ಅಬ್ಬಬ್ಬಾ, 20 ಲಕ್ಷ ಮೂಲಬೆಲೆಯ ಕನ್ನಡಿಗ ಗೌತಮ್ ಸೇಲ್ ಆಗಿದ್ದು 6.2 ಕೋಟಿ ರೂ.ಗೆ!

ಬೆಂಗಳೂರು: ಇಂಡಿಯನ್‌ ಪ್ರೀಮಿಯರ್‌ ಲೀಗ್‌(ಐಪಿಎಲ್‌) 2018ನೇ ಸಾಲಿನ ಆಟಗಾರರ ಹರಾಜು ಪ್ರಕ್ರಿಯೆ ಎರಡನೇ ದಿನವಾದ ಇಂದು (ಭಾನುವಾರ) ಕೂಡಾ ಭರದಿಂದ ಸಾಗುತ್ತಿದೆ.

ಈ ನಡುವೆ ಕರ್ನಾಟಕದ ಭರವಸೆಯ ಸ್ಪಿನ್ನರ್ ಗೌತಮ್ ಕೃಷ್ಣಪ್ಪ ಬರೋಬ್ಬರಿ 6.2 ಕೋಟಿ ರೂಪಾಯಿಗಳಿಗೆ ಸೇಲ್ ಆಗಿದ್ದಾರೆ.

20 ಲಕ್ಷ ರೂ. ಮೂಲಬೆಲೆಯ ಗೌತಮ್ ಅವರನ್ನು ಖರೀದಿಸಲು ಫ್ರಾಂಚೈಸಿಗಳು ಮುಗಿಬಿದ್ದಿದ್ದವು. ಅಂತಿಮವಾಗಿ ಪಿಂಕ್ ಸಿಟಿಯ ರಾಜಸ್ತಾನ ರಾಯಲ್ಸ್ ಬರೋಬ್ಬರಿ 6.2 ಕೋಟಿ ರೂ. ನೀಡಿ ಖರೀದಿಸಿದ್ದವು.

29ನೇ ಹರೆಯದ ಗೌತಮ್ ಅವರನ್ನು 2017ನೇ ಸಾಲಿನ ಹರಾಜಿನಲ್ಲಿ ಮುಂಬೈ ಇಂಡಿಯನ್ಸ್ 2 ಕೋಟಿ ರೂ. ನೀಡಿ ಖರೀದಿಸಿತ್ತು. ಇದೀಗ ಕಳೆದ ಸಾಲಿನ ರಣಜಿ ಟ್ರೋಫಿಯಲ್ಲಿ ಅಮೋಘ ನಿರ್ವಹಣೆ ನೀಡಿರುವ ಗೌತಮ್ ಅವರನ್ನು ರಾಜಸ್ತಾನ ತನ್ನ ಬಗಲಿಗೆ ಹಾಕಿಕೊಂಡಿದೆ.

ಐಪಿಎಲ್ ಹರಾಜಿನ ಮೊದಲ ದಿನವಾದ ಶನಿವಾರದಂದು ಕರ್ನಾಟಕದ ಆಟಗಾರರಾದ ಭಾರಿ ಬೇಡಿಕೆಯನ್ನು ಕಾಯ್ದುಕೊಂಡಿದ್ದರು. ಮನೀಷ್ ಪಾಂಡೆ, ಕೆಎಲ್ ರಾಹುಲ್ ಭರ್ಜರಿ 11 ಕೋಟಿ ರೂ.ಗಳಿಗೆ ಸೇಲ್ ಆಗಿ ಗಮನ ಸೆಳೆದಿದ್ದರು. ಹಾಗೆಯೇ ಕರುಣ್ ನಾಯರ್ ಹಾಗೂ ರಾಬಿನ್ ಉತ್ತಪ್ಪ ಸಹ ಕೋಟಿ ಕೋಟಿ ರೂ.ಗಳನ್ನು ಗಿಟ್ಟಿಸಿಕೊಂಡಿದ್ದರು.

Gowtham Krishnappa is sold to @rajasthanroyals for a whopping INR 620 lacs VIVO #IPLAuction — IndianPremierLeague (@IPL) January 28, 2018 ಗೌತಮ್ ಕೃಷ್ಣಪ್ಪ
ಮೂಲ ಬೆಲೆ: 20 ಲಕ್ಷ ರೂ.
ಖರೀದಿ: ರಾಜಸ್ತಾನ ರಾಯಲ್ಸ್
ಮಾರಾಟ ಬೆಲೆ: 6.2 ಕೋಟಿ ರೂ.