ಕಿವೀಸ್ ಟೆಸ್ಟ್ ಸರಣಿಗೆ ಇಶಾಂತ್ ಶರ್ಮಾ ಲಭ್ಯವಾಗುತ್ತಾರೋ ಇಲ್ಲವೋ?

ಹೊಸದಿಲ್ಲಿ: ನ್ಯೂಜಿಲೆಂಡ್ ವಿರುದ್ಧ ಟಿ20 ಸರಣಿಯಲ್ಲಿ 5-0 ಅಂತರದ ಕ್ಲೀನ್ ಸ್ವೀಪ್ ಜಯ ಗಳಿಸಿರುವ ಟೀಮ್ ಇಂಡಿಯಾ ಏಕದಿನ ಸರಣಿಯಲ್ಲಿ 0-3ರ ಅಂತರದ ವೈಟ್ ವಾಶ್ ಮುಖಭಂಗವನ್ನು ಎದುರಿಸಿತ್ತು. ಇದೀಗ ಇತ್ತಂಡಗಳು ಎರಡು ಪಂದ್ಯಗಳ ಟೆಸ್ಟ್ ಸರಣಿಗೆ ಸಜ್ಜಾಗುತ್ತಿದೆ.

ಐಸಿಸಿ ಟೆಸ್ಟ್ ಚಾಂಪಿಯನ್‌ಶಿಪ್ ಚಾಲ್ತಿಯಲ್ಲಿರುವಂತೆಯೇ ನಂ.1 ಶ್ರೇಯಾಂಕದ ಭಾರತ ತಂಡಕ್ಕೆ ನ್ಯೂಜಿಲೆಂಡ್‌ನಲ್ಲಿ ಕಠಿಣ ಸವಾಲು ಎದುರಾಗಲಿದೆ. ಹಾಗಾಗಿ ಬಲಿಷ್ಠ ತಂಡವನ್ನೇ ಕಣಕ್ಕಿಳಿಸುವ ಇರಾದೆಯಲ್ಲಿದೆ. ಈ ನಡುವೆ ಬಲಗೈ ಅನುಭವಿ ವೇಗದ ಬೌಲರ್ ಇಶಾಂತ್ ಶರ್ಮಾ ಗಾಯದ ಸಮಸ್ಯೆಯು ಆತಂಕಕ್ಕೆ ಕಾರಣವಾಗಿದೆ.

ಗಾಯದಿಂದ ಚೇತರಿಸಿಕೊಳ್ಳುತ್ತಿರುವ ಇಶಾಂತ್ ಶರ್ಮಾ, ಮೊದಲ ಟೆಸ್ಟ್ ಪಂದ್ಯಕ್ಕೆ ಲಭ್ಯವಾಗುವರೇ ಇಲ್ಲವೋ ಎಂಬುದು ಕುತೂಹಲಕ್ಕೆ ಕಾರಣವಾಗಿದೆ. ಇಶಾಂತ್ ಶರ್ಮಾಗೆ ಫೆಬ್ರವರಿ 15ರೊಳಗೆ ಬೆಂಗಳೂರಿನ ರಾಷ್ಟ್ರೀಯ ಕ್ರಿಕೆಟ್‌ ಅಕಾಡೆಮಿಯಲ್ಲಿ ಫಿಟ್ನೆಸ್ ಪರೀಕ್ಷೆ ನಡೆಯಲಿದೆ. ಫಿಟ್ನೆಸ್ ಪರೀಕ್ಷೆಯಲ್ಲಿ ತೇರ್ಗಡೆ ಹೊಂದಿದರೆ ಮಾತ್ರ ಮಾತ್ರ ಕಿವೀಸ್ ವಿಮಾನವನ್ನೇರಲಿದ್ದಾರೆ.

ಟಿ20 ಭಾರತದ ಪಾಲು, ಏಕದಿನದಲ್ಲಿ ಕಿವೀಸ್ ಜಯಭೇರಿ: ಅಸಲಿ 'ಟೆಸ್ಟ್' ಈಗ ಶುರು!

ಜನವರಿ 21ರಂದು ರಣಜಿ ಟ್ರೋಫಿಯಲ್ಲಿ ದಿಲ್ಲಿ ತಂಡವನ್ನು ಪ್ರತಿನಿಧಿಸಿರುವ ಇಶಾಂತ್ ಶರ್ಮಾ, ವಿದರ್ಭ ವಿರುದ್ಧ ಪಂದ್ಯದಲ್ಲಿ ಗಾಯಗೊಂಡಿದ್ದರು. ಒಂದು ವೇಳೆ 31ರ ಹರೆಯದ ಇಶಾಂತ್ ಶರ್ಮಾ ಕಿವೀಸ್ ವಿರುದ್ಧದ ಟೆಸ್ಟ್ ಸರಣಿಗೆ ಅಲಭ್ಯವಾದರೆ ಟೀಮ್ ಇಂಡಿಯಾಗೆ ಭಾರಿ ಹೊಡೆತವನ್ನೇ ನೀಡಲಿದೆ.

ಇಶಾಂತ್‌ಗೆ ಪುನಶ್ಚೇತನವನ್ನು ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿ ಮೇಲ್ನೋಟ ವಹಿಸುತ್ತಿದೆ. ಪ್ರಾಥಮಿಕ ವರದಿಗಳ ಪ್ರಕಾರ ಇಶಾಂತ್ ಸಂಪೂರ್ಣವಾಗಿ ಗುಣಮುಖರಾಗಲು ಆರು ವಾರಗಳ ಅವಶ್ಯಕತೆಯಿತ್ತು. ಹಾಗಾಗಿ ಕಿವೀಸ್ ಸರಣಿಗೆ ಲಭ್ಯವಾಗುವರೇ ಎಂಬ ಬಗ್ಗೆ ಆತಂಕ ಮನೆ ಮಾಡಿದೆ.

ಏತನ್ಮಧ್ಯೆ ನ್ಯೂಜಿಲೆಂಡ್ ಟೆಸ್ಟ್ ಸರಣಿಗೆ ಇಶಾಂತ್ ಶರ್ಮಾರನ್ನು ಹೆಸರಿಸಲಾಗಿದೆ. ಇನ್ನೊಂದೆಡೆ ಸಂಪೂರ್ಣ ಫಿಟ್ನೆಸ್ ಮರಳಿ ಪಡೆಯಲು ಇಶಾಂತ್ ಶರ್ಮಾ ಕಠಿಣ ಪರಿಶ್ರಮದಲ್ಲಿ ನಿರತವಾಗಿದ್ದಾರೆ.

'ಬೇಡ...ಬೇಡ'; ವಿಕೆಟ್ ಮಧ್ಯೆ ಕನ್ನಡದಲ್ಲೇ ಸಂವಹನ ನಡೆಸಿದ ಕೆಎಲ್ ರಾಹುಲ್-ಮನೀಶ್ ಪಾಂಡೆ

ಭಾರತ ಹಾಗೂ ನ್ಯೂಜಿಲೆಂಡ್ ನಡುವಣ ಟೆಸ್ಟ್ ಸರಣಿ ವೇಳಾಪಟ್ಟಿ ಇಂತಿದೆ:
ಮೊದಲ ಟೆಸ್ಟ್: ವೆಲ್ಲಿಂಗ್ಟನ್, ಫೆ.21ರಿಂದ 25ರ ವರೆಗೆ,
ದ್ವಿತೀಯ ಟೆಸ್ಟ್: ಕ್ರಿಸ್ಟ್‌ಚರ್ಚ್, ಫೆ.29ರಿಂದ ಮಾ.4ರ ವರೆಗೆ.

ಪಂದ್ಯಾರಂಭ: ಮುಂಜಾನೆ 4 ಗಂಟೆಗೆ (ಭಾರತೀಯ ಕಾಲಮಾನ)

ಅಭ್ಯಾಸ ಪಂದ್ಯ: ಭಾರತ vs ನ್ಯೂಜಿಲೆಂಡ್ ಇಲೆವೆನ್, ಹ್ಯಾಮಿಲ್ಟನ್ (ಫೆ.14ರಿಂದ 16ರ ವರೆಗೆ), ಬೆಳಗ್ಗೆ 3.30 (ಭಾರತೀಯ ಕಾಲಮಾನ)

ಕೊಹ್ಲಿ ನಾಯಕತ್ವಕ್ಕೆ ಕಪ್ಪು ಚುಕ್ಕೆ; 31 ವರ್ಷದಲ್ಲಿ ವೈಟ್‌ವಾಶ್ ಸೋಲಿನ ಮುಖಭಂಗ!

ಟೆಸ್ಟ್ ತಂಡ ಇಂತಿದೆ:

ಭಾರತ: ವಿರಾಟ್ ಕೊಹ್ಲಿ (ನಾಯಕ), ಮಯಾಂಕ್ ಅಗರ್ವಾಲ್, ಪೃಥ್ವಿ ಶಾ, ಶುಭಮನ್ ಗಿಲ್, ಚೇತೇಶ್ವರ ಪೂಜಾರ, ಅಜಿಂಕ್ಯ ರಹಾನೆ, ಹನುಮ ವಿಹಾರಿ, ರವಿಚಂದ್ರನ್ ಅಶ್ವಿನ್, ರವೀಂದ್ರ ಜಡೇಜಾ, ವೃದ್ದಿಮಾನ್ ಸಹಾ (ವಿಕೆಟ್ ಕೀಪರ್), ರಿಷಬ್ ಪಂತ್ (ವಿಕೆಟ್ ಕೀಪರ್), ಜಸ್ಪ್ರೀತ್ ಬುಮ್ರಾ, ಉಮೇಶ್ ಯಾದವ್, ಮೊಹಮ್ಮದ್ ಶಮಿ, ನವದೀಪ್ ಸೈನಿ ಮತ್ತು ಇಶಾಂತ್ ಶರ್ಮಾ (ಇನ್ನಷ್ಟೇ ದೃಢಗೊಳ್ಳಬೇಕಿದೆ).