ಕರ್ನಾಟಕದ 11 ಆಟಗಾರರು ಒಟ್ಟು 43.30 ಕೋಟಿ ರೂ.ಗಳಿಗೆ ಸೇಲ್
ಸುದರ್ಶನ್
ಬೆಂಗಳೂರು: ಪ್ರಸಕ್ತ ಸಾಲಿನ ಇಂಡಿಯನ್ ಪ್ರೀಮಿಯರ್ ಲೀಗ್(ಐಪಿಎಲ್) ಆಟಗಾರರ ಹರಾಜಿನಲ್ಲಿ ಬೇರೆಲ್ಲಾ ರಾಜ್ಯಗಳಿಗೆ ಹೋಲಿಸಿದರೆ ಕರ್ನಾಟಕದ ಅತಿ ಹೆಚ್ಚು ಆಟಗಾರರು ಒಟ್ಟಾರೆ ಗರಿಷ್ಠ ಮೊತ್ತಕ್ಕೆ ವಿವಿಧ ತಂಡಗಳಿಗೆ ಮಾರಾಟವಾಗಿದ್ದಾರೆ.
ಶನಿವಾರ ಮತ್ತು ಭಾನುವಾರ ನಗರದಲ್ಲಿ ನಡೆದ ಹರಾಜಿನಲ್ಲಿ 8 ಫ್ರಾಂಚೈಸಿಗಳು ಖರೀದಿಸಿದ ಒಟ್ಟು 169 ಆಟಗಾರರಲ್ಲಿ 11 ಮಂದಿ ರಾಜ್ಯದ ಆಟಗಾರರಾಗಿದ್ದಾರೆ. ಈ 11 ಮಂದಿ ಒಟ್ಟಾಗಿ 43.30 ಕೋಟಿ ರೂ.ಗಳನ್ನು ಪಡೆದಿದ್ದಾರೆ. ಒಟ್ಟಾರೆ ಗಳಿಕೆಯಲ್ಲೂ ಕರ್ನಾಟಕದ ಕ್ರಿಕೆಟಿಗರು ಬೇರೆ ರಾಜ್ಯದವರಿಗಿಂತ ಮುಂದಿದ್ದಾರೆ. ಎರಡು ದಿನಗಳ ಕಾಲ ನಡೆದ ಐಪಿಎಲ್ ಹರಾಜಿನಲ್ಲಿ ಫ್ರಾಂಚೈಸಿಗಳು ಒಟ್ಟು 431.70 ಕೋಟಿ ರೂ.ಗಳನ್ನು ವಿನಿಯೋಗಿಸಿದ್ದು, ಇದರಲ್ಲಿ ಭಾರತದ ಆಟಗಾರರ ಪೈಕಿ ರಾಜ್ಯದವರೇ ಸಿಂಹಪಾಲು ಪಡೆದುಕೊಂಡಿದ್ದಾರೆ. ಚೆನ್ನೈ ಸೂಪರ್ ಕಿಂಗ್ಸ್, ಡೆಲ್ಲಿ ಡೇರ್ ಡೆವಿಲ್ಸ್ ಮತ್ತು ಮುಂಬಯಿ ಇಂಡಿಯನ್ಸ್ ಹೊರತು ಪಡಿಸಿದರೆ, ಉಳಿದ ಎಲ್ಲಾ ಫ್ರಾಂಚೈಸಿಗಳು ಕರ್ನಾಟಕದ ಆಟಗಾರರಿಗೆ ಮಣೆ ಹಾಕಿವೆ.
ಮುಖ್ಯವಾಗಿ ರಾಜ್ಯದ ಸ್ಟಾರ್ ಆಟಗಾರರಾದ ಕೆ.ಎಲ್ ರಾಹುಲ್(11 ಕೋಟಿ ರೂ., ಕಿಂಗ್ಸ್ ಇಲೆವೆನ್ ಪಂಜಾಬ್) ಮತ್ತು ಮನೀಶ್ ಪಾಂಡೆ(11 ಕೋಟಿ ರೂ., ಸನ್ರೈಸರ್ಸ್ ಹೈದರಾಬಾದ್) ಒಟ್ಟಾಗಿ 22 ಕೋಟಿ ರೂ.ಗಳನ್ನು ಪಡೆದಿದ್ದಾರೆ. ಅತಿ ಹೆಚ್ಚು ಮೊತ್ತಕ್ಕೆ ಮಾರಾಟವಾದ ಭಾರತದ ಆಟಗಾರರಲ್ಲಿ ಇವರಿಬ್ಬರು ಸೌರಾಷ್ಟ್ರದ ವೇಗಿ ಜೈದೇವ್ ಉನಾದ್ಕಟ್ (11.5 ಕೋಟಿ ರೂ., ರಾಜಸ್ಥಾನ್ ರಾಯಲ್ಸ್) ಅವರ ನಂತರದ ಸ್ಥಾನದಲ್ಲಿದ್ದಾರೆ.
2013-14 ಹಾಗೂ 2014-15ನೇ ಸಾಲಿನಲ್ಲಿ ರಾಜ್ಯ ತಂಡ ಸತತ ಎರಡು ಬಾರಿ ರಣಜಿ ಟ್ರೋಫಿ, ಇರಾನಿ ಕಪ್ ಹಾಗೂ ವಿಜಯ್ ಹಜಾರೆ ಟ್ರೋಫಿಗಳ ಸಹಿತ ಒಟ್ಟು 6 ಟ್ರೋಫಿಗಳನ್ನು ಮುಡಿಗೇರಿಸಿಕೊಂಡ ನಂತರ ಕರ್ನಾಟಕ, ಭಾರತೀಯ ಕ್ರಿಕೆಟ್ನ ಶಕ್ತಿಕೇಂದ್ರವಾಗಿ ರೂಪುಗೊಂಡಿದೆ. ನಾಯಕ ಆರ್.ವಿನಯ್ ಕುಮಾರ್, ವೇಗಿ ಅಭಿಮನ್ಯು ಮಿಥುನ್, ಆಲ್ರೌಂಡರ್ ಸ್ಟುವರ್ಟ್ ಬಿನ್ನಿ ಮತ್ತು ಅನುಭವಿ ಬ್ಯಾಟ್ಸ್ಮನ್ ರಾಬಿನ್ ಉತ್ತಪ್ಪ ಈ ವಿಕ್ರಮಕ್ಕೂ ಮುನ್ನವೇ ಭಾರತ ಪರ ಆಡಿದ್ದರೆ, ಕೆ.ಎಲ್ ರಾಹುಲ್, ಮನೀಶ್ ಪಾಂಡೆ, ಕರುಣ್ ನಾಯರ್, ಎಸ್.ಅರವಿಂದ್ ದೇಶೀಯ ಕ್ರಿಕೆಟ್ನಲ್ಲಿ ಕರ್ನಾಟಕ ತಂಡದ ಸ್ಥಿರ ಪ್ರದರ್ಶನದ ಬಳಿಕ ಕಳೆದ 5 ವರ್ಷಗಳಲ್ಲಿ ರಾಷ್ಟ್ರೀಯ ತಂಡವನ್ನು ಪ್ರತಿನಿಧಿಸಿದ್ದಾರೆ. ಇವರಲ್ಲಿ ರಾಹುಲ್ ಮತ್ತು ಮನೀಶ್ ಪಾಂಡೆ ಪ್ರಸಕ್ತ ಭಾರತ ತಂಡದ ಸದಸ್ಯರಾಗಿದ್ದಾರೆ.
ಈ ಪಾರಮ್ಯ ಈ ಬಾರಿಯ ಐಪಿಎಲ್ ಹರಾಜಿನಲ್ಲೂ ಮುಂದುವರಿದಿದ್ದ, ಕಳೆದ ಬಾರಿಯ ಹರಾಜಿನಲ್ಲೂ ರಾಜ್ಯದ ಅತಿ ಹೆಚ್ಚು 14 ಆಟಗಾರರು ಮಾರಾಟವಾಗಿದ್ದರು.
ಐಪಿಎಲ್ ಹರಾಜು: 2018
11 ಮಾರಾಟವಾದ ಕರ್ನಾಟಕದ ಒಟ್ಟು ಆಟಗಾರರು
43.30 ಕೋಟಿ ರೂ.
ಕರ್ನಾಟಕದ ಆಟಗಾರರು ಪಡೆದ ಒಟ್ಟು ಮೊತ್ತ.
ವಿವಿಧ ತಂಡಗಳಿಗೆ ಮಾರಾಟವಾದ ಕರ್ನಾಟಕದ ಆಟಗಾರರು
ಕೆ.ಎಲ್ ರಾಹುಲ್: 11 ಕೋಟಿ (ಕಿಂಗ್ಸ್ ಇಲೆವೆನ್ ಪಂಜಾಬ್), ಮನೀಶ್ ಪಾಂಡೆ: 11 ಕೋಟಿ (ಸನ್ರೈಸರ್ಸ್ ಹೈದರಾಬಾದ್), ರಾಬಿನ್ ಉತ್ತಪ್ಪ: 6.4 ಕೋಟಿ (ಕೋಲ್ಕೊತಾ ನೈಟ್ ರೈಡರ್ಸ್), ಕೆ.ಗೌತಮ್: 6.2 ಕೋಟಿ (ರಾಜಸ್ಥಾನ್ ರಾಯಲ್ಸ್), ಕರುಣ್ ನಾಯರ್: 5.60 ಕೋಟಿ (ಕಿಂಗ್ಸ್ ಇಲೆವೆನ್ ಪಂಜಾಬ್), ಮಯಾಂಕ್ ಅಗರ್ವಾಲ್: 1 ಕೋಟಿ (ಕಿಂಗ್ಸ್ ಇಲೆವೆನ್ ಪಂಜಾಬ್), ವಿನಯ್ ಕುಮಾರ್: 1 ಕೋಟಿ (ಕೋಲ್ಕೊತಾ ನೈಟ್ ರೈಡರ್ಸ್), ಸ್ಟುವರ್ಟ್ ಬಿನ್ನಿ: 50 ಲಕ್ಷ (ರಾಜಸ್ಥಾನ್ ರಾಯಲ್ಸ್), ಶ್ರೇಯಸ್ ಗೋಪಾಲ್: 20 ಲಕ್ಷ (ರಾಜಸ್ಥಾನ್ ರಾಯಲ್ಸ್), ಅನಿರುದ್ಧ ಜೋಶಿ: 20 ಲಕ್ಷ (ರಾಯಲ್ ಚಾಲೆಂಜರ್ಸ್ ಬೆಂಗಳೂರು), ಪವನ್ ದೇಶಪಾಂಡೆ: 20 ಲಕ್ಷ (ರಾಯಲ್ ಚಾಲೆಂಜರ್ಸ್ ಬೆಂಗಳೂರು).
ಐಪಿಎಲ್ ಹರಾಜಿನಲ್ಲಿ ಮಾರಾಟವಾದ ವಿವಿಧ ರಾಜ್ಯಗಳ ಆಟಗಾರರು (ಟಾಪ್:5)
ಆಟಗಾರರು ರಾಜ್ಯ ಒಟ್ಟು ಮೊತ್ತ
11 ಕರ್ನಾಟಕ 43.30
11 ಪಂಜಾಬ್ 15.65
10 ದಿಲ್ಲಿ 21.15
07 ಮುಂಬಯಿ 12.15
06 ತಮಿಳುನಾಡು 26.00