ಮಂಜ್ರೇಕರ್ ಟೀಕೆಗೆ ಗರಂ ಆದಂ ಪೊಲಾರ್ಡ್

ಮುಂಬೈ: ಭಾನುವಾರ ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ನಡೆದ ಪಂದ್ಯದ ವೇಳೆ ವೀಕ್ಷಕ ವಿವರಣೆಯನ್ನು ನೀಡುತ್ತಿದ್ದ ಸಂಜಯ್ ಮಂಜ್ರೇಕರ್ ಮಾಡಿರುವ ಟೀಕೆಗೆ ಮುಂಬೈ ಇಂಡಿಯನ್ಸ್ ಆಲ್‌ರೌಂಡರ್ ಆಟಗಾರ ಕೀರಾನ್ ಪೊಲಾರ್ಡ್ ತೀವ್ರ ಗರಂ ಆಗಿದ್ದಾರೆ.

ಮುಂಬೈ ಹಾಗೂ ಕೋಲ್ಕತ್ತಾ ನಡುವಣ ಪಂದ್ಯದ ವೇಳೆ ಪೊಲಾರ್ಡ್ ಬ್ಯಾಟಿಂಗ್ ಸಾಮರ್ಥ್ಯದ ಬಗ್ಗೆ ಪ್ರಶ್ನೆ ಮಾಡಿದ್ದ ಮಂಜ್ರೇಕರ್, ಕೊನೆಯ ಆರೇಳು ಓವರ್‌ಗಳಲ್ಲಿ ಬ್ಯಾಟಿಂಗ್ ಮಾಡಲು ಮಾತ್ರ ಪೊಲಾರ್ಡ್ ಸಮರ್ಥ ಎಂದಿದ್ದರು.

ಪೊಲಾರ್ಡ್‌ಗೆ ಯಾವ ಬ್ಯಾಟಿಂಗ್ ಕ್ರಮಾಂಕದಲ್ಲಿ ಆಡಲು ಯೋಗ್ಯವಾಗಿದ್ದಾರೆ ಎಂಬ ಸಹ ವೀಕ್ಷಕ ವಿವರಣೆಗಾರನ ಪ್ರಶ್ನೆಗೆ ಉತ್ತರಿಸುತ್ತಾ ಮಂಜ್ರೇಕರ್ ಈ ರೀತಿಯಾಗಿ ನುಡಿದಿದ್ದರು.

ಪಂದ್ಯದ ಬಳಿಕ ಈ ಬಗ್ಗೆ ಪ್ರಶ್ನೆ ಮಾಡಿರುವ ಪೊಲಾರ್ಡ್, ನಿಮ್ಮ ಬಾಯಿಂದ ಧನಾತ್ಮಕವಾದ ಯಾವುದಾದರೂ ಒಂದು ಮಾತು ಬರುತ್ತಿದೆಯೇ? ಮಾತನಾಡುವುದಕ್ಕೆ ನಿನಗೆ ದುಡ್ಡು ಸಿಗುತ್ತಿರಬಹುದು ಅಲ್ಲಿಯ ವರೆಗೆ ಮೌಖಿಕ ಅತಿಸಾರ ಮುಂದುವರಿಸಬಹುದಾಗಿದೆ ಎಂದು ಕಟುವಾಗಿ ನುಡಿದಿದ್ದಾರೆ.

ಕೆಕೆಆರ್ ವಿರುದ್ಧದ ಪಂದ್ಯದಲ್ಲಿ 17 ರನ್ ಗಳಿಸಿದ ಪೊಲಾರ್ಡ್ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿದ್ದರು. ಹಾಗಿದ್ದರೂ ರಿತಿಶ್ ರಾಣಾ ಹಾಗೂ ಹಾರ್ದಿಕ್ ಪಾಂಡ್ಯ ಅವರ ಅಮೋಘ ಬ್ಯಾಟಿಂಗ್ ಪ್ರದರ್ಶನದಿಂದ ಪಂದ್ಯವನ್ನು ಮುಂಬೈ ತಮ್ಮದಾಗಿಸಿಕೊಂಡಿತ್ತು.