ಹೀಗೂ ಸಿಕ್ಸ್ ಹೊಡೆಯಲು ಸಾಧ್ಯವೇ? ಅಂದ್ರೆ ಆತ ವಿರಾಟ್ ಕೋಹ್ಲಿ ಆಗಿರಲೇಬೇಕು!

ದಿಲ್ಲಿ: ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಟ್ವೆಂಟಿ-20 ಚಾಂಪಿಯನ್‌ಶಿಪ್‌ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ಅತ್ಯಂತ ಹೀನಾಯ ಪ್ರದರ್ಶನ ನೀಡಿರಬಹುದು. ಅಷ್ಟೇ ಯಾಕೆ ಆರ್‌ಸಿಬಿ ನಾಯಕ ವಿರಾಟ್ ಕೋಹ್ಲಿ ಬ್ಯಾಟಿಂಗ್ ಫಾರ್ಮ್ ಬಗ್ಗೆಯೂ ಟೂರ್ನಿಯುದ್ಧಕ್ಕೂ ಸಾಕಷ್ಟು ಜರಿಯಲಾಗಿತ್ತು.

ಆದರೆ ಇವೆಲ್ಲದಕ್ಕೂ ವಿರಾಟ್ ತಮ್ಮ ಬ್ಯಾಟ್ ಮೂಲಕವೇ ಉತ್ತರ ನೀಡಿದ್ದಾರೆ. ಡೆಲ್ಲಿ ಡೇರ್‌ಡೆವಿಲ್ಸ್ ವಿರುದ್ಧ ನಡೆದ ಅಂತಿಮ ಲೀಗ್ ಪಂದ್ಯದಲ್ಲಿ ಆಕರ್ಷಕ ಅರ್ಧಶತಕ ಬಾರಿಸಿದ ಕೋಹ್ಲಿ, ತಂಡವನ್ನು ಗೆಲುವಿನತ್ತ ಮುನ್ನಡೆಸಿದ್ದರು. ಇದರೊಂದಿಗೆ ಗೆಲುವಿನೊಂದಿಗೆ ಬೆಂಗಳೂರು ಐಪಿಎಲ್ 10ರ ಅಭಿಯಾನವನ್ನು ಕೊನೆಗೊಳಿಸಿತ್ತು.

ಪಂದ್ಯದಲ್ಲಿ ವಿರಾಟ್ ಕೋಹ್ಲಿ ಅಮೋಘ ಸಿಕ್ಸರ್‌ವೊಂದನ್ನು ಬಾರಿಸಿದ್ದರು. ಇದು ವಿಮರ್ಶಕರಿಂದ ಅತ್ಯಂತ ಹೆಚ್ಚು ಪ್ರಶಂಸೆಗೆ ಪಾತ್ರವಾಗಿದ್ದು, ಐಪಿಎಲ್ 10ರ ಅತ್ಯುತ್ತಮ ಶಾಟ್ ಎಂಬ ಬಿರುದಿಗೂ ಪಾತ್ರವಾಗಿದೆ.

ಕೋರಿ ಆಂಡ್ರೆಸನ್ ಎಸೆದ ಚೆಂಡನ್ನು ಜಸ್ಟ್ ಫ್ಲಿಕ್ ಮಾಡಿದ ಕೋಹ್ಲಿ ಅಮೋಘ ಸಿಕ್ಸರ್ ಬಾರಿಸಿದ್ದಾರೆ. ಈ ಮೂಲಕ ತಾವು ಫಾರ್ಮ್‌ಗೆ ಮರಳಿರುವುದನ್ನು ಸಾರಿದ್ದಾರೆ. ಪ್ರಸ್ತುತ ಶಾಟ್ ಬಗ್ಗೆ ಹೆಚ್ಚು ವಿವರಣೆ ನೀಡುವ ಬದಲು ನೀವೇ ಕಣ್ಣಾರೆ ವೀಕ್ಷಿಸಿದರೆ ಒಳ್ಳೆಯದು.