ಲಿ ಹೈದರಾಬಾದ್‌
ರಿಷಭ್‌ ಪಂತ್‌ ಡೇವಿಡ್‌ ವಾರ್ನರ್‌
ಶ್ರೇಯಸ್‌ ಅಯ್ಯರ್‌ ಕೇನ್‌ ವಿಲಿಯಮ್ಸನ್‌
ಕ್ರಿಸ್‌ ಮೊರಿಸ್‌ ಮೊಯ್ಸೆಸ್‌ ಹೆನ್ರಿಕ್ಸ್‌
ಕಗಿಸೊ ರಬಾಡ ಭುವನೇಶ್ವರ್‌ ಕುಮಾರ್‌
ಮುಖಾಮುಖಿ: 09
ಡೆಲ್ಲಿ ಗೆಲುವು: 03
ಹೈದರಾಬಾದ್‌ ಗೆಲುವು: 06