Anshuman Gaekwad: ಮಹಿಳಾ ಕೋಚ್‌ ಆಯ್ಕೆಗೆ ಕಪಿಲ್‌ ದೇವ್‌!

ಹೊಸದಿಲ್ಲಿ : ಬಿಸಿಸಿಐನ ಕ್ರಿಕೆಟ್‌ ಸಲಹಾ ಸಮಿತಿ (ಸಿಎಸಿ) ವಿವಿಧ ಕಾರಣಗಳಿಗಾಗಿ ಭಾರತ ಮಹಿಳಾ ತಂಡದ ನೂತನ ಕೋಚ್‌ ಆಯ್ಕೆ ಪ್ರಕ್ರಿಯೆಯಲ್ಲಿ ಪಾಲ್ಗೊಳ್ಳುವ ಸಾಧ್ಯತೆ ಕಡಿಮೆ ಇದ್ದು, ಭಾರತ ತಂಡದ ಮಾಜಿ ನಾಯಕ ಕಪಿಲ್‌ ದೇವ್‌ ಸಮಿತಿಯ ಭಾಗವಾಗುವ ಸಾಧ್ಯತೆಗಳಿವೆ ಎನ್ನಲಾಗಿದೆ.

ಡಿಸೆಂಬರ್‌ 1ರಿಂದ ಕೋಚ್‌ ಹುದ್ದೆ ತೆರವಾಗಿದ್ದು, ಅರ್ಜಿ ಸಲ್ಲಿಸಲು ಡಿಸೆಂಬರ್‌ 15ರ ಗಡುವು ವಿಧಿಸಲಾಗಿದೆ.

ನಿಯಮದ ಪ್ರಕಾರ ಸಚಿನ್‌ ತೆಂಡೂಲ್ಕರ್‌, ವಿವಿಎಸ್‌ ಲಕ್ಷ್ಮಣ್‌ ಮತ್ತು ಸೌರವ್‌ ಗಂಗೂಲಿಯವರನ್ನೊಳಗೊಂಡ ಸಿಎಸಿ ಸಂದರ್ಶನ ನಡೆಸಬೇಕು. ಆದರೆ, ಕಾರಣಾಂತರಗಳಿಂದ ಈ ಮೂವರಿಗೆ ಆಯ್ಕೆ ಪ್ರಕ್ರಿಯೆಯಲ್ಲಿ ಪಾಲ್ಗೊಳ್ಳಲು ಸಾಧ್ಯವಾಗುತ್ತಿಲ್ಲ. ಹೀಗಾಗಿ ಬಿಸಿಸಿಐ ನಿವೃತ್ತ ಆಟಗಾರರಾದ ಸುನಿಲ್‌ ಗವಾಸ್ಕರ್‌, ಕಪಿಲ್‌ ದೇವ್‌, ಅಂಶುಮಾನ್‌ ಗಾಯಕ್ವಾಡ್‌, ಶುಭಾಂಗಿ ಕುಲಕರ್ಣಿ ಮತ್ತು ಶಾಂತಾ ರಂಗಸ್ವಾಮಿ ಅವರನ್ನು ಸಂಪರ್ಕಿಸಲಿದ್ದು, ಲಭ್ಯವಿರುವ ಮೂವರ ಸಮಿತಿ ರಚಿಸಲಿದೆ ಎಂದು ಹೆಸರು ಹೇಳಲಿಚ್ಛಿಸದ ಬಿಸಿಸಿಐ ಮೂಲಗಳು ತಿಳಿಸಿವೆ.