Ricky Ponting: ಪರ್ತ್‌ನಲ್ಲಿ ಪಂಟರ್‌ಗೆ ಡ್ರೀಮ್ ಸ್ಪೆಲ್ ಸ್ಮರಿಸಿದ ಇಶಾಂತ್

ಪರ್ತ್: ದಶಕದ ಹಿಂದೆ 2008ರ ಪರ್ತ್‌ ಟೆಸ್ಟ್ ಪಂದ್ಯದಲ್ಲಿ ಆತಿಥೇಯ ಆಸ್ಟ್ರೇಲಿಯಾ ವಿರುದ್ಧ ಟೀಮ್ ಇಂಡಿಯಾ 72 ರನ್ ಅಂತರದ ಸ್ಮರಣೀಯ ಗೆಲುವು ದಾಖಲಿಸಿತ್ತು.

413 ರನ್ ಗೆಲುವಿನ ಗುರಿ ಹಿಂಬಾಲಿಸಿದ ಆಸೀಸ್ ದ್ವಿತೀಯ ಇನ್ನಿಂಗ್ಸ್‌ನಲ್ಲಿ 340 ರನ್‌ಗಳಿಗೆ ತನ್ನೆಲ್ಲ ವಿಕೆಟುಗಳನ್ನು ಕಳೆದುಕೊಂಡಿತ್ತು.

ಅಂದಿನ ಆಸೀಸ್ ನಾಯಕ ರಿಕಿ ಪಾಂಟಿಂಗ್‌ಗೆ ಯುವ ವೇಗಿ ಇಶಾಂತ್ ಶರ್ಮಾ ಡ್ರೀಮ್ ಸ್ಪೆಲ್ ಎಸೆದಿದ್ದರಲ್ಲದೆ ವಿಶ್ವ ಶ್ರೇಷ್ಠ ದಾಂಡಿಗನನ್ನು ಹೊರಗಟ್ಟುವಲ್ಲಿ ಯಸಸ್ವಿಯಾಗಿದ್ದರು.

ಇದೀಗ ಟೀಮ್ ಇಂಡಿಯಾದ ಪ್ರಮುಖ ಅಸ್ತ್ರವೆನಿಸಿಕೊಂಡಿರುವ ಇಶಾಂತ್, ಬಿಸಿಸಿಐ ಟಿವಿಗೆ ನೀಡಿದ ಸಂದರ್ಶನದಲ್ಲಿ ತಮ್ಮ ಡ್ರೀಮ್ ಸ್ಪೆಲ್ ಬಗ್ಗೆ ಅನುಭವಗಳನ್ನು ಹಂಚಿಕೊಂಡಿದ್ದಾರೆ.

"ಓರ್ವ ಯುವ ವೇಗಿಯಾಗಿ ಮೋಜಿನ ಆಟವಾಡಲು ಬಯಸಿದ್ದೆ. ಪರ್ತ್‌ನಲ್ಲಿ ಪಂದ್ಯ ಬಗ್ಗೆ ಉತ್ಸಾಹಿತನಾದರೂ ಈ ಗೆಲುವು ಅಷ್ಟೊಂದು ಮಹತ್ವ ಪಡೆದಿದೆ ಎಂಬುದು ತಿಳಿದಿರಲಿಲ್ಲ. ನಾನು ಎರಡು ಕಾಲುಗಳಲ್ಲಿ ಬೇರೆ ಬೇರೆಯಾದ ಶೂ ಧರಿಸಿ ಆಡುತ್ತಿದ್ದೆ" ಎಂದರು.

ಇನ್‌ಸ್ವಿಂಗರ್ ಮೂಲಕ ಪಂಟರ್‌ಗೆ ಕಾಟ ಕೊಟ್ಟಿದ್ದ ಇಶಾಂತ್ ಅಚಾನಕ್ ಎಸೆದ ಔಟ್‌ಸ್ವಿಂಗರ್‌ನಲ್ಲಿ ಪಂಟರ್ ಬಲಿಯಾಗಿದ್ದರು. ಆದರೆ ನಾನು ಅಂದು ಔಟ್‌ಸ್ವಿಂಗರ್ ಎಸೆಯಲು ಪ್ರಯತ್ನಿಸಿಲ್ಲ ಎಂಬುದನ್ನು ಇಶಾಂತ್ ವಿವರಿಸಿದರು.

"ನಾನು ನೇರವಾಗಿ ಚೆಂಡು ಎಸೆದಿದ್ದೆ. ಆದರೆ ಚೆಂಡು ತಿರುವನ್ನು ಪಡೆದಿಲ್ಲ. ಇದು ಪಂಟರ್ ವಿಕೆಟ್ ಪಡೆಯಲು ಸಹಕಾರಿಯಾಯಿತು" ಎಂದರು.

"ಈಗ ಗೆಲುವಿನ ಬಗ್ಗೆ ಯೋಚಿಸಿದಾಗ ಪರ್ತ್ ಟೆಸ್ಟ್ ಗೆಲುವು ಎಷ್ಟೊಂದು ಮಹತ್ವ ಪಡೆದಿದೆ ಎಂಬುದು ತಿಳಿದು ಬರುತ್ತಿದೆ. ಇದು ಸ್ಮರಣೀಯ ಗೆಲುವುಗಳಲ್ಲಿ ಒಂದಾಗಿದೆ" ಎಂದು 30ರ ಹರೆಯದ ಇಶಾಂತ್ ವಿವರಿಸಿದರು.