ಚೊಚ್ಚಲ ಏಕದಿನ ಕ್ಯಾಪ್ ಧರಿಸಿದ ಖಲೀಲ್ ಅಹ್ಮದ್

ದುಬೈ: ಯುಎಇನಲ್ಲಿ ನಡೆಯುತ್ತಿರುವ ಏಷ್ಯಾ ಕಪ್ 2018 ಕ್ರಿಕೆಟ್ ಟೂರ್ನಮೆಂಟ್‌ನಲ್ಲಿ ಭಾರತ ತಂಡವು ಕ್ರಿಕೆಟ್ ಕೂಸು ಹಾಂಕಾಂಗ್ ಸವಾಲನ್ನು ಎದುರಿಸುತ್ತಿದೆ.

ಇದರಂತೆ ಇಲ್ಲಿನ ಅಂತಾರಾಷ್ಟ್ರೀಯ ಕ್ರಿಕೆಟ್ ಮೈದಾನದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಟೀಮ್ ಇಂಡಿಯಾ ಪರ ಚೊಚ್ಚಲ ಪಂದ್ಯವನ್ನಾಡುವ ಅವಕಾಶವನ್ನು ಉದಯೋನ್ಮುಖ ಎಡಗೈ ವೇಗಿ ಖಲೀಲ್ ಅಹ್ಮದ್ ಪಡೆದಿದ್ದಾರೆ.

ಇದರೊಂದಿಗೆ ಏಕದಿನದಲ್ಲಿ ಭಾರತವನ್ನು ಪ್ರತಿನಿಧಿಸಿದ 222ನೇ ಆಟಗಾರ ಎಂಬ ಗೌರವಕ್ಕೆ ಖಲೀಲ್ ಪಾತ್ರವಾಗಿದ್ದಾರೆ.

ಈ ಮೊದಲು ಏಷ್ಯಾ ಕಪ್‌ಗಾಗಿನ ಟೀಮ್ ಇಂಡಿಯಾಕ್ಕೆ ಖಲೀಲ್ ಚೊಚ್ಚಲ ಬುಲಾವ್ ಪಡೆದಿದ್ದಾರೆ. ಇದರಂತೆ ಇಂಗ್ಲೆಂಡ್ ವಿರುದ್ಧದ ಸುದೀರ್ಘ ಸರಣಿಯ ಬಳಿಕ ತಂಡದ ಪ್ರಮುಖ ವೇಗಿಗಳಿಗೆ ವಿಶ್ರಾಂತಿ ಸೂಚಿಸಿರುವ ಹಿನ್ನಲೆಯಲ್ಲಿ ಖಲೀಲ್ ಅವಕಾಶವನ್ನು ಪಡೆದಿದ್ದಾರೆ.

20ರ ಹರೆಯದ ಈ ರಾಜಸ್ತಾನ ವೇಗಿ, 2016ರ ಕಿರಿಯರ ವಿಶ್ವಕಪ್‌ನಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದರು. ಅಲ್ಲದೆ ಭಾರತ ರನ್ನರ್-ಅಪ್ ಪ್ರಶಸ್ತಿ ಜಯಿಸಿತ್ತು. ಅಂತೆಯೇ 2018 ಐಪಿಎಲ್ ಹರಾಜಿನಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ ತೆಕ್ಕೆಗೆ ಸೇರಿಕೊಂಡಿದ್ದರು.