ಅಂದಿನ ಇದೇ ದಿನದಂದು ಕಿಂಗ್ ಕೊಹ್ಲಿ ಉದಯ!

ಹೊಸದಿಲ್ಲಿ: ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ದಾಖಲೆಗಳ ಮೇಲೆ ದಾಖಲೆಗಳನ್ನು ಬರೆಯುತ್ತಲೇ ಸಾಗುತ್ತಿರುವ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ, ಅಂದಿನ ಇದೇ ದಿನದಂದು (2008, ಆಗಸ್ಟ್ 18) ಕ್ರಿಕೆಟ್‌ಗೆ ಕಾಲಿರಿಸಿದ್ದರು.

ಶ್ರೀಲಂಕಾ ವಿರುದ್ಧ ಮೊದಲ ಪಂದ್ಯದಲ್ಲಿ ಆರಂಭಿಕನಾಗಿ ಕಣಕ್ಕಿಳಿದಿದ್ದ ವಿರಾಟ್ 12 ರನ್ ಗಳಿಸಿ ವಿಕೆಟ್ ಒಪ್ಪಿಸಿದ್ದರು. ಆದರೆ ಅಲ್ಲಿಂದ ಬಳಿಕ ಅನೇಕ ದಾಖಲೆಗಳನ್ನು ಮುರಿದಿದ್ದಾರೆ.

ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ದಶಕವೊಂದರಲ್ಲೇ 20000 ರನ್ ಗಳಿಸಿದ ವಿಶ್ವದ ಏಕಮಾತ್ರ ಬ್ಯಾಟ್ಸ್‌ಮನ್ ಎಂಬ ಹಿರಿಮೆಗೆ ಕೊಹ್ಲಿ ಪಾತ್ರವಾಗಿದ್ದರು.

ಏಕದಿನದಲ್ಲಿ 2009ರಲ್ಲಿ ಕೊಹ್ಲಿ ಮೊದಲ ಶತಕ ಸಿಡಿಸಿದ್ದರು. ಇದೀಗ 2019 ವೆಸ್ಟ್‌ಇಂಡೀಸ್ ಸರಣಿಯ ವೇಳೆಗೆ ಒಟ್ಟು 43 ಶತಕಗಳನ್ನು ಬಾರಿಸಿದ್ದು, ಮಾಜಿ ಬ್ಯಾಟಿಂಗ್ ದಿಗ್ಗಜ ಸಚಿನ್ ತೆಂಡೂಲ್ಕರ್ ಬಳಿಕ ಅತಿ ಹೆಚ್ಚು ಶತಕಗಳನ್ನು ಬಾರಿಸಿದ ಹಿರಿಮೆಗೆ ಪಾತ್ರವಾಗಿದ್ದಾರೆ.

2010ರಲ್ಲಿ ಟ್ವೆಂಟಿ-20 ಹಾಗೂ 2011ರಲ್ಲಿ ಟೆಸ್ಟ್ ಕ್ರಿಕೆಟ್‌ಗೆ ಕಾಲಿರಿಸಿರುವ ಕೊಹ್ಲಿ ಎಲ್ಲ ಪ್ರಕಾರದಲ್ಲೂ ದಾಖಲೆಗಳನ್ನು ಬರೆದಿದ್ದಾರೆ. ಅಂತೆಯೇ 239 ಏಕದಿನದಲ್ಲಿ 11520 ರನ್, 77 ಟೆಸ್ಟ್‌ನಲ್ಲಿ 6613 ರನ್ ಮತ್ತು 70 ಟ್ವೆಂಟಿ-20ಗಳಲ್ಲಿ 2368 ರನ್ ಗಳಿಸಿದ್ದಾರೆ.