ಕೆಕೆಆರ್‌ಗೆ ಕಾರಿಯಪ್ಪ ಸೇರ್ಪಡೆ

ಕೋಲ್ಕೊತಾ: ಬೌಲರ್‌ ಶಿವಂ ಮಾವಿ ಗಾಯಗೊಂಡಿರುವ ಹಿನ್ನೆಲೆಯಲ್ಲಿ ಅವರ ಬದಲು ಕರ್ನಾಟಕದ ಕೆ.ಸಿ.ಕಾರಿಯಪ್ಪಗೆ ಸ್ಥಾನ ಕಲ್ಪಿಸಲಾಗಿದೆ ಎಂದು ಐಪಿಎಲ್‌ ಫ್ರಾಂಚೈಸಿ ಕೋಲ್ಕೊತಾ ನೈಟ್‌ರೈಡರ್ಸ್‌ ತಂಡದ ಧಣಿಗಳು ಭಾನುವಾರ ಪ್ರಕಟಣೆ ಹೊರಡಿಸಿದ್ದಾರೆ.

ಬೌಲರ್‌ಗಳಾದ ಕಮ್ಲೇಶ್‌ ನಾಗರೋಟಿ ಮತ್ತು ಶಿವಂ ಮಾವಿ ಗಾಯಗೊಂಡಿರುವ ಕಾರಣ 2019ನೇ ಸಾಲಿನ ಐಪಿಎಲ್‌ಗೆ ಅಲಭ್ಯರಾಗಲಿದ್ದಾರೆ ಎಂದು ಇತ್ತೀಚೆಗೆ ಕೋಲ್ಕೊತಾ ತಂಡ ಘೋಷಿಸಿತ್ತು. ನಾಗರಕೋಟಿ ಬದಲಿಗೆ ಕೇರಳ ವೇಗಿ ಸಂದೀಪ್‌ ವಾರಿಯಸ್‌ ಅವರನ್ನು ಆಯ್ಕೆ ಮಾಡಿಕೊಳ್ಳಲಾಗಿತ್ತು. ಇದೀಗ ಶಿವಂ ಬದಲಿಗೆ ಸ್ಪಿನ್ನರ್‌ ಕೆ.ಸಿ.ಕಾರಿಯಪ್ಪಗೆ ಸ್ಥಾನ ಕಲ್ಪಿಸಲಾಗಿದೆ. ವಿಶೇಷ ಎಂದರೆ ಕೆಕೆಆರ್‌ ಮೂಲಕವೇ ಕಾರಿಯಪ್ಪ ಐಪಿಎಲ್‌ಗೆ ಪದಾರ್ಪಣೆ ಮಾಡಿದ್ದರು.

ಸುನಿಲ್‌ ನರೇನ್‌, ಕುಲ್ದೀಪ್‌ ಯಾದವ್‌ ಮತ್ತು ಪಿಯೂಶ್‌ ಚಾವ್ಲಾ ಜತೆಗೆ ಕಾರಿಯಪ್ಪ ಕೆಕೆಆರ್‌ ತಂಡಕ್ಕೆ ಸೇರ್ಪಡೆಗೊಳ್ಳುವುದರೊಂದಿಗೆ ತಂಡದ ಸ್ಪಿನ್‌ ಬೌಲಿಂಗ್‌ ವಿಭಾಗ ಬಲಗೊಂಡಿದೆ. ಕೋಲ್ಕೊತಾ ತಂಡ ಮಾರ್ಚ್‌ 24ರಂದು ಸನ್‌ರೈಸರ್ಸ್‌ ಹೈದರಾಬಾದ್‌ ವಿರುದ್ಧ ಮೊದಲ ಪಂದ್ಯ ಆಡಲಿದೆ.