ಕೋಹ್ಲಿಗೆ ಆ ಪದ ಉಚ್ಚರಿಸಲು ಗೊತ್ತೇ? ಮತ್ತೆ ಡಿಆರ್‌ಎಸ್ ವಿವಾದ ಕೆಣಕಿದ ಆಸೀಸ್

ಹೊಸದಿಲ್ಲಿ: ಭಾರತ ಹಾಗೂ ಆಸ್ಟ್ರೇಲಿಯಾ ನಡುವಣ ಬೆಂಗಳೂರಿನಲ್ಲಿ ಎರಡನೇ ಟೆಸ್ಟ್ ವೇಳೆ ನಡೆದ ಡಿಆರ್‌ಎಸ್ ವಿವಾದಕ್ಕೆ ಅಧಿಕೃತವಾಗಿ ತಿಲಾಂಜಲಿ ನೀಡಿದರೂ ಕ್ರಿಕೆಟ್ ಆಸ್ಟ್ರೇಲಿಯಾದ ಸಿಇಒ ಜೇಮ್ಸ್ ಸದರ‌್‌ಲ್ಯಾಂಡ್ ವಿವಾದವನ್ನು ಮತ್ತೆ ಕೆದಕಿದ್ದಾರೆ.

ಆಸ್ಟ್ರೇಲಿಯಾದಲ್ಲಿ ರೆಡಿಯೋ ಸ್ಟೇಷನ್‌ವೊಂದಕ್ಕೆ ನೀಡಿರುವ ಸಂದರ್ಶನದಲ್ಲಿ ಸ್ಟೀವ್ ಸ್ಮಿತ್ ಅವರಲ್ಲಿ ವಿರಾಟ್ ಕೋಹ್ಲಿ ಕ್ಷಮೆಯಾಚಿಸಬೇಕೇ ಎಂಬ ಬಗ್ಗೆ ಕೇಳಿದ ಪ್ರಶ್ನೆಗೆ, ಅವರಿಗೆ (ಕೋಹ್ಲಿಗೆ) ಆ ಪದ ಉಚ್ಚರಿಸಲು (Sorry) ಗೊತ್ತೇ? ಎಂದು ಖಾರವಾಗಿ ಪ್ರತಿಕ್ರಿಯಿಸಿದ್ದಾರೆ.

ಬೆಂಗಳೂರಿನಲ್ಲಿ ನಡೆದ ಟೆಸ್ಟ್ ಪಂದ್ಯದಲ್ಲಿ ಉಮೇಶ್ ಯಾದವ್ ದಾಳಿಯಲ್ಲಿ ಎಲ್‌ಬಿಡಬ್ಲ್ಯು ಬಲೆಗೆ ಸಿಲುಕಿದ್ದ ಸ್ಮಿತ್, ಡಿಆರ್‌ಎಸ್ ಮನವಿಗಾಗಿ ಡ್ರೆಸ್ಸಿಂಗ್ ಕೊಠಡಿಯ ಸಹಾಯ ಪಡೆಯಲು ಯತ್ನಿಸಿದ್ದರು. ತದಾ ಬಳಿಕ ನಡೆದ ಸುದ್ದಿಗೋಷ್ಠಿಯಲ್ಲಿ ತಮ್ಮ ವರ್ತನೆಗಾಗಿ ಕ್ಷಮೆಯಾಚಿಸಿದ್ದರಲ್ಲದೆ ಬುದ್ಧಿ ಮಂಕು ಸಂಭವಿಸಿತ್ತು ಎಂದು ಸಮರ್ಥಿಸಿಕೊಂಡಿದ್ದರು.

ಇನ್ನೊಂದೆಡೆ ಆಸ್ಟ್ರೇಲಿಯಾ ವಿರುದ್ಧ ವಾಗ್ದಾಳಿ ಮಾಡಿರುವ ಕೋಹ್ಲಿ, ಆಸೀಸ್ ಆಟಗಾರರು ಒಂದರೆಡು ಬಾರಿ ಡಿಆರ್‌ಎಸ್‌ಗಾಗಿ ಡ್ರೆಸ್ಸಿಂಗ್ ರೂಂ ಸಹಾಯ ಪಡೆಯುವ ಪ್ರಯತ್ನ ಮಾಡಿರುವುದನ್ನು ತಾವೇ ನೋಡಿರುವುದಾಗಿ ಆರೋಪಿಸಿದ್ದರು.

ಈ ನಡುವೆ ಕ್ರಿಕೆಟ್ ದೃಷ್ಟಿಕೋನದಲ್ಲಿ ವೀಕ್ಷಿಸುವಾಗ ಬೆಂಗಳೂರು ಟೆಸ್ಟ್ ಪಂದ್ಯದಲ್ಲಿ ಇತ್ತಂಡಗಳು ಕಠಿಣ ಹೋರಾಟವನ್ನು ನೀಡಿದೆ ಎಂದು ಸದರ್‌ಲ್ಯಾಂಡ್ ಸೇರಿಸಿದರು.